புதுடெல்லி: இந்தியாவுடன் மோதத் துணியும் பயங்கரவாதிகளுக்கு தகுந்த பதிலடி நிச்சயம் அளிக்கப்படும் என்று பிரதமர் நரேந்திர மோடி திட்டவட்டமாக தெரிவித்துள்ளார். 2026 செப்டம்பர் 27-ஆம் தேதி ஒளிபரப்பான ‘மன் கி பாத்’ நிகழ்ச்சியில் பேசிய அவர், சர்ஜிக்கல் ஸ்டிரைக், பாலக்கோட் தாக்குதல் மற்றும் ஆபரேஷன் சிந்தூர் ஆகியவற்றை குறிப்பிட்டு இந்தியாவின் பயங்கரவாத எதிர்ப்பு நிலைப்பாட்டை விளக்கினார்.

2016-ம் ஆண்டு நடைபெற்ற சர்ஜிக்கல் ஸ்டிரைக்கின் 10-வது ஆண்டு நிறைவு நெருங்கி வருவதாக குறிப்பிட்ட மோடி, அந்த நடவடிக்கை இந்தியாவின் பயங்கரவாத எதிர்ப்பு அணுகுமுறையில் முக்கியமான முன்னுதாரணமாக அமைந்ததாக கூறினார். எல்லைக் கட்டுப்பாட்டு கோட்டை கடந்து இந்திய ராணுவ வீரர்கள் மேற்கொண்ட அந்த நடவடிக்கை உலகளவில் கவனத்தை பெற்றதாகவும் அவர் தெரிவித்தார்.

பாலக்கோட் தாக்குதல் முதல் ஆபரேஷன் சிந்தூர் வரையிலான நடவடிக்கைகள் மூலம் இந்தியா ஒரு தெளிவான செய்தியை தொடர்ந்து வெளிப்படுத்தி வருவதாக பிரதமர் கூறினார். இந்தியாவுக்கு எதிராக பயங்கரவாத நடவடிக்கைகளில் ஈடுபடுபவர்களுக்கு உறுதியான பதில் அளிக்கப்படும் என்பதே அந்த செய்தி என அவர் குறிப்பிட்டார்.

இதையும் படிங்க: வளர்ந்த இந்தியாவின் முதுகெலும்பு இளைஞர்கள்! பிரதமர் மோடி சொன்ன முக்கிய தகவல்!

மேலும், 9/11 பயங்கரவாத தாக்குதலின் 25-வது ஆண்டு நினைவையும் மோடி தனது உரையில் குறிப்பிட்டார். அந்த தாக்குதலில் உயிரிழந்தவர்களுக்கு இரங்கல் தெரிவித்த அவர், பயங்கரவாதத்துக்கு எதிரான சர்வதேச முயற்சிகளுக்கு இந்தியாவின் ஆதரவு தொடரும் என்றார். இதற்கு முன்பாகவும் 9/11 தாக்குதலின் 25-வது ஆண்டு நினைவு நாளில் உயிரிழந்தவர்களின் குடும்பங்களுக்கு பிரதமர் இரங்கல் தெரிவித்திருந்தார்.

தொடர்ந்து, மக்கள் தொகை கணக்கெடுப்பு, போதைப்பொருள் ஒழிப்பு உள்ளிட்ட பல்வேறு சமூகப் பிரச்சினைகள் குறித்தும் பிரதமர் பேசினார். இளைஞர்கள் போதைப்பொருளுக்கு எதிராக விழிப்புணர்வு நடவடிக்கைகளில் ஈடுபட்டு வருவதாக அவர் பாராட்டினார்.

இந்தியாவின் வரலாறு மற்றும் பாரம்பரியம் குறித்தும் பிரதமர் விரிவாக பேசினார். சோமநாதர் கோயில் மற்றும் குஜராத்தின் மொதேரா சூரியக் கோயில் தொடர்பான வரலாற்று நிகழ்வுகளை அவர் நினைவுகூர்ந்தார்.

இதனுடன் தமிழகத்தின் திருச்சி மாவட்டம் மணப்பாறையில் பழமையான சிலைகள் மற்றும் கோயில்களை கண்டறியும் பணியில் ஈடுபட்டு வரும் தமிழ்த் துறை பேராசிரியர் செல்வராஜின் முயற்சியையும் மோடி பாராட்டினார். மாணவர் ஒருவரிடம் கிடைத்த தகவலை தொடர்ந்து கள ஆய்வு மேற்கொண்டு பல பழமையான சிற்பங்களை கண்டறிந்த அவரது முயற்சி, பாரம்பரியத்தை அடுத்த தலைமுறையுடன் இணைக்கும் பணியாக இருப்பதாக பிரதமர் குறிப்பிட்டார்.

இதையும் படிங்க: 12 ஆண்டுகளில் நகரம்-கிராமம் இடைவெளி குறைந்தது! ‘சேவா யாத்ரா’ பங்கேற்பாளர்களிடம் பிரதமர் மோடி நெகிழ்ச்சி!