ஜெம் கிரானைட்ஸ் நிறுவனத்தின் நிறுவனர் மற்றும் ஜெம் குழுமத்தின் தலைவரான வீரமணி, சிறுமிகளை பாலியல் ரீதியாக துன்புறுத்தியதாகக் கூறப்படும் குற்றச்சாட்டின் அடிப்படையில் கைது செய்யப்பட்டார். இவர் இந்திய கிரானைட் தொழில்துறையில் நீண்ட காலமாக செல்வாக்கு மிக்க தொழிலதிபராக அறியப்பட்டவர். அவரது வயது எண்பத்து நான்கு. இந்த வழக்கு 2025 ஆம் ஆண்டு அக்டோபர் மாதம் தொடங்கியது. சென்னையில் உள்ள ஒரு குழந்தை உரிமை ஆர்வலர், ஒரு பென் டிரைவை காவல்துறையிடம் ஒப்படைத்தார். அதில் ஒரு வயதான நபர் சிறுமியை பாலியல் வன்கொடுமைக்கு உட்படுத்தும் காட்சிகள் இருந்தன.

இந்த ஆதாரத்தின் அடிப்படையில் போக்சோ சட்டத்தின் கீழ் வழக்குப் பதிவு செய்யப்பட்டது. ஆரம்ப விசாரணையில் சிறுமியை அடையாளம் காண முடியவில்லை என்றும், வீடியோ 2019 ஆம் ஆண்டைச் சேர்ந்தது என்றும் காவல்துறை தரப்பு தெரிவித்து, வழக்கை முடித்து வைக்கும் அறிக்கையை சிறப்பு போக்சோ நீதிமன்றத்தில் தாக்கல் செய்தது. ஆனால் 2026 ஆகஸ்ட் 19 ஆம் தேதி சிறப்பு நீதிமன்றம் அந்த அறிக்கையை நிராகரித்து, மேலும் விசாரணை நடத்த உத்தரவிட்டது. இதைத் தொடர்ந்து காவல்துறை விசாரணையை தீவிரப்படுத்தியது. வீடியோவில் தோன்றிய நபர் ஜெம் வீரமணி தான் என்பது உறுதி செய்யப்பட்டது. அவர் தேனாம்பேட்டையில் ஒரு வீட்டை வாடகைக்கு எடுத்து, அதன் நிர்வாகத்தை தனது தொழில் தொடர்புடைய சாந்தி மற்றும் அவரது கணவர் மகேந்திர சிம்ஹன் ஆகியோரிடம் ஒப்படைத்திருந்தார்.

அந்த வீட்டில் சிறுமிகளை அழைத்து வந்து வன்கொடுமை செய்ததாகக் குற்றச்சாட்டு எழுந்தது. 2026 ஆகஸ்ட் 29 ஆம் தேதி சென்னை மத்திய குற்றப் பிரிவின் விபச்சார தடுப்புப் பிரிவு காவல்துறையினர் வீரமணி, சாந்தி மற்றும் மகேந்திர சிம்ஹன் ஆகிய மூவரையும் கைது செய்தனர். பாதிக்கப்பட்ட மேலும் ஒரு சிறுமியின் தாய் புகார் கொடுத்த நிலையில் வீரமணி மீது மேலும் ஒரு போக்சோ வழக்கு பதிவு செய்யப்பட்டது. இதற்கிடையில் திமுக மீது கடுமையான விமர்சனத்தை தமிழக வெற்றிக்கழக அரசு முன்வைத்து வருகிறது. 

இதையும் படிங்க: மதுராந்தகம், தாராபுரத்தில் திமுக புதிய வியூகம்! மகளிரணிக்கு கனிமொழி கொடுத்த முக்கிய டாஸ்க்!

இந்த நிலையில், ஜெம் வீரமணி வழக்கு தொடர்பாக திமுக பொருளாளர் டி.ஆர். பாலு மனுத் தாக்கல் செய்துள்ளார். ஜெம் வீரமணி வழக்கில் முதல்வர் விஜய் மற்றும் அமைச்சர்கள் ஆதவ் அர்ஜுனா, நிர்மல் குமார் ஆகியோரை விசாரிக்க வேண்டும் என்று மனு தாக்கல் செய்யப்பட்டுள்ளது. சம்மன் அனுப்பி விசாரணை நடத்த வேண்டும் என்று வலியுறுத்தப்பட்டுள்ளது. நேற்றைய தினம் சிறப்பு புலனாய்வு குழுவிடம் திமுக தரப்பில் மனு அளிக்கப்பட்ட நிலையில் இன்று உயர் நீதிமன்றத்தை நாடியுள்ளது திமுக. குற்றம் சாட்டப்பட்டவர்களை திமுக பாதுகாத்ததாக தெரிவித்த முதல்வர் விஜய் மற்றும் இரண்டு அமைச்சர்களை விசாரிப்பது அவசியம் என்று குறிப்பிடப்பட்டுள்ளது. அவர்கள் கூறிய குற்றச்சாட்டுகளுக்கு ஆதாரம் உள்ளதா என்று கேட்கப்பட்டுள்ளது. பொய் குற்றச்சாட்டு என்றால் சம்பந்தப்பட்டோர் மீது உரிய பிரிவுகளின் கீழ் நடவடிக்கை எடுக்க வேண்டும் என்று வலியுறுத்தப்பட்டுள்ளது. 

இதையும் படிங்க: “அந்த 4 பேர் தமிழ்நாட்டை விக்கிறாங்க...” - ரெட்டி கேங்கை புட்டு புட்டு வைத்த அப்பாவு... தவெக அரசுக்கு ஆப்பு...!