நடப்பு நிதியாண்டில் ரிசர்வ் வங்கி (ஆர்பிஐ) வெளிச்சந்தையில் நிகரமாக ரூ.1 லட்சம் கோடி மதிப்பிலான அரசு பத்திரங்களை விற்றுள்ளது. இது கடந்த பத்து ஆண்டுகளில் மிகப்பெரிய அளவிலான நிகர விற்பனையாகும். வங்கி அமைப்பில் அதிகரித்துள்ள பணப்புழக்கத்தை கட்டுப்படுத்தும் நோக்கில் இந்த நடவடிக்கை மேற்கொள்ளப்பட்டுள்ளது.

சிறப்பு அமெரிக்க டாலர்-இந்திய ரூபாய் பரிமாற்ற வசதி மற்றும் வெளிநாட்டு இந்தியர்களின் அந்நிய செலாவணி வைப்புகள் (எஃப்சிஎன்ஆர் பி) மூலம் பெருமளவு டாலர் வருகை ஏற்பட்டது. இதனால் வங்கிகளுக்கு ரூபாய் பணப்புழக்கம் கணிசமாக உயர்ந்தது. ஒரு கட்டத்தில் அதிகப்படியான பணப்புழக்கம் ரூ.11 லட்சம் கோடியைத் தாண்டியது. இதனால் ஒருநாள் கடன் வட்டி விகிதம் ஆர்பிஐயின் கொள்கை ரெப்போ விகிதத்தை விட குறைந்து போனது. 

பணப்புழக்கத்தை சமநிலைப்படுத்தவும், குறுகியகால வட்டி விகிதங்களை கொள்கை விகிதத்துடன் இணைக்கவும் ஆர்பிஐ திறந்த சந்தை செயல்பாடுகள் (ஓஎம்ஓ) மூலம் அரசு பத்திரங்களை விற்கத் தொடங்கியது. செப்டம்பர் மாதத்தில் மட்டும் ரூ.1 லட்சம் கோடி மதிப்பிலான பத்திர விற்பனை திட்டம் அறிவிக்கப்பட்டது. மூன்று கட்டங்களாக ரூ.50,000 கோடி, ரூ.25,000 கோடி, ரூ.25,000 கோடி என விற்பனை நடைபெற்றது. இதனால் அதிகப்படியான பணப்புழக்கம் சுமார் 60 சதவீதம் குறைந்து ரூ.4.5 லட்சம் கோடி அளவுக்கு வந்தது. 

இதையும் படிங்க: ஹோம் லோன் முதல் பர்சனல் லோன் வரை.. கடன் வாங்கியவர்களுக்கு வரப்போகும் புதிய மாற்றம்! RBI-ன் அடுத்த அதிரடி!!

இதற்கு முன் 2018 நிதியாண்டில் பணமதிப்பு நீக்க நெருக்கடியை சமாளிக்க ரூ.90,000 கோடி நிகர விற்பனை செய்திருந்தது. தற்போதைய சாதனை அதை முறியடித்துள்ளது.மத்திய அரசு 3 ஆண்டு மற்றும் 5 ஆண்டு முதிர்ச்சி கொண்ட பத்திரங்களின் விற்பனை அளவை குறைத்தது. இதனால் ஆர்பிஐக்கு வெளிச்சந்தையில் அதிக அளவில் பத்திரங்களை விற்க வாய்ப்பு ஏற்பட்டது. 

ஆனந்த் ரதி குளோபல் பைனான்ஸ் நிறுவனத்தின் கருவூலப் பிரிவு தலைவர் ஹர்சிம்ரன் சஹ்னி கூறுகையில், அக்டோபர்-நவம்பர் மாதங்களில் மேலும் ரூ.1 லட்சம் கோடி முதல் ரூ.1.5 லட்சம் கோடி வரை பத்திர விற்பனை நடைபெறலாம் என்றார். பணப்புழக்கத்தை தொடர்ந்து குறைத்தால் குறுகியகால வட்டி விகிதங்கள் உயர வாய்ப்புள்ளது. 

அடுத்த வாரம் நடைபெறும் பணவியல் கொள்கைக் கூட்டத்தில் வட்டி விகிதம் உயர்த்தப்படலாம் என சந்தை எதிர்பார்க்கிறது. இந்த நடவடிக்கைகள் பணவீக்க அழுத்தத்தைக் கட்டுப்படுத்தவும், ரூபாயின் மதிப்பை நிலைநிறுத்தவும் உதவும் என நிபுணர்கள் கருதுகின்றனர்.
 

இதையும் படிங்க: ஹோம் லோன் முதல் பர்சனல் லோன் வரை.. கடன் வாங்கியவர்களுக்கு வரப்போகும் புதிய மாற்றம்! RBI-ன் அடுத்த அதிரடி!!