சிறுமிகளுக்கு பாலியல் வன்கொடுமை செய்யப்பட்டதாகக் கூறப்படும் போக்சோ வழக்கில், ஜெம் கிரானைட்ஸ் நிறுவனத்தின் உரிமையாளர் வீரமணி உள்ளிட்ட நான்கு பேர் கைது செய்யப்பட்டுள்ளனர். இந்த வழக்கில் கைது செய்யப்பட்டவர்களிடம் நடத்தப்பட்ட விசாரணையில் பல்வேறு திடுக்கிடும் தகவல்கள் வெளியாகியுள்ளதாக காவல்துறை தரப்பில் தெரிவிக்கப்பட்டுள்ளது.
குறிப்பாக, போயஸ் கார்டனில் உள்ள ஒரு வீட்டை வாடகைக்கு எடுத்து, அங்கு பல சிறுமிகளுக்கு பாலியல் வன்கொடுமை செய்யப்பட்டதாக காவல்துறை விசாரணையில் தெரியவந்துள்ளதாக கூறப்படுகிறது. மேலும், வீரமணி கைது செய்யப்படாமல் இருப்பதற்காக பல கோடி ரூபாய் பணம் கைமாறியதாகவும் விசாரணையில் தெரியவந்துள்ளதாக தகவல் வெளியாகியுள்ளது.
இந்த நிலையில், இந்த வழக்கில் தொடர்புடையவர்கள் என சந்தேகிக்கப்படும் நபர்களை அழைத்து விசாரணை நடத்தும் பணியில் காவல்துறையினர் ஈடுபட்டு வருகின்றனர்.
இதையும் படிங்க: நாடே அதிரும் கொடூர வழக்கு..! திமுக கப்சிப்..! வாய தொறங்க ஸ்டாலின்..! தவெக தாக்கு..!!
இந்த வழக்கை முதற்கட்டமாக விபச்சாரத் தடுப்புப் பிரிவு போலீசார்தான் கையாண்டுள்ளனர். கடந்த ஆண்டு அக்டோபர் மாதமே இந்த வழக்கு பதிவு செய்யப்பட்ட நிலையில், அதனை முடித்து வைப்பதற்கான நடவடிக்கையில் போலீசார் ஈடுபட்டதாக குற்றச்சாட்டு எழுந்துள்ளது.
இதையடுத்து, அப்போது இந்த வழக்கை விசாரித்த உதவி ஆணையர் யாஸ்மின், காவல் ஆய்வாளர்கள் மகேஷ்குமார் மற்றும் ராஜலட்சுமி ஆகிய மூன்று பேருக்கும் தற்போது போலீசார் தரப்பில் சம்மன் அனுப்பப்பட்டுள்ளதாக தகவல் வெளியாகியுள்ளது. அவர்கள் நேரில் ஆஜராகி விசாரணைக்கு ஒத்துழைக்க வேண்டும் என சம்மனில் தெரிவிக்கப்பட்டுள்ளதாக கூறப்படுகிறது.
கடந்த ஆண்டு அக்டோபர் மாதம் புகார் அளிக்கப்பட்டு வழக்குப் பதிவு செய்யப்பட்ட நிலையில், இந்த வழக்கு ஏன் முடித்து வைக்கப்பட்டது? யாருடைய நிர்பந்தத்தின் பேரில் வழக்கை முடித்து வைப்பதற்கான நடவடிக்கை மேற்கொள்ளப்பட்டது? என்பது உள்ளிட்ட பல்வேறு கோணங்களில் மூவரிடமும் விசாரணை நடத்த காவல்துறையினர் திட்டமிட்டுள்ளதாக கூறப்படுகிறது.
மேலும், சில காவல்துறை அதிகாரிகளுக்கு இந்த வழக்கை முடித்து வைப்பதற்காக லஞ்சம் வழங்கப்பட்டதாகக் கூறப்படும் புகார் தொடர்பாகவும் விசாரணை நடைபெற்று வருகிறது.
