காவிரி ஆற்றின் குறுக்கே கர்நாடக அரசு தன்னிச்சையாகவும் சட்டவிரோதமாகவும் மேகதாது அணையைக் கட்ட மேற்கொண்டு வரும் தொடர் முயற்சிகளை முற்றிலுமாகத் தடுத்து நிறுத்த வலியுறுத்தித் தமிழ்நாடு முழுவதும் நடத்தத் திட்டமிடப்பட்டுள்ள மாபெரும் விழிப்புணர்வுப் பிரச்சாரப் பயணத்திற்கு முழு ஆதரவு கோரி, தமிழ்நாடு காங்கிரஸ் கமிட்டியின் மாநிலத் தலைவர் மாணிக்கம் தாகூரைத் தமிழக அனைத்து விவசாயிகள் சங்கங்களின் ஒருங்கிணைப்புக் குழுத் தலைவரும் தமிழக காவிரி விவசாயிகள் சங்கத்தின் பொதுச்செயலாளருமான பி.ஆர்.பாண்டியன் நேரில் சந்தித்துப் பேச்சுவார்த்தை நடத்தியுள்ளார்.

காவிரி டெல்டா மாவட்டங்களின் ஜீவாதார உரிமையைப் பறிக்கும் வகையில், மேகதாதுவில் புதிய அணையைக் கட்டியே தீருவோம் என கர்நாடக அரசு தீவிர முனைப்பு காட்டி வருகிறது. இதற்குத் தமிழகத்தில் உள்ள ஒட்டுமொத்த அரசியல் கட்சிகளும், விவசாய அமைப்புகளும் மிகக் கடுமையான எதிர்ப்பைப் பதிவு செய்து வருகின்றன. இந்நிலையில், கர்நாடக அரசின் இந்த அத்துமீறலை உச்ச நீதிமன்றத் தீர்ப்புகளின் அடிப்படையில் தடுத்து நிறுத்தவும், மத்திய அரசு எவ்வித அனுமதியும் வழங்கக் கூடாது என்பதை வலியுறுத்தியும் தமிழகம் தழுவிய விழிப்புணர்வு மற்றும் போராட்டப் பிரச்சாரப் பயணத்தைத் தமிழக காவிரி விவசாயிகள் சங்கம் முன்னெடுத்துள்ளது.

இந்தப் பிரச்சாரப் பயணத்திற்கான ஆதரவைத் திரட்டும் விதமாக, சென்னை சத்தியமூர்த்தி பவனில் தமிழ்நாடு காங்கிரஸ் கமிட்டியின் தலைவர் மாணிக்கம் தாகூரை விவசாயப் பிரதிநிதிகள் குழுவுடன் சென்று பி.ஆர்.பாண்டியன் நேரில் சந்தித்தார். அப்போது, காவிரி நதிநீர் பங்கீட்டுப் பிரச்சினையில் தமிழக விவசாயிகளுக்கு இழைக்கப்படும் அநீதிகள் மற்றும் மேகதாது அணை கட்டப்பட்டால் டெல்டா மாவட்டங்கள் பாலைவனமாக மாறும் அபாயம் குறித்து விரிவாக எடுத்துரைத்தார்.

இதையும் படிங்க: மேகதாது அணையால் 2 மாநிலங்களும் பயன் பெறலாம்.. விஜய்க்கு முன்பே சொன்ன டி.கே சிவக்குமார்!!

குறிப்பாக, அண்டை மாநிலமான கர்நாடகாவில் காங்கிரஸ் கட்சியின் ஆட்சி நடைபெற்று வருவதைச் சுட்டிக்காட்டிய விவசாயப் பிரதிநிதிகள், அம்மாநில காங்கிரஸ் அரசிடம் அகில இந்திய காங்கிரஸ் மேலிடமும் தமிழ்நாடு காங்கிரஸ் தலைமையும் மிக வலுவான அழுத்தம் கொடுத்து மேகதாது அணை திட்டத்தைக் கைவிடச் செய்ய வேண்டும் என வலியுறுத்தினர். மேலும், தமிழக விவசாயிகளின் உரிமைகளைக் காக்கும் நோக்கில் முன்னெடுக்கப்படவுள்ள பிரச்சாரப் பயணத்திற்குத் தமிழ்நாடு காங்கிரஸ் கட்சியின் முழுமையான கள ஆதரவையும் பங்களிப்பையும் வழங்க வேண்டும் என்றும் பி.ஆர்.பாண்டியன் கோரிக்கை விடுத்தார். இக்கோரிக்கைகளை மிகக் கவனமாகக் கேட்டறிந்த மாணிக்கம் தாகூர், தமிழக விவசாயிகளின் வாழ்வாதார நலனிலும் காவிரி நதிநீர் உரிமையிலும் காங்கிரஸ் கட்சி எப்போதும் உறுதுணையாக நிற்கும் என உறுதியளித்தார்.

இதையும் படிங்க: மேகதாது அணை விவகாரம்.. கர்நாடகத்தின் அடுத்தகட்ட அதிரடி.. திருத்தப்பட்ட திட்ட அறிக்கை தாக்கல்!