சேலம் மாவட்டம் ஓமலூரில் நடைபெற்ற திமுக செயல்வீரர்கள் கூட்டத்தில் பங்கேற்ற உயர்கல்வித் துறை அமைச்சர் கோவி. செழியன், வரும் 2026 சட்டமன்றத் தேர்தல் குறித்து மிக ஆவேசமாகப் பேசி அரசியல் வட்டாரத்தில் பெரும் பரபரப்பை ஏற்படுத்தியுள்ளார். அதிமுக பொதுச்செயலாளர் எடப்பாடி பழனிசாமியின் சொந்த மாவட்டமான சேலத்தில், அவரது செல்வாக்கு மிக்கப் பகுதியிலேயே அமைச்சர் இந்தச் சவாலை விடுத்துள்ளார்.

கூட்டத்தில் தொண்டர்களிடையே உரையாற்றிய அமைச்சர் கோவி. செழியன், எதிர்க்கட்சிகளின் வியூகங்களைத் தகர்க்கும் வகையில் பின்வருமாறு முழங்கினார். ஆயிரம் மோடி வந்தாலும், ஆயிரம் அமித் ஷா வந்தாலும், ஏன் ஓராயிரம் எடப்பாடி பழனிசாமி ஒன்றிணைந்து வந்தாலும், ஓமலூரில் உதயசூரியன் சின்னத்தின் வெற்றியை யாராலும் தடுக்க முடியாது எனத் தெரிவித்தார்.

இதையும் படிங்க: அண்ணாவின் 57-வது நினைவு நாள்: முதல்வர் மு.க. ஸ்டாலின் தலைமையில் சென்னையில் அமைதிப் பேரணி!

மக்களின் ஆதரவு திமுக பக்கம் உள்ளது. வரும் தேர்தலில் உதயசூரியன் சின்னம் ஓமலூர் தொகுதியில் வெற்றி பெற்றேத் தீரும்" என்று அவர் உறுதிபடக் கூறினார். முதல்வர் மு.க. ஸ்டாலின் அவர்களின் சாதனைத் திட்டங்களே இந்த வெற்றியைத் தேடித்தரும் என்றும், அதிமுக-பாஜக கூட்டணியின் பலம் தமிழகத்தில் எடுபடாது என்றும் அவர் தனது உரையில் குறிப்பிட்டார்.

எடப்பாடி பழனிசாமியின் பலமாகத் திகழும் ஓமலூர் மற்றும் சுற்றுவட்டாரப் பகுதிகளில் திமுக தனது தீவிரப் பிரசாரத்தை இப்போதே தொடங்கியுள்ளது. அமைச்சரின் இந்த அதிரடிப் பேச்சு, வரவிருக்கும் 2026 தேர்தலில் சேலம் மாவட்டத்தில் திமுக மற்றும் அதிமுக இடையே நிலவப்போகும் கடும் போட்டியை இப்போதே பறைசாற்றுகிறது.

இதையும் படிங்க: 2026-ல் திமுக ஒண்ணுமே இல்லாமல் போகும்! பட்ஜெட்டை விமர்சித்த முதல்வருக்கு நைனார் நாகேந்திரன் பதிலடி!