தமிழ்நாட்டின் பழமையான வரலாற்றை பிரதிபலிக்கும் வகையில், திருநெல்வேலி மாவட்டத்தில் ரெட்டியார்பட்டி மலையடிவாரத்தில் அமைக்கப்பட்டுள்ள பொருநை அருங்காட்சியகத்தை முதலமைச்சர் மு.க ஸ்டாலின் கடந்த சனிக்கிழமை (டிசம்பர் 21) திறந்து வைத்தார். இந்நிலையில் இன்று முதல் பொதுமக்களுக்கு அனுமதி வழங்கப்பட்டுள்ளது.

இந்த அருங்காட்சியகம், தமிழ் நாகரிகத்தின் ஆழமான வேர்களை வெளிப்படுத்தும் முக்கியமான மைல்கல்லாக பார்க்கப்படுகிறது. இந்த அருங்காட்சியகம் 13 ஏக்கர் பரப்பளவில் ரூ.56.36 கோடி செலவில் கட்டப்பட்டுள்ளது. பழங்கால தமிழர்களின் வாழ்க்கை முறை, ஆதிச்சநல்லூர் மற்றும் சிவகளை தொல்லியல் அகழாய்வுகளில் கண்டெடுக்கப்பட்ட பொருட்களை இங்கு காட்சிப்படுத்தப்பட்டுள்ளன.

முதலமைச்சர் ஸ்டாலின் திறப்பு விழாவில் பேசுகையில், "பொருநை அருங்காட்சியகம் தமிழ் நாகரிகத்தை ஆவணப்படுத்தும் அடுத்த கட்டமாகும். மத்திய அரசு தமிழகத்தின் தொல்லியல் அகழாய்வுகளை தடுப்பதாக" குற்றம்சாட்டினார். மேலும், பாஜக அரசு தமிழ் வரலாற்றை புறக்கணிப்பதாகவும் விமர்சித்தார்.

இதையும் படிங்க: பெண்களுக்கு FREE... பொருநை அருங்காட்சியகத்திற்கு நாளை முதல் பேருந்து சேவை... போக்குவரத்து கழகம் அறிவிப்பு...!

இந்த அருங்காட்சியகத்தில், தமிழர்களின் பழங்கால பொருட்கள், பானை ஓடுகள், உலோக கருவிகள், மண்பாண்டங்கள் உள்ளிட்ட 18,000-க்கும் மேற்பட்ட தொல்லியல் பொருட்கள் காட்சிக்கு வைக்கப்பட்டுள்ளன. ஆதிச்சநல்லூரில் கண்டெடுக்கப்பட்ட 3,000 ஆண்டுகளுக்கு முந்தைய எலும்புக்கூடுகள் மற்றும் சிவகளையில் கிடைத்த பொருட்கள் இங்கு முக்கிய இடம் பெறுகின்றன. இவை தமிழ் நாகரிகத்தின் தொன்மையை உலகுக்கு எடுத்துக்காட்டும் வகையில் வடிவமைக்கப்பட்டுள்ளன.

திறப்பு விழாவில், முதலமைச்சர் ஸ்டாலின் அருங்காட்சியகத்தை சுற்றிப்பார்த்து, புகைப்படங்கள் எடுத்துக்கொண்டார். இந்த நிகழ்ச்சியில் அமைச்சர்கள், அதிகாரிகள் மற்றும் உள்ளூர் பிரமுகர்கள் பங்கேற்றனர். "தமிழக அரசு தொல்லியல் துறையை வலுப்படுத்தி, சிவகலை போன்ற இடங்களில் அகழாய்வுகளை மேற்கொண்டுள்ளது" என்று ஸ்டாலின் கூறினார். மேலும், மத்திய அரசின் தடைகளை மீறி, தமிழ் வரலாற்றை பாதுகாக்கும் முயற்சிகள் தொடரும் என உறுதியளித்தார்.

இந்த பொருநை அருங்காட்சியகத்தைப் பார்வையிட பொதுமக்களுக்கு இன்று முதல் அனுமதி வழங்கப்பட்டுள்ள நிலையில், அருங்காட்சியகம் காலை 10 மணி முதல் இரவு 7 மணி வரை திறந்திருக்கும். நுழைவுக்கட்டணமாக பெரியவர்களுக்கு ரூ.30, சிறியவர்களுக்கு ரூ.10, பள்ளி மாணவர்களுக்கு ரூ.5 என நிர்ணயிக்கப்பட்டுள்ளது. புகைப்படம் எடுக்க அனுமதி உண்டு, ஆனால் ஃபிளாஷ் பயன்படுத்த தடை விதிக்கப்பட்டுள்ளது. மேலும் பொருநை அருங்காட்சியகத்திற்கு செல்ல நெல்லையில் இருந்து சிறப்பு பேருந்துகள் ஏற்பாடு செய்யப்பட்டுள்ளன.

இந்த அருங்காட்சியகம் தமிழகத்தின் சுற்றுலாவை ஊக்குவிக்கும் என எதிர்பார்க்கப்படுகிறது. திருநெல்வேலி மாவட்டத்தில் உள்ள இந்த இடம், வரலாற்று ஆர்வலர்கள், மாணவர்கள் மற்றும் சுற்றுலாப் பயணிகளுக்கு ஈர்க்கும் வகையில் அமைந்துள்ளது. தமிழக அரசின் இத்தகைய முயற்சிகள், இளைஞர்களிடம் வரலாற்று உணர்வை வளர்க்கும் என நிபுணர்கள் கருத்து தெரிவித்துள்ளனர்.

மேலும், பொருநை அருங்காட்சியகம் தமிழர்களின் பாரம்பரியத்தை உலக அரங்கில் கொண்டு செல்லும் என்பதால், இது தமிழ்நாட்டின் கலாச்சார பெருமையை உயர்த்தும். இன்று முதல் பார்வையிட வரும் பொதுமக்கள், தமிழ் நாகரிகத்தின் பழமையை நேரில் கண்டு மகிழலாம். 
 

இதையும் படிங்க: முதலமைச்சர் ஸ்டாலின் நெல்லை பயணம்: 65 கோடியில் பொருநை அருங்காட்சியகம் திறப்பு விழா!