திமுக தலைவர் மு.க.ஸ்டாலின், மாநிலத்தில் தொடர்ந்து நடைபெறும் கொலைச் சம்பவங்கள் மற்றும் போதைப்பொருள் உற்பத்தி தொடர்பான அலட்சியத்தைக் கடுமையாகச் சாடியுள்ளார். காவல்துறையின் செயல்பாடு குறித்து அவர் வெளியிட்ட கருத்துக்கள் பரபரப்பை ஏற்படுத்தியுள்ளன.சில நாட்களுக்கு முன்பு திண்டுக்கல் மாவட்டத்தில் நடந்த சம்பவத்தை நினைவுகூர்ந்த ஸ்டாலின், “ஜாமினில் வெளிவந்த ஒருவர் தனது மனைவியைக் கொடூரமாகக் கொலை செய்தார். அப்போதே ஜாமினில் வெளிவரும் குற்றவாளிகள் முறையாகக் கண்காணிக்கப்படுகிறார்களா என்று கேள்வி எழுப்பியிருந்தேன்” என்றார். அதற்குப் பதில் இல்லாத நிலையில், சிவகங்கையில் நேற்று நடந்த மற்றொரு கொலைச் சம்பவம் காவல்துறையின் அலட்சியத்தை வெளிச்சமிட்டுக் காட்டியுள்ளது என அவர் சுட்டிக்காட்டினார்.

கொலை வழக்கில் கைதான மதன் என்ற ரவுடி ஜாமினில் வெளிவந்த பிறகு ஓட ஓட விரட்டிக் கொல்லப்பட்டதை சுட்டிக்காட்டிய ஸ்டாலின், “இது முழுக்க முழுக்க காவல்துறையின் அலட்சியத்தால் நடந்த கொலை” என்று கூறினார். பெருந்துறை அருகே செவிலியர் ஒருவர் கடத்தப்பட்டு பாலியல் வன்கொடுமைக்கு உள்ளாக்கப்பட்டு கொலை செய்யப்பட்ட சம்பவத்தையும் அவர் குறிப்பிட்டார். ஐந்து நாட்களுக்குப் பிறகுதான் அவரது உடல் கண்டுபிடிக்கப்பட்டது என்பதைச் சுட்டிக்காட்டிய அவர், இத்தகைய சம்பவங்கள் தொடர்வது கவலைக்குரியது என்றார்.

போதைப்பொருள் கடத்தல் தொடர்பாகவும் ஸ்டாலின் கடுமையான விமர்சனங்களை முன்வைத்தார். “நம் ஆட்சி என்று நினைத்து சிலர் போதைப்பொருள் கடத்தலைத் தாராளமாகச் செய்து வருகின்றனர். வேதாரண்யத்தில் த.வெ.க. ஒன்றியச் செயலாளர் கஞ்சா கடத்திய வழக்கில் கைது செய்யப்பட்டார். இப்போது அதே மாவட்டத்தில் உலக அளவில் மெத் தயாரித்து விற்பனை செய்ய முயன்ற த.வெ.க. நிர்வாகி மெத் பூபாலனும் கைதாகியுள்ளார்” என்று அவர் தெரிவித்தார்.முதலமைச்சரின் திரைப்படங்களைப் பார்த்து கட்சியினர் இத்தகைய செயல்களைக் கற்றுக்கொள்கிறார்களா என்றும் அவர் கேள்வி எழுப்பினார். மாநிலக் காவல்துறையினரால் இவர்களைப் பிடிக்க முடியவில்லையா அல்லது ஆளும்கட்சி நபர் என்பதால் கண்டும் காணாமல் விடப்பட்டனரா என்று கேட்ட அவர், “போதைப்பொருள் கட்டுப்பாட்டைச் செய்ய வேண்டுமென்றால் முதலில் தன் கட்சியினரை முதலமைச்சர் கட்டுப்பாட்டில் வைக்க வேண்டும்.

இதையும் படிங்க: "பரவாயில்ல"..! இந்த நிலைப்பாட்டை திமுக தொடர வேண்டும்..! ஞானேஷ் குமார் விவகாரத்தில் மாணிக்கம் தாகூர் கருத்து..!

அதற்கு காவல்துறை முதலில் அவரது கட்டுப்பாட்டில் இருக்க வேண்டும்” என்றார்.காவல்துறை துறைக்கு பெயரளவில் மட்டுமே முதலமைச்சர் பொறுப்பு வகிப்பதாகவும், பல துறைகளைப் போல காவல்துறையையும் அவுட்சோர்ஸ் செய்துவிட்டாரா என்றும் ஸ்டாலின் கேள்வி எழுப்பினார். தொடர்ந்து நடைபெறும் அரிவாள் வெட்டுகள் மற்றும் ஒன்றிய அரசின் விசாரணை அமைப்புகளிடம் பிடிபடும் போதைக் கடத்தல்கள் காவல்துறையில் உரிய கவனம் செலுத்தப்படவில்லை என்பதைக் காட்டுவதாக அவர் தெரிவித்தார்.முடிவில், “சிஎம் சார், உங்கள் அலட்சியம் உயிர்களைப் பலிவாங்குகிறது. போதைப்பொருளை விடுங்கள், விளையாட்டை எடுங்கள் என்று சொன்ன நீங்கள் முதலில் ஓய்வை விட்டுவிட்டு உங்கள் துறையைக் கையில் எடுங்கள்” என்று அழைப்பு விடுத்தார்.

இதையும் படிங்க: ஞானேஷ் குமார் பதவி விலகனும்.! வலுக்கும் எதிர்ப்பு..! திமுக எம்பிக்கள் கூட்டத்தில் தீர்மானம்..!!