கள்ளக்குறிச்சி மாவட்டம் மணலூர்பேட்டையில் நடைபெற்ற ஆற்றுத் திருவிழாவின் போது, பலூன் ஊதப் பயன்படுத்தப்பட்ட கேஸ் சிலிண்டர் பயங்கர சத்தத்துடன் வெடித்ததில் ஒரு பெண் உட்பட மூன்று பேர் பரிதாபமாக உயிரிழந்தனர். இந்த விபத்தில் 10-க்கும் மேற்பட்டோர் உடல் உறுப்புகளை இழந்து படுகாயமடைந்த சம்பவம் அப்பகுதியையே உலுக்கியுள்ளது.

கள்ளக்குறிச்சி மாவட்டம் மணலூர்பேட்டையில் உள்ள தென்பெண்ணை ஆற்றங்கரையோரம் இன்று நடைபெற்ற ஆற்றுத் திருவிழா, எதிர்பாராத விதமாகப் பெரும் சோகத்தில் முடிந்தது. அங்குள்ள ஆஞ்சநேயர் கோயில் அருகே மக்கள் கூட்டம் அதிகமிருந்த பகுதியில், சிறுவர்களுக்காகப் பலூன் விற்பனை செய்த நபர் ஒருவர், சிலிண்டர் மூலம் பலூனில் எரிவாயு நிரப்பிக் கொண்டிருந்தார். அப்போது, யாரும் எதிர்பாராத விதமாக அந்தச் சிலிண்டர் திடீரென பயங்கர சத்தத்துடன் வெடித்துச் சிதறியது.

இந்தக் கோர விபத்தில் பலூன் வியாபாரி மற்றும் அருகில் நின்றிருந்தவர்கள் தூக்கி வீசப்பட்டனர். இதில் சம்பவ இடத்திலேயே ஒரு பெண் மற்றும் ஒரு இளைஞர் உள்ளிட்ட மூன்று பேர் உடல் சிதறி பரிதாபமாக உயிரிழந்தனர். மேலும், இந்த அதிர்ச்சிகரமான விபத்தில் இரண்டு பேருக்குக் கைகள் துண்டிக்கப்பட்டு ரத்த வெள்ளத்தில் உயிருக்கு ஊசலாடிக் கொண்டிருந்தனர். திருவிழாவிற்கு வந்திருந்த சிறுவர்கள் உள்ளிட்ட 10-க்கும் மேற்பட்டோர் படுகாயமடைந்தனர். விபத்து நடந்த இடமெங்கும் ரத்தக் கறைகளும், அலறல் சத்தமும் கேட்டு அப்பகுதியே போர்க்களம் போலக் காட்சியளித்தது.

இதையும் படிங்க: 2 மாவட்டங்களில் டைரக்ட் விசிட்... திட்ட பணிகளை தொடங்கி வைக்கும் முதல்வர் ஸ்டாலின்...!

தகவலறிந்த மணலூர்பேட்டை போலீசார் மற்றும் தீயணைப்புத் துறையினர் சம்பவ இடத்திற்கு விரைந்து வந்து, காயமடைந்தவர்களை மீட்டு ஆம்புலன்ஸ் மூலம் கள்ளக்குறிச்சி அரசு மருத்துவமனைக்கு அனுப்பி வைத்தனர். உயிரிழந்தவர்களின் உடல்கள் பிரேதப் பரிசோதனைக்காக அனுப்பி வைக்கப்பட்டுள்ளன. இந்த விபத்து குறித்து மணலூர்பேட்டை போலீசார் வழக்குப் பதிவு செய்து, தரமற்ற சிலிண்டர் பயன்படுத்தப்பட்டதா அல்லது வேறு ஏதேனும் கவனக்குறைவு காரணமா என்பது குறித்துத் தீவிர விசாரணை மேற்கொண்டு வருகின்றனர். மகிழ்ச்சியாகக் கொண்டாடப்பட வேண்டிய திருவிழா, இப்படி ஒரு கோரச் சம்பவத்தால் முடிந்தது மணலூர்பேட்டை மக்களிடையே பெரும் சோகத்தை ஏற்படுத்தியுள்ளது.

இதையும் படிங்க: சிப்காட் ஆய்வு முதல் கலைஞர் சிலை திறப்பு வரை - முதல்வர் ஸ்டாலின் கள்ளக்குறிச்சி, திருவண்ணாமலை பயணம்!