வட கடலோர தமிழகப் பகுதிகளின் மேல் நிலவும் வளிமண்டல சுழற்சி மற்றும் தெற்கு உள் கர்நாடகா முதல் மன்னார் வளைகுடா வரை நிலவும் காற்றழுத்தத் தாழ்வுப் பாதை காரணமாக, நீலகிரி, ஈரோடு, சேலம், திருச்சி, டெல்டா மாவட்டங்கள் உள்ளிட்ட 15 மாவட்டங்கள் மற்றும் காரைக்கால் பகுதிகளில் இன்று இடி மின்னல் மற்றும் பலத்த காற்றுடன் கூடிய கனமழைக்கு வாய்ப்புள்ளதாகச் சென்னை மண்டல வானிலை ஆய்வு மையம் அதிகாரப்பூர்வமாக எச்சரித்துள்ளது.

கடந்த 24 மணி நேரத்தில் தமிழகத்தில் அதிகபட்சமாகத் தர்மபுரி மாவட்டம் ஒகேனக்கல்லில் 75.2 மில்லிமீட்டர் (சுமார் 7 செ.மீ) மழை பதிவாகியுள்ளதுடன், திருவண்ணாமலை மாவட்டத்தின் பிஞ்சூர், இறையூர், பாலியப்பட்டு மற்றும் தர்மபுரியின் பெரியபட்டி ஆகிய இடங்களிலும் தலா 7 செ.மீ அளவுக்குக் கனமழை கொட்டித் தீர்த்துள்ளது.

அதேவேளையில், தமிழகத்தின் பெரும்பாலான சமவெளிப் பகுதிகளில் அதிகபட்ச வெப்பநிலை இயல்பை விட 2 முதல் 4 டிகிரி செல்சியஸ் வரை அதிகரித்து அனல் காற்று வீசியது; குறிப்பாகப் பாளையங்கோட்டையில் அதிகபட்சமாக 39.4 டிகிரி செல்சியஸ் வெயில் சுட்டெரித்தது.

இதையும் படிங்க: உஷார் மக்களே..! தீவிரமாகும் காற்றழுத்த தாழ்வு மண்டலம்... மிக கனமழை எச்சரிக்கை.!!

தற்போதைய வளிமண்டல மாற்றங்கள் குறித்து வானிலை ஆய்வு மையம் வெளியிட்டுள்ள விரிவான அறிக்கையில், வட கடலோர தமிழக வான்பரப்பில் சுமார் 1.5 கி.மீ உயரம் வரை ஒரு வளிமண்டல சுழற்சியும், தெற்கு உள் கர்நாடகா முதல் மன்னார் வளைகுடா வரை தமிழகப் பகுதிகள் வழியாக 0.9 கி.மீ உயரத்தில் ஒரு காற்றழுத்தத் தாழ்வுப் பாதையும் நிலவி வருவதாகத் தெரிவிக்கப்பட்டுள்ளது.

இதன் காரணமாக, இன்று (செப்டம்பர் 30) நீலகிரி, ஈரோடு, திருப்பூர், சேலம், தர்மபுரி, கிருஷ்ணகிரி, திருவண்ணாமலை, கடலூர், நாமக்கல், திருச்சிராப்பள்ளி, மயிலாடுதுறை, நாகப்பட்டினம், திருவாரூர், தஞ்சாவூர் மற்றும் புதுக்கோட்டை ஆகிய 15 மாவட்டங்களின் ஓரிரு இடங்களிலும், காரைக்கால் பகுதிகளிலும் இடி மின்னல் மற்றும் மணிக்கு 40 முதல் 50 கி.மீ வேகத்தில் பலத்த சூறாவளிக் காற்றுடன் கூடிய கனமழை பெய்யக்கூடும்.

மேலும், மேற்கு தொடர்ச்சி மலையை ஒட்டிய இதர மாவட்டங்கள், திருப்பத்தூர், வேலூர், ராணிப்பேட்டை, விழுப்புரம், பெரம்பலூர், அரியலூர், கரூர், மதுரை, சிவகங்கை, ராமநாதபுரம், தூத்துக்குடி மற்றும் புதுச்சேரி பகுதிகளில் லேசானது முதல் மிதமான மழையும், ஏனைய பகுதிகளில் லேசான மழையும் பெய்ய வாய்ப்புள்ளது.

நாளை (அக்டோபர் 1) நீலகிரி, கோயம்புத்தூர் மற்றும் ஈரோடு ஆகிய மேற்கு மாவட்டங்களில் ஓரிரு இடங்களில் கனமழையும், திருச்சி, நாமக்கல், தேனி, தென்காசி, திண்டுக்கல், மதுரை, விருதுநகர், நெல்லை மற்றும் கன்னியாகுமரி மாவட்டங்களில் மிதமான மழையும் தொடரும் என கணிக்கப்பட்டுள்ளது.

தலைநகர் சென்னையைப் பொறுத்தவரை வானம் ஓரளவு மேகமூட்டத்துடன் காணப்படும் என்றும், மாலை அல்லது இரவு நேரங்களில் நகரின் ஒருசில பகுதிகளில் இடி மின்னலுடன் கூடிய லேசானது முதல் மிதமான மழை பெய்யக்கூடும் என்றும், அதிகபட்ச வெப்பநிலை 36 முதல் 37 டிகிரி செல்சியஸ் வரை பதிவாகலாம் என்றும் தெரிவிக்கப்பட்டுள்ளது.

கடல் பகுதிகளில் வழக்கத்திற்கு மாறான சூறாவளிக் காற்று வீச வாய்ப்பில்லை என்பதால் மீனவர்களுக்கான எச்சரிக்கை ஏதுமில்லை எனத் தென்மண்டல வானிலை மைய விஞ்ஞானி முனைவர் வி.ஆர். துரை தெரிவித்துள்ளார்.

இதையும் படிங்க: கேரளாவை மீண்டும் புரட்டிப் போட்ட பெரு வெள்ளம்... மாநிலம் முழுவதும் பறந்த எச்சரிக்கை... 3 பேர் பலி...!