ஒரு வழக்கின் விசாரணை அதிகாரி எனப்படும் ஐ.ஓ., அந்த வழக்கின் முழுப் பொறுப்பையும் ஏற்கிறார். வழக்கில் எஃப்ஐஆர் பதிவு செய்வது, யாரைக் கைது செய்வது உள்ளிட்ட முக்கிய நடவடிக்கைகள் விசாரணை அதிகாரியின் பொறுப்பில் இருக்கும். அந்த வகையில், இந்த வழக்கில் அப்போது மேற்கொள்ளப்பட்ட விசாரணை எவ்வாறு நடைபெற்றது, என்னென்ன தகவல்கள் கிடைத்தன, வீரமணியிடம் எவ்வாறு விசாரணை நடத்தப்பட்டது, விசாரணையை முடித்து வைப்பதற்கான காரணம் என்ன என்பது குறித்தும் போலீசார் விசாரிக்க உள்ளதாகத் தெரிகிறது.
மேலும், வீரமணியுடன் தொடர்புடைய பெண் குறித்தும், அவரிடம் யார் விசாரணை மேற்கொண்டார்கள் என்பது உள்ளிட்ட பல்வேறு கோணங்களிலும் விசாரணை நடத்த திட்டமிடப்பட்டுள்ளதாக கூறப்படுகிறது.
இதனிடையே, இந்த வழக்கில் நேற்று வீரமணியுடன் தொடர்புடைய இடங்களிலும், வழக்கில் முக்கிய நபராகக் கருதப்படும் பிரகாஷ் என்பவரின் வீட்டிலும் போலீசார் சோதனை மேற்கொண்டனர். இந்த சோதனையின்போது பல முக்கிய ஆவணங்கள் மற்றும் செல்போன்கள் பறிமுதல் செய்யப்பட்டதாக தகவல் வெளியாகியுள்ளது.
இந்த வழக்கில் நான்காவது நபராக கைது செய்யப்பட்ட கணேஷனின் செல்போனில் இருந்து பல வீடியோக்கள் பிரகாஷின் செல்போனுக்கு அனுப்பப்பட்டிருப்பது முதற்கட்ட விசாரணையில் தெரியவந்துள்ளதாக போலீசார் தெரிவித்துள்ளனர்.
இதையடுத்து, பிரகாஷுக்கு எதிராக தற்போது லுக் அவுட் நோட்டீஸ் பிறப்பிக்கப்பட்டுள்ளது. அவர் வெளிநாட்டில் தலைமறைவாக இருப்பதாக கூறப்படுகிறது. நேற்று வெளிநாட்டில் இருந்து இந்தியா திரும்புவதாக அவர் தெரிவித்திருந்த நிலையில், போலீசார் சோதனை மேற்கொண்டதைத் தொடர்ந்து அவர் அங்கேயே தங்கிவிட்டதாகவும், தலைமறைவாகியுள்ளதாகவும் தகவல் வெளியாகியுள்ளது.
இந்த வழக்கில் தொடர்ந்து விசாரணை நடைபெற்று வருகிறது. மேலும், வீரமணி கடந்த பிப்ரவரி மாதம் இரண்டு நிலங்களை விற்பனை செய்திருப்பதாகவும், அந்த நிலங்களை வாங்கிய நபர்களிடமும் போலீசார் விசாரணை நடத்த திட்டமிட்டுள்ளதாகவும் தகவல் வெளியாகியுள்ளது. அந்த நிலங்களை எதற்காக விற்பனை செய்தார் என்பது உள்ளிட்ட கோணங்களில் விசாரணை நடத்தப்பட உள்ளதாக காவல்துறை தரப்பில் தெரிவிக்கப்பட்டுள்ளது.
போக்சோ வழக்கில் கைது செய்யப்பட்டு சிறையில் உள்ள தொழிலதிபர் வீரமணியின் நிறுவனத்துக்குச் சொந்தமான நிலங்கள் விற்பனை செய்யப்பட்டதற்கான ஆவணங்களும் தற்போது வெளியாகியுள்ளதாக கூறப்படுகிறது.
இந்த நிலையில், ஜெம் வீரமணி போக்சோ வழக்கை அப்போது விசாரித்த விபச்சாரத் தடுப்புப் பிரிவு காவல் ஆய்வாளர்கள் மகேஷ்குமார், ராஜலட்சுமி மற்றும் உதவி ஆணையர் யாஸ்மின் ஆகியோர் விசாரணைக்கு ஆஜராகுமாறு போலீசார் தரப்பில் சம்மன் அனுப்பப்பட்டுள்ளது குறிப்பிடத்தக்கது.
இதையும் படிங்க: அரசியல், அதிகாரம், பணம்..! ஜெம் வீரமணி வலைப்பின்னல் என்ன.? சீமான் சரமாரி கேள்வி..!!