மாஸ்கோ: நீண்ட காலமாகத் தொடர்ந்து வரும் ரஷ்யா–உக்ரைன் போரை முடிவுக்குக் கொண்டுவரும் முயற்சியில் புதிய முன்னேற்றம் ஏற்பட்டுள்ளது. அமெரிக்காவின் முயற்சியில் ரஷ்யா, உக்ரைன் மற்றும் அமெரிக்கா பங்கேற்கும் முத்தரப்பு அமைதிப் பேச்சுவார்த்தையை மீண்டும் தொடங்குவதற்கு ரஷ்ய அதிபர் விளாடிமிர் புடின் கொள்கை அளவில் சம்மதம் தெரிவித்துள்ளதாகத் தகவல் வெளியாகியுள்ளது. உக்ரைன் அதிபர் வோலோடிமிர் ஜெலென்ஸ்கியும் இந்த முயற்சிக்கு ஆதரவு தெரிவித்துள்ளார். 

அமெரிக்க அதிபர் டொனால்டு டிரம்பின் சிறப்புத் தூதர் ஸ்டீவ் விட்காப், முதலில் நார்வே தலைநகர் ஓஸ்லோவில் ஜெலென்ஸ்கியைச் சந்தித்துப் பேச்சுவார்த்தை நடத்தினார். இதைத் தொடர்ந்து ரஷ்யாவின் செயின்ட் பீட்டர்ஸ்பர்க் நகருக்குச் சென்ற அவர், அங்குள்ள கான்ஸ்டான்டின் அரண்மனையில் புடினைச் சந்தித்தார். இந்தச் சந்திப்பு சுமார் மூன்று மணி நேரம் நடைபெற்றது.

அப்போது, உக்ரைன் போரை முடிவுக்குக் கொண்டுவருவதற்கான அமெரிக்காவின் புதிய முன்மொழிவுகள் குறித்து விட்காப் விவாதித்தார். ஓஸ்லோவில் நடைபெற்ற பேச்சுவார்த்தைகளில் கிடைத்த முன்னேற்றத்தைத் தொடர்ந்து, அமைதி ஒப்பந்தத்துக்கான கட்டமைப்பை உருவாக்குவது குறித்து இரு தரப்பினரும் ஆலோசித்தனர்.

இதையும் படிங்க: டிரம்ப் எச்சரிக்கையையும் மீறி ரஷ்யா மீது தாக்குதல்? ஜெலன்ஸ்கியை சாடிய அமெரிக்க அதிபர் டிரம்ப்!

இந்தச் சந்திப்புக்குப் பின்னர், ரஷ்ய அதிபரின் வெளியுறவுக் கொள்கை ஆலோசகர் யூரி உஷாகோவ் செய்தியாளர்களிடம் பேசுகையில், நவம்பர் 10ஆம் தேதிக்குப் பிறகு முத்தரப்பு பேச்சுவார்த்தைகளை மீண்டும் தொடங்குவதற்கு புடின் கொள்கை அளவில் ஒப்புக்கொண்டதாகத் தெரிவித்தார். இந்தப் பேச்சுவார்த்தைகள் முதற்கட்டமாக மூன்று நாடுகளின் தொழில்நுட்ப மற்றும் பேச்சுவார்த்தைக் குழுக்களின் பங்கேற்புடன் நடைபெறலாம் எனக் கூறப்படுகிறது.

மறுபுறம், ஜெலென்ஸ்கியும் அமைதிப் பேச்சுவார்த்தைகளை விரைவாக நடத்துவதற்கு ஆதரவு தெரிவித்துள்ளார். போரை முடிவுக்குக் கொண்டுவருவதற்கான அடுத்தகட்ட நடவடிக்கைகள் குறித்து அமெரிக்காவுடன் தொடர்ந்து ஆலோசித்து வருவதாக உக்ரைன் தரப்பு தெரிவித்துள்ளது.

இருப்பினும், பேச்சுவார்த்தைக்கு சம்மதம் தெரிவிக்கப்பட்டிருப்பது மட்டும் போர் முடிவுக்கு வந்துவிட்டதைக் குறிக்காது. போர் நிறுத்தம், எல்லைப் பகுதிகள், பாதுகாப்பு உத்தரவாதங்கள் உள்ளிட்ட முக்கிய விவகாரங்களில் இரு நாடுகளுக்கும் இடையே இன்னும் கருத்து வேறுபாடுகள் நீடிக்கின்றன.

எனவே, முத்தரப்பு பேச்சுவார்த்தைகள் எப்போது தொடங்கும், அதில் என்ன முடிவுகள் எட்டப்படும், போர் நிறுத்த ஒப்பந்தம் உருவாகுமா என்பவை அடுத்தகட்ட பேச்சுவார்த்தைகளுக்குப் பிறகே தெரியவரும்.

இதையும் படிங்க: ரஷ்ய ராணுவ ரகசியங்களை உக்ரைனுக்கு கசியவிட்ட அதிகாரி! 300 வீரர்கள் உயிரிழப்புக்கு முக்கிய காரணம்!!!