தமிழகத்தில் 2026 சட்டமன்ற தேர்தலுக்கு தி.மு.க. தலைமை இம்முறை மிக கடுமையான வேட்பாளர் தேர்வு உத்தியை வகுத்துள்ளது. கட்சி 200 தொகுதிகளில் வெற்றி பெறும் நோக்கில், வெற்றி வாய்ப்பு 50 சதவீதத்திற்கு மேல் உள்ளவர்களுக்கு மட்டுமே டிக்கெட் வழங்க திட்டமிட்டுள்ளது. இதற்காக கட்சி தலைமை பல்வேறு அளவுகோல்களை வைத்து ஆய்வு செய்து வருகிறது.
தொகுதி மக்களிடம் நல்ல பெயர் பெற்றவர்கள், தொகுதி மேம்பாட்டு நிதியை முழுமையாக பயன்படுத்தியவர்கள், சட்டசபையில் தொகுதி பிரச்னைகளுக்காக கேள்விகள் எழுப்பி, வளர்ச்சி திட்டங்களுக்கு முக்கியத்துவம் கொடுத்து பேசிய எம்எல்ஏக்களுக்கு முன்னுரிமை அளிக்கப்படும்.
அதேநேரம், எதிர்க்கட்சிகளின் குற்றச்சாட்டு பட்டியலில் அதிகம் இடம்பெற்றவர்கள், நிதியை செலவிடாமல் அலட்சியம் காட்டியவர்கள், உள்ளூர் மக்கள் பிரச்னைகளில் கவனம் செலுத்தாமல் தொண்டர்களிடமும் அவப்பெயர் வாங்கியவர்கள், கட்டப்பஞ்சாயத்து, சொத்து குவிப்பு, மணல் கடத்தல், சட்டவிரோத குவாரி போன்ற குற்றச்சாட்டுகளுக்கு ஆளானவர்களுக்கு டிக்கெட் வழங்க வாய்ப்பில்லை என தி.மு.க. மூத்த நிர்வாகிகள் தெரிவித்துள்ளனர்.
இதையும் படிங்க: திமுக துணை பொதுச்செயலாளார் ஓபிஎஸ்?! அதற்குள் பதவியா? தேனி, போடியில் மீண்டும் போட்டி?!
கட்சியின் சர்வே நிறுவனம் சமீபத்தில் சமர்ப்பித்த அறிக்கையில், சிட்டிங் எம்எல்ஏக்களில் 60 பேரின் வெற்றி வாய்ப்பு 50 சதவீதத்திற்கு கீழ் உள்ளதாக தெரிவிக்கப்பட்டுள்ளது. அவர்களுக்கு சீட் கொடுப்பது ஆபத்தானது என கூறப்பட்டுள்ளது. அமைச்சர் அல்லது மாவட்டச் செயலர் பதவி வகித்தாலும், வெற்றி இழுபறியாக இருந்தால் அவர்களுக்கும் வாய்ப்பு மறுக்கப்படலாம். புதுமுகங்கள், இளைஞர்களுக்கு முன்னுரிமை அளிக்கப்படும் என்பதும் உறுதியாகியுள்ளது.
இந்த முடிவு தி.மு.க.வுக்குள் பெரும் பரபரப்பை ஏற்படுத்தியுள்ளது. பல சிட்டிங் எம்எல்ஏக்கள் தங்கள் நிலையை குறித்து கவலையில் உள்ளனர். கட்சி தலைமை “வெற்றி மட்டுமே முக்கியம், தகுதியானவர்களை மட்டுமே களமிறக்குவோம்” என உறுதியாக உள்ளது. இந்த கடுமையான தேர்வு முறை 2026 தேர்தலில் தி.மு.க.வின் வெற்றி வாய்ப்பை மேலும் அதிகரிக்கும் என கட்சி வட்டாரங்கள் நம்புகின்றன.
தமிழக மக்களின் எதிர்பார்ப்புகளுக்கு ஏற்ப தரமான வேட்பாளர்களை நிறுத்துவதன் மூலம் தி.மு.க. இம்முறை வலுவான அணியை களமிறக்கும் என எதிர்பார்க்கப்படுகிறது.
இதையும் படிங்க: மார்ச் 1ல் தமிழகம் வருகிறார் மோடி!! இதோ முழு பயண திட்டம்!! திருப்பரங்குன்றம் விசிட் கன்ஃபார்ம்?!! பாஜக உற்சாகம்!