தமிழ்நாட்டின் முதல் வெளிநாட்டுப் பல்கலைக்கழகமாக மேற்கு ஆஸ்திரேலியா பல்கலைக்கழகத்தை (University of Western Australia – UWA) சென்னை வேளச்சேரியில் நிறுவ பல்கலைக்கழக மானியக் குழுவும் (UGC), தமிழ்நாடு அரசும் அனுமதி வழங்கியிருப்பதற்கு மார்க்சிஸ்ட் கம்யூனிஸ்ட் கட்சி (CPI(M)) தனது மிகக் கடுமையான கண்டனத்தைத் தெரிவித்துள்ளதுடன், இந்த அனுமதியை உடனடியாகத் திரும்பப் பெற வேண்டும் என்றும் வலியுறுத்தியுள்ளது.

இதுகுறித்து மார்க்சிஸ்ட் கம்யூனிஸ்ட் கட்சியின் தமிழ்நாடு மாநிலச் செயலாளர் பெ. சண்முகம் வெளியிட்டுள்ள விரிவான கண்டன அறிக்கையில், கல்வி உரிமை, சமூக நீதி மற்றும் தேசத்தின் இறையாண்மையைப் பாதிக்கும் வகையில் எடுக்கப்பட்டுள்ள இந்த முடிவு குறித்து அடுக்கடுக்கான குற்றச்சாட்டுகளை முன்வைத்துள்ளார்.

ஒன்றிய அரசின் தேசிய கல்விக் கொள்கை (NEP 2020)-ன் ஒரு பகுதியாக உயர்கல்வி வளாகங்களை பணக்காரர்களுக்கான உயர் தட்டுத் தீவுகளாக மாற்றி, கல்வி உரிமையை வணிக நலன்களுக்கு அடகு வைக்கும் இத்தகைய நடவடிக்கைகளுக்குத் தமிழ்நாடு அரசு ஒப்புதல் அளித்திருப்பது எவ்விதத்திலும் ஏற்க முடியாதது என்று அவர் சுட்டிக்காட்டியுள்ளார். ஹரியானா, கர்நாடகா, மகாராஷ்டிரா ஆகிய மாநிலங்களைத் தொடர்ந்து தமிழ்நாட்டிலும் வெளிநாட்டுப் பல்கலைக்கழகங்கள் அனுமதிக்கப்படுவதாகவும், கடந்த 2026 செப்டம்பர் மாதம் தனியார் பல்கலைக்கழகங்களை ஊக்குவிக்கும் சட்டத் திருத்தத்தைத் தொடர்ந்து, தற்போது அன்னியப் பல்கலைக்கழகத்திற்கு அனுமதி வழங்கப்பட்டிருப்பது உயர்கல்வி மீதான அடுத்தகட்ட தாக்குதல் என்றும் அவர் குறிப்பிட்டுள்ளார்.

இதையும் படிங்க: மதுரை, நாகர்கோவில் பாதாள சாக்கடை தனியார்மயம்: தவெக அரசு முடிவை கைவிட சிபிஎம் வலியுறுத்தல்!

மாநிலத்தில் உள்ள அரசு பல்கலைக்கழகங்கள் மற்றும் கல்லூரிகளின் அவலநிலையைச் சுட்டிக்காட்டிய பெ. சண்முகம், "ஒருபுறம் தமிழக அரசுப் பல்கலைக்கழகங்களில் 30 முதல் 50 சதவீதம் வரையிலான ஆசிரியர் பணியிடங்கள் பல ஆண்டுகளாக நிரப்பப்படாமல் உள்ளன; அரசு கலை மற்றும் அறிவியல் கல்லூரிகளில் மட்டும் 7,198 உதவிப் பேராசிரியர் பணியிடங்கள் காலியாகக் கிடக்கின்றன; இதனால் அடித்தட்டு மற்றும் நடுத்தரக் குடும்பங்களைச் சேர்ந்த ஏழை மாணவர்களுக்குக் கிடைக்க வேண்டிய உயர்கல்வியின் தரம் பெருமளவு வீழ்ச்சியடையும் அபாயம் நிலவுகிறது; இதையெல்லாம் சரிசெய்ய வேண்டிய அரசாங்கங்கள், வெளிநாட்டுப் பல்கலைக்கழகங்களுக்குச் சிவப்புக் கம்பளம் விரிப்பது மிகுந்த வேதனைக்குரியது" என்று சாடியுள்ளார்.

மேலும், வேளச்சேரியில் அமையவுள்ள மேற்கு ஆஸ்திரேலியா பல்கலைக்கழகம் தனது அதிகாரப்பூர்வ இணையதளத்தில் வெளியிட்டுள்ள ஆண்டுக் கல்விக் கட்டண விவரங்களைச் சுட்டிக்காட்டிய அவர், "எம்.பி.ஏ படிப்பிற்கு ரூ.23.10 லட்சம், செயற்கை நுண்ணறிவு (AI) படிப்பிற்கு ரூ.17.93 லட்சம், வணிக மேலாண்மை மற்றும் தரவு அறிவியல் (Data Science) படிப்புகளுக்குத் தலா ரூ.14.52 லட்சம் என முதல் ஆண்டுக் கட்டணங்கள் மட்டுமே விண்ணைத் தொடும் அளவிற்கு நிர்ணயிக்கப்பட்டுள்ளன; இதுதவிர மற்ற இதர கட்டணங்களும் உண்டு; அயல்நாட்டுப் பல்கலைக்கழகங்களின் கட்டணங்களை முறைப்படுத்தவோ அல்லது தலையிடவோ ஒன்றிய அரசுக்கு எந்த அதிகாரமும் இல்லாத நிலையில், இது அப்பட்டமான வரம்பற்ற கட்டணக் கொள்ளைக்கே வழிவகுக்கும்" என்று எச்சரித்துள்ளார்.

எளிய மற்றும் நடுத்தரக் குடும்பத்து மாணவர்கள் பயிலும் அரசுப் பல்கலைக்கழகங்கள் மற்றும் கலைக் கல்லூரிகளுக்குத் தேவையான அடிப்படை உள்கட்டமைப்பு வசதிகளை மேம்படுத்தாமல், வெளிநாட்டுப் பல்கலைக்கழகங்களை அனுமதிப்பது கல்வி உரிமை, இடஒதுக்கீடு மற்றும் தேசத்தின் இறையாண்மை மீது தொடுக்கப்படும் கொடூரமான தாக்குதல் என்று தெரிவித்த அவர், மேற்கு ஆஸ்திரேலியா பல்கலைக்கழகத்திற்கு வழங்கப்பட்ட அனுமதியை ஒன்றிய அரசும், தமிழ்நாடு அரசும் உடனடியாகத் திரும்பப் பெற வேண்டும் என மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயற்குழு சார்பில் திட்டவட்டமாக வலியுறுத்தியுள்ளார்.

இதையும் படிங்க: முதியோர் ஓய்வூதியத்திற்கு ஆதார் கட்டாயமா? மூத்த குடிமக்கள் அவதி... சிபிஎம் கண்டனம்!