பள்ளிக்கூடங்களின் 100 மீட்டர் சுற்றளவுக்குள் எந்தவொரு புகையிலைப் பொருட்களோ அல்லது போதை வஸ்துகளோ விற்பனை செய்யக் கூடாது என்று மாவட்ட ஆய்வுக் கூட்டத்தில் அதிகாரிகளுக்கு ஏற்கனவே உத்தரவிட்டிருந்தேன்; ஆனால், திண்டுக்கல் மாவட்டத்தில் பல இடங்களில் தடை செய்யப்பட்ட போதைப்பொருட்கள் இன்னும் விற்பனை செய்யப்பட்டு வருவதன் மூலம் அதிகாரிகள் அமைச்சரின் உத்தரவைக் காற்றில் பறக்கவிட்டுள்ளனர்" என்று தமிழக மதுவிலக்கு மற்றும் ஆயத்தீர்வை அமைச்சர் விக்னேஷ் அவர்கள் பகிரங்கமாகக் குற்றம் சாட்டியுள்ளார்.

திண்டுக்கல் மாவட்டம் ஆத்தூர் சட்டமன்றத் தொகுதிக்கு உட்பட்ட ரெட்டியார்சத்திரத்தில், தமிழக வெற்றிக் கழகத்தின் புதிய கட்சி அலுவலகத்தை இன்று அமைச்சர் விக்னேஷ் அவர்கள் விமர்சையாகத் திறந்து வைத்தார். இதனைத் தொடர்ந்து செய்தியாளர்களைச் சந்தித்த அவர், மாவட்டத்தின் பல்வேறு வளர்ச்சித் திட்டங்கள், டாஸ்மாக் குளறுபடிகள் மற்றும் தொழிலாளர் நல விபரங்களை முன்வைத்துத் தனது அதிரடியான வாதங்களைப் பகிர்ந்து கொண்டார். பள்ளிகள் அருகே போதைப்பொருள் புழக்கம் நிலவுவது குறித்த கேள்விக்கு பதிலளித்த அவர், "இந்த வாரம் நடைபெறவுள்ள மாவட்ட ஆய்வுக் கூட்டத்தில் இது குறித்து அதிகாரிகளிடம் மீண்டும் மிகக் கடுமையான முறையில் வலியுறுத்தப்படும். விதிகளை மீறிப் புகையிலைப் பொருட்களை விற்கும் கடைகளுக்குச் சீல் வைக்க உடனடியாக நடவடிக்கை எடுக்கப்படும். அதேநேரம், வாழ்வாதாரம் பாதிக்கப்படும் என்று கூறி கடைகாரர்கள் இதற்கு எதிர்ப்பு தெரிவிக்காமல், முழுமையான ஒத்துழைப்பு அளிக்க வேண்டும்" என்று கேட்டுக்கொண்டார்.

தொடர்ந்து, திண்டுக்கல்லில் அமையவுள்ள புதிய புறநகர்ப் பேருந்து நிலைய இடத்தில் தோல் கழிவுகள் கொட்டப்படுவதால் எழுந்துள்ள சர்ச்சை குறித்துப் பேசுகையில், "தமிழக வெற்றிக் கழகத்தைப் பொறுத்தவரை ஒரு திட்டம் கொண்டு வரப்படுகிறது என்றால், அதனால் மக்களுக்குக் கிடைக்கும் பயன்பாட்டை விடப் பாதிப்புகள் அதிகமாக இருக்கக் கூடாது என்பதில் உறுதியாக உள்ளது. அந்த இடம் சரியாக வராது என்று சில தரப்பினர் என்னிடமும் தெரிவித்துள்ளனர். ஏற்கனவே கொட்டப்பட்டுள்ள தோல் கழிவுகளை அகற்றுவது, மண் வளம் பாதிக்கப்பட்டுள்ளது குறித்த ஆய்வு, சாலை வசதிகள் மற்றும் உள்கட்டமைப்புச் சாத்தியக்கூறுகள் குறித்து அடுத்த வாரம் நான் நேரடியாக அந்த இடத்திற்குச் சென்று மறுஆய்வுக் கூட்டம் நடத்தவுள்ளேன். மக்களின் தேவைகளை உணர்ந்து எந்தவொரு திட்டமாக இருந்தாலும் காலதாமதமின்றி உடனடியாகச் செயல்படுத்தப்படும்" என்று உறுதியளித்தார்.

