சர்வதேச மகளிர் தினத்தை முன்னிட்டு மாமல்லபுரத்தில் நடைபெற்ற தமிழக வெற்றிக் கழகத்தின் (தவெக) பிரம்மாண்ட விழாவில், அக்கட்சியின் தலைவர் விஜய் வரவிருக்கும் சட்டமன்றத் தேர்தலுக்கான மகளிருக்கான பிரத்யேகத் தேர்தல் வாக்குறுதிகளை அதிகாரப்பூர்வமாக வெளியிட்டார். "பெண்கள் நலனே தவெக-வின் முதல் இலக்கு" என முழங்கிய அவர், தமிழக அரசியல் வரலாற்றில் இதுவரை இல்லாத பல கவர்ச்சிகரமான திட்டங்களை அறிவித்துள்ளார்.

1 முதல் 12-ஆம் வகுப்பு வரை பயிலும் குழந்தைகளின் கல்வி இடைநிற்றலைத் தவிர்க்க, ஒவ்வொரு தாய்க்கும் அல்லது பாதுகாவலருக்கும் ஆண்டுதோறும் ₹15,000 கல்வி உதவித்தொகை வழங்கப்படும். மேலும், 60 வயது வரை உள்ள அனைத்துக் குடும்பத் தலைவிகளுக்கும் மாதந்தோறும் ₹2,500 உரிமைத் தொகை வழங்கப்படும்.

இதையும் படிங்க: ஒரு பவுன் நகையுடன் அண்ணன் சீர்… பொதுப் போக்குவரத்தில் PANIC பட்டன்..! வாக்குறுதியில் சிக்ஸ் அடித்த விஜய்..!!

தமிழகத்தில் பிறக்கும் ஒவ்வொரு குழந்தையையும் அரசின் சார்பில் வரவேற்கும் விதமாக தங்க மோதிரம் மற்றும் 'பேபி வெல்கம் கிட்' (Baby Welcome Kit) வழங்கப்படும்.

பெண்களின் பாதுகாப்பை உறுதி செய்யச் சாதாரண உடையில் ரோந்து செல்லும் 'ராணி வேலுநாச்சியார் படை' உருவாக்கப்படும். பெண்களுக்கு எதிரான குற்றங்களை 24 மணி நேரத்திற்குள் விசாரிக்க 'அஞ்சலையம்மாள் அதிவிரைவு நீதிமன்றங்கள்' அமைக்கப்படும்.

ஏழைப் பெண்களின் திருமணத்திற்காகத் தாய் வீட்டுச் சீராக 1 பவுன் தங்கம் மற்றும் தரமான பட்டுச் சேலை வழங்கப்படும். இதனுடன் ஆண்டுக்கு 6 கேஸ் சிலிண்டர்கள் இலவசமாக வழங்கப்படும்.

போக்குவரத்து மற்றும் ஆரோக்கியம்: அனைத்து அரசுப் பேருந்துகளிலும் பெண்களுக்குக் கட்டணமில்லாப் பயணம் மற்றும் பேருந்துகளில் அவசரக்கால 'பாதுகாப்பு பட்டன்' (Safety Button) வசதி அறிமுகப்படுத்தப்படும். மேலும், பெண்களுக்கு விலையில்லாச் சானிட்டரி நாப்கின்கள் வழங்கப்படும்.

பெண்கள் மற்றும் குழந்தைகள் நலனைப் பாதுகாக்கத் தவெக-வில் தனித் துறை உருவாக்கப்படும். அந்தத் துறை நேரடியாகத் தனது கட்டுப்பாட்டிலும் கண்காணிப்பிலும் இருக்கும் என விஜய் உறுதி அளித்தார்.

அரசாங்கத்திடம் காசு இல்லை எனச் சொல்லிக்கொண்டே எப்படி ஒவ்வொருவர் கணக்கிலும் ₹5,000 போடுகிறீர்கள்? எனத் தற்போதைய திமுக அரசின் திட்டத்தைக் கேள்வி எழுப்பினார். மேலும், சில பிரச்சனைகளுக்காக நீங்கள் (தொண்டர்கள்) வருத்தப்படுவது எனக்கு வருத்தமாக இருக்கிறது; மக்கள் பிரச்சனைகளை மட்டும் பார்ப்போம்" எனத் தனது தொண்டர்களுக்கு அறிவுரை வழங்கினார்.

இதையும் படிங்க: உங்க விஜய்ங்க... நம்ம தளபதி... மாமல்லபுரத்தில் ஆர்ப்பரித்த மகளிர் படை..!!