அரசியல் விமர்சகரும், மறைந்த முன்னாள் ஜனாதிபதி ஏ.பி.ஜெ. அப்துல் கலாமின் முன்னாள் ஆலோசகருமான டாக்டர் வி. பொன்ராஜ் மீது தமிழக வெற்றிக் கழகம் தொடர்பான சர்ச்சைக்குரிய பேச்சு காரணமாக இரண்டு வழக்குகள் பதிவு செய்யப்பட்டன. இந்த வழக்குகளை ரத்து செய்யக் கோரி அவர் சென்னை உயர் நீதிமன்றத்தில் தாக்கல் செய்த மனுக்கள் தள்ளுபடி செய்யப்பட்டுள்ள நிலையில், இந்த விவகாரம் தமிழக அரசியல் களத்தில் குறிப்பிடத்தக்க கவனத்தை ஈர்த்துள்ளது. 

2026 மார்ச் மாதம், ஒரு யூடியூப் சேனலுக்கு அளித்த பேட்டியில் பொன்ராஜ் த.வெ.கவின் பெண் தொண்டர்கள் மற்றும் நிர்வாகிகளை இழிவுபடுத்தும் வகையில் பேசியதாகக் குற்றச்சாட்டு எழுந்தது. அந்தப் பேட்டியில், கட்சியின் பெண் ஆதரவாளர்களைப் பற்றி ஆபாசமான மற்றும் அவதூறான கருத்துக்களைத் தெரிவித்ததாக புகார்கள் வந்தன. இதைத் தொடர்ந்து, த.வெ.க தலைவரும் தமிழக முதலமைச்சருமான விஜய் உள்ளிட்டோர் புகார் அளித்தனர். கடலூர் த.வெ.க எம்.எல்.ஏ ராஜ்குமார் உள்ளிட்டோரின் புகாரின் அடிப்படையில் கடலூர் புதுநகர் காவல் நிலையம் மற்றும் சென்னை மத்திய குற்றப்பிரிவு ஆகிய இடங்களில் தனித்தனியாக வழக்குகள் பதிவு செய்யப்பட்டன. 

இந்த வழக்குகளில் பொன்ராஜ் மீது பெண்களுக்கு எதிரான வன்கொடுமை தடுப்புச் சட்டம் உள்ளிட்ட பல்வேறு சட்டப்பிரிவுகளின் கீழ் குற்றச்சாட்டுகள் பதிவு செய்யப்பட்டன. ஒரே சம்பவத்துக்காக இரு இடங்களில் வழக்கு பதிவு செய்யப்பட்டது அரசியல் காழ்ப்புணர்ச்சி காரணமானது என்றும், புதிய அரசு பொறுப்பேற்ற பிறகு நடவடிக்கை எடுக்கப்பட்டது என்றும் பொன்ராஜ் தரப்பு வாதிட்டது. 

இதையும் படிங்க: "மூக்கில் ரத்தம்... உடல் முழுக்க காயம்..! சபரி வர்மனின் போஸ்ட் மார்ட்டம் ரிப்போர்ட்... அதிர்ச்சி தகவல்கள்..!!

வழக்குகளில் கைது நடவடிக்கைக்கு அஞ்சி பொன்ராஜ் சென்னை உயர் நீதிமன்றத்தில் முன்ஜாமீன் மனு தாக்கல் செய்தார். நீதிபதி ஆர். சக்திவேல் முன்பு விசாரணைக்கு வந்த இந்த மனுவில், அரசியல் விமர்சகர்கள் பொறுப்புடன் பேச வேண்டும் என்று நீதிமன்றம் அறிவுறுத்திய நிலையில், நிபந்தனைகளுடன் முன்ஜாமீன் வழங்கப்பட்டது. பின்னர், இந்த இரு வழக்குகளையும் ரத்து செய்யக் கோரி பொன்ராஜ் சென்னை உயர் நீதிமன்றத்தில் மனுக்கள் தாக்கல் செய்தார். அந்த மனுவை நீதிபதி தள்ளுபடி செய்துள்ளார். 

இதையும் படிங்க: நெல்லை இரட்டை கொலையில் அதிரடி திருப்பம்..! சகோதரரே பணம் கொடுத்த அதிர்ச்சி..! வைரலாகும் ஆடியோ.!