இதையும் படிங்க: நாளை சொந்த தொகுதி செல்கிறார் முதல்வர் விஜய்!! ‘மக்கள் சேவை தளம்’ செயலி அறிமுகம்! 3 நாளில் தீர்வு உறுதி!

டாஸ்மாக் கடைகள் மற்றும் பார்களில் கூடுதல் கட்டணம் வசூலிக்கப்படுவது குறித்த கேள்விக்கு பதிலளித்த அமைச்சர், "நான் அமைச்சராகப் பொறுப்பேற்றுத் தற்போது சுமார் 55 நாட்களே ஆகிறது. அதற்குள் பத்திரிகையாளர்களே ஓரளவுக்குக் கூடுதல் கட்டணம் குறைந்துள்ளதாகக் கூறும் சூழலை உருவாக்கியதே எங்களுக்குக் கிடைத்த மிகப்பெரிய வெற்றிதான். தமிழ்நாடு முழுவதும் எந்தவொரு டாஸ்மாக் கடையிலும் எம்.ஆர்.பி (MRP) விலைக்கு மேல் மதுபானங்களை விற்கக் கூடாது என்பதில் அரசு மிக உறுதியாக உள்ளது. கூடிய விரைவில் இதில் முழுமையான வெற்றி கிடைத்த பிறகு, FL2, FL3 பார்கள் மற்றும் பிற மதுபான விற்பனை இடங்கள் அனைத்தும் கடுமையான கட்டுப்பாட்டுக்குள் கொண்டு வரப்படும் என்றார்.

மேலும், தொழிலாளர்களின் போராட்டங்கள் மற்றும் பணி நிரந்தரம் குறித்த விபரங்களைப் பகிர்ந்த அவர், "தொழிலாளர்கள் கடந்த 20 ஆண்டுகளாகக் காத்துக்கொண்டிருந்த இ.எஸ்.ஐ (ESI) மருத்துவக் காப்பீட்டு வசதியை, மாண்புமிகு தமிழக முதலமைச்சர் அவர்கள் உடனடியாக வழங்க உத்தரவிட்டுள்ளார். அரசு இந்தத் துறையைச் சீரமைத்துவிட்டால் தங்களுடைய பெயர் வளராது என்ற எண்ணத்தில், சில எதிர்க்கட்சிகள் தொழிலாளர்களைத் தூண்டிவிட்டுத் தவறான வழியில் கொண்டு செல்ல முயல்கின்றனர். போராட்டத்தில் ஈடுபடுபவர்கள் இத்தகைய அரசியல் சூழ்ச்சிகளுக்குப் பலியாக வேண்டாம். தவெக அரசு முதன்முறையாக ஆட்சிக்கு வந்த பிறகு, ஊழியர்களின் கோரிக்கையைக் கனிவோடு பரிசீலித்து அவர்களின் ஊதியத்தை 3,500 ரூபாயிலிருந்து 5,000 ரூபாய் வரை உயர்த்தி வழங்கியுள்ளது. பணி நிரந்தரம் செய்வது என்பது மாநிலத்தின் தற்போதைய நிதிநிலை மற்றும் வெள்ளை அறிக்கையின் பொருளாதாரச் சூழலைச் சார்ந்தது என்பதால், அதற்கான தகுந்த சூழல் அமையும் போது அது முழுமையாகச் செயல்படுத்தப்படும், அதுவரை ஊழியர்கள் சற்றுப் பொறுமையாக இருக்க வேண்டும் என்று தனது விளக்க உரையை நிறைவு செய்தார்.

இதையும் படிங்க: துரோகம் பண்ண என்ன இருக்கு?! திமுக இத பண்ணலையே! திருமாவளவன் பரபரப்பு விளக்கம்!!