தமிழகத்தில் ஆட்சி மாறினாலும் சட்டம் ஒழுங்கு காட்சிகள் மாறவில்லை என்றும், காவல்துறை தற்போது சரியான மேய்ப்பன் இல்லாமல் தறிகெட்டு ஓடுகிறதோ என்ற சந்தேகம் மக்கள் மனதில் எழுந்துள்ளதாகவும் அதிமுக பொதுச்செயலாளர் திரு. எடப்பாடி பழனிசாமி (EPS) விமர்சித்துள்ளார். படப்பையில் நடைபெற்ற அதிர்ச்சிகரமான இரட்டைக் கொலைச் சம்பவத்தைச் சுட்டிக்காட்டி, தற்போதைய தமிழக வெற்றிக் கழக (TVK) அரசை அவர் கடுமையாகச் சாடியுள்ளார்.

காஞ்சிபுரம் மாவட்டம் படப்பை அருகே இரண்டு இளைஞர்கள் போதை ஆசாமிகளால் கொடூரமான முறையில் வெட்டிக்கொலை செய்யப்பட்ட சம்பவம் தமிழகம் முழுவதும் பெரும் அதிர்வலைகளை ஏற்படுத்தியுள்ளது. இந்த பயங்கரக் குற்றச் சம்பவம், மாநிலத்தில் சட்டம் ஒழுங்கு (Law and Order) சீர்குலைந்துள்ளதைக் காட்டுவதாக எதிர்க்கட்சிகள் தொடர்ந்து குற்றம் சாட்டி வருகின்றன. இந்தச் சம்பவத்தைக் கையில் எடுத்துள்ள அதிமுக, தவெக அரசுக்கு எதிராகத் தனது கண்டனக் குரலைப் பதிவு செய்துள்ளது.

படப்பை விவகாரம் குறித்து அறிக்கை வெளியிட்டுள்ள முன்னாள் முதல்வர் எடப்பாடி பழனிசாமி, மாநிலத்தில் ஆட்சி மாறினாலும், சட்டம் ஒழுங்கு காட்சிகள் மாறவே இல்லை. காவல்துறை தற்போது சரியான மேய்ப்பன் இல்லாமல் தறிகெட்டு ஓடுகிறதோ என்ற பலத்த சந்தேகம் ஒட்டுமொத்த மக்கள் மனதிலும் எழுந்துள்ளது. பொதுமக்களின் உயிருக்கும் உடைமைக்கும் பாதுகாப்பு இல்லாத சூழலே நிலவுகிறது என்று குற்றம் சாட்டியுள்ளார்.

இதையும் படிங்க: #BREAKING: முதலமைச்சராக பதவியேற்க புறப்பட்டார் விஜய்! வழிநெடுகிலும் திரண்ட தொண்டர்கள்...! சென்னையில் பலத்த பாதுகாப்பு!

தமிழக வெற்றிக் கழகத்தின் தலைமையிலான தற்போதைய அரசை "பொய்க்கால் குதிரை அரசு" என்று எடப்பாடி பழனிசாமி கடுமையாக விவரித்துள்ளார். வெறும் விளம்பரங்களை மட்டுமே நம்பி இந்த அரசு இயங்குவதாகவும், களத்தில் குற்றங்களைத் தடுக்க எவ்வித உருப்படியான நடவடிக்கைகளும் எடுக்கப்படவில்லை என்றும் சாடியுள்ளார். மேலும், மாநிலத்தில் பெருகி வரும் போதைப்பொருள் புழக்கமே இத்தகைய கொடூரக் கொலைகளுக்கு அடிப்படைக் காரணம் என்றும் அவர் சுட்டிக்காட்டியுள்ளார்.

அதிமுக பொதுச்செயலாளர் எடப்பாடி பழனிசாமி விடுத்துள்ள கோரிக்கையில் இரண்டு இளைஞர்களைக் கொடூரமாக வெட்டிக்கொன்றுள்ள போதை ஆசாமிகளைத் தனிப்படைகள் அமைத்து காவல்துறை உடனடியாகக் கண்டுபிடிக்க வேண்டும். பிடிபடும் குற்றவாளிகளுக்குச் சட்டத்தின் முன் கடுமையான தணடனை பெற்றுத்தர அரசு விரைந்து நடவடிக்கை எடுக்க வேண்டும். போதைப்பொருள் நடமாட்டத்தை இரும்புக்கரம் கொண்டு ஒடுக்கி, சட்டம் ஒழுங்கை நிலைநாட்ட வேண்டும்.

இதையும் படிங்க: ஆட்சி தவறான பாதைக்கு சென்றால் ஆதரவு வாபஸ்! தவெக-விற்கு விசிக எச்சரிக்கை!