சென்னை கிழக்கு கடற்கரை சாலையை (ECR) 6 வழி மேல்மட்டச் சாலையாக மாற்றும் பணிக்கான டெண்டர் விவகாரத்தில், திலீப் பில்ட்கான் நிறுவனம் தொடர்ந்த மேல்முறையீட்டு மனு மீது அரசு இறுதி முடிவெடுக்கும் வரை அந்தப் பணிகளை வேறு யாருக்கும் வழங்க மாட்டோம் எனத் தமிழக அரசு சென்னை உயர் நீதிமன்றத்தில் உறுதி அளித்துள்ளது. கிழக்கு கடற்கரை சாலையை 6 வழி மேல்மட்டச் சாலையாக அமைப்பதற்கான பணிக்கான தொழில்நுட்ப டெண்டர் நிராகரிக்கப்பட்டதை எதிர்த்துப் போபாலைச் சேர்ந்த திலீப் பில்ட்கான் என்ற நிறுவனம் சென்னை உயர் நீதிமன்றத்தில் வழக்குத் தொடர்ந்திருந்தது. இந்த மனு இன்று தலைமை நீதிபதி அமர்வு முன்பு விசாரணைக்கு வந்தபோது, டெண்டர் நிராகரிக்கப்பட்டதற்காக அரசுத் தரப்பில் கூறப்பட்ட காரணங்கள் தன்னிச்சையானவை என மனுதாரர் நிறுவனம் தரப்பில் வாதிடப்பட்டது.

இதற்குப் பதிலளித்த தமிழக அரசுத் தரப்பு வழக்கறிஞர், டெண்டர் நிராகரிக்கப்பட்டதற்கு எதிராக மனுதாரர் நிறுவனம் அரசிடம் மேல்முறையீடு செய்ய சட்டத்தில் இடமுள்ளது என்று தெரிவித்தார். இருதரப்பு வாதங்களையும் கேட்ட நீதிபதிகள், டெண்டர் நிராகரிக்கப்பட்டதை எதிர்த்து இன்னும் 5 நாட்களுக்குள் அரசுக்கு முறையாக மேல்முறையீடு செய்ய மனுதாரர் நிறுவனத்திற்கு அனுமதி வழங்கினர். மேலும், அவ்வாறு தாக்கல் செய்யப்படும் மேல்முறையீட்டு மனுவின் மீது 10 நாட்களுக்குள் தமிழக அரசு தகுந்த முடிவெடுத்து உத்தரவிட வேண்டும் என்றும் நீதிபதிகள் அறிவுறுத்தினர்.

முக்கியமாக, இந்த மேல்முறையீடு குறித்து அரசு இறுதி முடிவை அறிவிக்கும் வரை, கிழக்கு கடற்கரை சாலை தொடர்பான அந்தப் பணிகளை வேறு எந்த நிறுவனத்திற்கும் வழங்கப்பட மாட்டாது எனத் தமிழக அரசு தரப்பில் நீதிமன்றத்தில் திடமான உறுதி அளிக்கப்பட்டது. அரசின் இந்த உறுதிமொழியைப் பதிவு செய்துகொண்ட தலைமை நீதிபதி அமர்வு, திலீப் பில்ட்கான் நிறுவனம் தொடர்ந்த மேல்முறையீட்டு வழக்கை இத்துடன் முடித்து வைத்து உத்தரவிட்டது. மெகா திட்டமான இந்தச் சாலைப் பணிகளில் ஏற்பட்டுள்ள இந்த டெண்டர் இழுபறி, கட்டுமான நிறுவனங்கள் மத்தியில் பெரும் பரபரப்பை ஏற்படுத்தியுள்ளது.

இதையும் படிங்க: அன்புமணி ராமதாஸ் மீதான வழக்குக்கு இடைக்கால தடை! சென்னை உயர் நீதிமன்றம் அதிரடி உத்தரவு!

இதையும் படிங்க: ‘ஜனநாயகன்’ பட சென்சார் வழக்கு: ஜனவரி 27-ல் இறுதித் தீர்ப்பு!