தமிழகத்தின் முக்கிய மலைவாசஸ்தலங்களான ஊட்டி, கொடைக்கானல், ஏற்காடு பகுதிகளில் தொடர்ந்து பெய்து வரும் கனமழையால் சுற்றுலாப் பயணிகள் பயணம் மேற்கொள்வதைத் தவிர்க்குமாறு மாவட்ட நிர்வாகங்கள் அறிவுறுத்தியுள்ளன. நிலச்சரிவு அபாயம் மற்றும் சாலைப் போக்குவரத்து பாதிப்புகள் காரணமாக முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன.

நீலகிரி மாவட்டத்தில் பெய்து வரும் அதீத கனமழையால் பல்வேறு இடங்களில் நிலச்சரிவுகள் ஏற்பட்டுள்ளன. பர்லியாறு பகுதியில் ஏற்பட்ட நிலச்சரிவில் அரசு பேருந்து சிக்கியதில் அதன் ஓட்டுநர் உயிரிழந்தார். குன்னூர்–மேட்டுப்பாளையம் மலைப்பாதையில் பல இடங்களிலும், கோத்தகிரி மலைப்பாதையிலும் மண் சரிவுகள் ஏற்பட்டதால் போக்குவரத்து பாதிக்கப்பட்டுள்ளது.

நீலகிரி மாவட்டத்திற்கு விடுக்கப்பட்ட கனமழை எச்சரிக்கையைத் தொடர்ந்து, மாவட்ட ஆட்சியர் லட்சுமி பவ்யா தண்ணீரு, அடுத்த மூன்று நாட்களுக்கு சுற்றுலாப் பயணிகள் நீலகிரிக்கு வருவதைத் தவிர்க்குமாறு கேட்டுக்கொண்டுள்ளார். மாவட்டத்தில் உள்ள சுற்றுலாத் தலங்கள் மறு அறிவிப்பு வரும் வரை மூடப்பட்டுள்ளன. மேலும், மலைப்பாதைகளில் இரவு நேரப் போக்குவரத்துக்கும் கட்டுப்பாடுகள் விதிக்கப்பட்டுள்ளன.

இதையும் படிங்க: நீலகிரியில் கனமழை எச்சரிக்கை! வாகனப் போக்குவரத்துக்குத் தடை! கலெக்டர் லட்சுமி பவ்யா விடுத்த அலர்ட் மெசேஜ்!

இதற்கிடையே, திண்டுக்கல் மாவட்டத்திற்கும் அதி கனமழைக்கான சிவப்பு எச்சரிக்கை விடுக்கப்பட்டுள்ளது. கொடைக்கானல் மலைப்பகுதியில் பல இடங்களில் நிலச்சரிவு ஏற்பட்டு, சில சாலைகள் சேதமடைந்துள்ளன.

இதனால் கொடைக்கானலில் உள்ள முக்கிய சுற்றுலாத் தலங்கள் மூடப்பட்டுள்ளன. சுற்றுலாப் பயணிகள் மலைப்பாதையில் பயணம் செய்வதைத் தவிர்த்து, பாதுகாப்பான இடங்களில் இருக்குமாறு மாவட்ட ஆட்சியர் துர்கா மூர்த்தி அறிவுறுத்தியுள்ளார்.

சேலம் மாவட்டத்தின் ஏற்காடு மலைப்பகுதியிலும் தொடர் கனமழை பெய்து வருவதால், அங்கு சுற்றுலா செல்வதைத் தவிர்க்குமாறு மாவட்ட நிர்வாகம் அறிவுறுத்தியுள்ளது. மலைப்பகுதிகளில் மண் சரிவு, மரங்கள் விழுதல் மற்றும் சாலைப் பாதிப்புகள் ஏற்படக்கூடும் என்பதால் பொதுமக்கள் எச்சரிக்கையுடன் இருக்குமாறு கேட்டுக்கொள்ளப்பட்டுள்ளனர்.

எனவே, ஊட்டி, கொடைக்கானல், ஏற்காடு செல்லத் திட்டமிட்டுள்ளவர்கள் பயணத்தை ஒத்திவைத்து, சம்பந்தப்பட்ட மாவட்ட நிர்வாகங்களின் அதிகாரப்பூர்வ அறிவிப்புகளைப் பின்பற்றுமாறு அறிவுறுத்தப்படுகின்றனர்.

இதையும் படிங்க: உதகை மண்சரிவில் ஓட்டுநர் பலி!! அதிர்ஷ்டவசமாக உயிர்த் தப்பிய 50 பயணிகள்! நடத்துனரின் அதிர்ச்சி வாக்குமூலம்!