ஹெச்.வினோத் இயக்கத்தில், தமிழக வெற்றிக் கழகத் தலைவர் விஜய் நடித்துள்ள அவரது கடைசித் திரைப்படமான ‘ஜனநாயகன்’ (Thalapathy 69), சென்சார் சான்றிதழ் பெறுவதில் ஏற்பட்டுள்ள சிக்கல்கள் காரணமாகப் பெரும் பொருளாதார நெருக்கடியில் சிக்கியுள்ளது. படத்தின் வெளியீடு தொடர்ந்து தள்ளிப்போவதால், அதன் டிஜிட்டல் உரிமத்தைப் பெற்றிருந்த அமேசான் பிரைம் (Amazon Prime) நிறுவனம் ஒப்பந்தத்தை ரத்து செய்துள்ளதாகத் தகவல்கள் வெளியாகியுள்ளன.

படத்தின் டிஜிட்டல் உரிமத்தை சுமார் ₹120 கோடிக்கு அமேசான் நிறுவனம் வாங்கியிருந்ததாகக் கூறப்படுகிறது. ஆனால், சென்சார் விவகாரத்தால் படத்தின் தியேட்டர் ரிலீஸ் பலமுறை தள்ளிப்போனது. இதனால், அமேசான் நிறுவனம் ஒப்பந்தத்தை ரத்து செய்துள்ளதாகவும், இது தொடர்பாகத் தயாரிப்பு நிறுவனமான கே.வி.என் (KVN Productions) மீது சட்டப்படி நடவடிக்கை எடுக்க உள்ளதாகவும் செய்திகள் பரவி வருகின்றன.

கடந்த ஜனவரி 9-ஆம் தேதியே வெளியாக வேண்டிய இந்தப் படத்திற்கு, ராணுவம் மற்றும் மதம் தொடர்பான சில காட்சிகள் காரணமாகத் தணிக்கை வாரியம் சான்றிதழ் வழங்க மறுத்தது. இதனை எதிர்த்துத் தயாரிப்பு தரப்பு நீதிமன்றம் சென்ற நிலையில், வழக்கு தற்போது மீண்டும் தணிக்கை வாரியத்தின் மறுஆய்வுக் குழுவிடம் (Revising Committee) உள்ளது.

இதையும் படிங்க: நேரில் ஆஜரா..?? எலெக்ஷன் முடியும் வரை டைம் கொடுங்க..!! கோர்ட் படியேறும் விஜய்..!!

மார்ச் 9-ஆம் தேதி மறுஆய்வுக் குழுவினர் படத்தைப் பார்த்துச் சான்றிதழ் வழங்கத் திட்டமிட்டிருந்தனர். ஆனால், குழு உறுப்பினருக்கு உடல்நலக் குறைவு ஏற்பட்டதால் அந்தத் திரையிடல் தற்காலிகமாக ரத்து செய்யப்பட்டுள்ளது. அடுத்த திரையிடல் மார்ச் 17-ஆம் தேதி நடைபெற வாய்ப்புள்ளதாகத் தெரிகிறது.

ஓடிடி ஒப்பந்தத்தில் ஏற்பட்டுள்ள சிக்கல் மற்றும் சென்சார் தாமதம் காரணமாக, ‘ஜனநாயகன்’ திரைப்படம் தமிழகச் சட்டமன்றத் தேர்தலுக்குப் பிறகே (மே மாத இறுதியில்) வெளியாகும் எனத் திரைத்துறை வட்டாரங்கள் தெரிவிக்கின்றன.

இதுவரை அமேசான் நிறுவனம் அல்லது கே.வி.என் நிறுவனம் சார்பில் அதிகாரப்பூர்வமாக ஒப்பந்த ரத்து குறித்த அறிக்கை எதுவும் வெளியிடப்படவில்லை என்றாலும், இந்தத் தாமதம் தயாரிப்பாளருக்குப் பெரும் நஷ்டத்தை ஏற்படுத்தியுள்ளதாகக் கூறப்படுகிறது.

இதையும் படிங்க: விஜய்யின் மகளிர் தின அறிவிப்பு! பெண்களுக்கு மாதம் ₹2500, ஆண்டுக்கு ₹15,000 தவெக-வின் மெகா தேர்தல் வாக்குறுதிகள்!