‘Finance With Harish’ என்ற பெயரில் இன்ஸ்டாகிராம் மற்றும் யூடியூப் தளங்களில் நிதி தொடர்பான தகவல்களைப் பகிர்ந்து வந்த 27 வயதான ஹரிஷ் உயிரிழந்த சம்பவம் பெரும் பரபரப்பை ஏற்படுத்தியுள்ளது. அவரது தந்தை அளித்த புகாரின் அடிப்படையில், இணையவழித் துன்புறுத்தல் மற்றும் தற்கொலைக்குத் தூண்டியதாகக் கூறப்படும் குற்றச்சாட்டுகள் குறித்து கானாத்தூர் காவல்துறையினர் விசாரணை மேற்கொண்டு வருகின்றனர். இந்த வழக்கில் தொடர்புடையதாகக் கூறப்படும் யூடியூபர் ஜேசன் சாமுவேல் புதுச்சேரியில் கைது செய்யப்பட்டுள்ளார். 

யார் இந்த ஹரிஷ்?

புதுச்சேரியைச் சேர்ந்த 27 வயதான ஹரிஷ் நிதி ஆலோசனை சம்பந்தமான கன்டெண்ட்களை உருவாக்கி வந்தார். ‘Finance With Harish’ என்ற பெயரில் இன்ஸ்டாகிராம், யூடியூப் தளங்களில் முதலீடு, பண மேலாண்மை மற்றும் நிதி தொடர்பான தகவல்களைப் பகிர்ந்து வந்தார். அவருக்கு சமூக வலைதளங்களில் சுமார் 13 லட்சத்துக்கும் அதிகமான பின்தொடர்பாளர்கள் இருந்ததாகச் செய்திகள் தெரிவிக்கின்றன.

இதையும் படிங்க: "ரங்கோலியும் தீப ஒளியும்"..! பாரம்பரியம்..!! தீபாவளியையொட்டி அமெரிக்கா தபால் தலை வெளியீடு.!!

சர்ச்சை எப்படித் தொடங்கியது?

ஹரிஷ் நிதி ஆலோசனைகளை வழங்குவதற்குத் தேவையான செபி (SEBI) பதிவு மற்றும் ஆம்பீ (AMFI) தொடர்பான தகுதிகள் குறித்து ஜேசன் சாமுவேல் கேள்வி எழுப்பியதாக கூறப்படுஇறது.  அக்டோபர் 18ஆம் தேதி வெளியிட்ட காணொளியில், ஹரிஷ் முறையான அங்கீகாரம் இல்லாமல் நிதி ஆலோசனைகளை வழங்குவதாகவும், தனது தகுதிகள் குறித்து தவறான தகவல்களைப் பகிர்ந்ததாகவும் ஜேசன் குற்றம்சாட்டியதாகக் கூறப்படுகிறது.

இதனைத் தொடர்ந்து ஹரிஷின் சமூக வலைதளக் கணக்குகள் முடக்கப்பட்டதாகவும், அவரைச் சுற்றி இணையத்தில் கடுமையான விமர்சனங்களும் எதிர்மறையான கருத்துகளும் அதிகரித்ததாகவும் தகவல்கள் வெளியாகின. இந்தச் சம்பவங்களால் ஹரிஷ் மன உளைச்சலுக்கு ஆளானதாக அவரது குடும்பத்தினர் குற்றம்சாட்டினர். 

ஹரிஷின் மரணம்:

அக்டோபர் 20ஆம் தேதி, சென்னையை அடுத்த முட்டுக்காடு பகுதியில் வாடகை வில்லாவில் ஹரிஷ் உயிரிழந்த நிலையில் கண்டெடுக்கப்பட்டார். அவரது மரணம் தொடர்பாகக் காவல்துறையினர் விசாரணை மேற்கொண்டனர். இறப்பதற்கு முன்பு ஹரிஷ் காணொளி ஒன்றைப் பதிவு செய்திருந்ததாகவும், அதில் தனது சமூக வலைதளக் கணக்குகள் முடக்கப்பட்டதையும், தனக்கு ஏற்பட்ட நெருக்கடிகளையும் குறிப்பிட்டிருந்ததாகவும் தெரிகிறது. அந்தக் காணொளியை அடிப்படையாக கொண்டு போலீசார் விசாரணையை தீவிரப்படுத்தினர். 

தந்தை அளித்த புகாரில் கூறியிருப்பது என்ன?

ஹரிஷின் தந்தை விநாயகம், கானாத்தூர் காவல் நிலையத்தில் ஜேசன் சாமுவேலுக்கு எதிராகப் புகார் அளித்துள்ளார். தனது மகன் மீது அவதூறான காணொளிகள் வெளியிடப்பட்டதாகவும், இணையவழித் துன்புறுத்தல் மற்றும் மிரட்டல்கள் மூலம் அவருக்கு மன அழுத்தம் ஏற்படுத்தப்பட்டதாகவும் புகாரில் குற்றம்சாட்டியுள்ளார்.

மேலும், புதுச்சேரி முதலமைச்சர் மற்றும் சட்டமன்ற உறுப்பினரின் பெயர்களைப் பயன்படுத்தி, தனது மகனிடம் ரூ.3 கோடி கேட்டு மிரட்டியதாகவும் தந்தை குற்றம்சாட்டியிருந்தார்.

ஜேசன் சாமுவேலின் விளக்கம்:

தன் மீதான குற்றச்சாட்டுகளை ஜேசன் சாமுவேல் மறுத்துள்ளார். ஹரிஷைத் தனிப்பட்ட முறையில் துன்புறுத்தவில்லை என்றும், நிதி ஆலோசனை வழங்குவதற்கான தகுதிகள் மற்றும் உரிமங்கள் குறித்து பொதுமக்களின் நலன் கருதி கேள்வி எழுப்பியதாகவும் அவர் தெரிவித்தார். ஹரிஷின் மரணம் தனக்கு வருத்தத்தை ஏற்படுத்தியதாகவும் தெரிவித்திருந்தார். 

ஜேசன் சாமுவேல் கைது செய்யப்பட்டது எப்படி?

ஹரிஷின் தந்தை அளித்த புகாரின் அடிப்படையில், அக்டோபர் 21ஆம் தேதி கானாத்தூர் காவல்துறையினர் தற்கொலைக்குத் தூண்டியதாகக் கூறப்படும் குற்றச்சாட்டு தொடர்பாக வழக்குப் பதிவு செய்து விசாரணையைத் தொடங்கினர். இதன் அடிப்படையில் தலைமறவாக இருந்த ஜேசன் சாமுவேலை தேடி வந்த கானாத்தூர் போலீசார், புதுச்சேரியில் பதுங்கியிருந்த அவரை தற்போது கைது செய்துள்ளனர். 

இதையும் படிங்க: மக்களே மிஸ் பண்ணிடாதீங்க... “இனி அரசே நேரடி விற்பனை”... சி.எம். விஜய் போட்ட அதிரடி உத்தரவு...!