புதுக்கோட்டை மாவட்டம் இலுப்பூர் அருகே அமைந்துள்ள ராப்பூசல் கிராமத்தில் இயங்கி வந்த பட்டாசு உற்பத்தி ஆலையில் திடீரென ஏற்பட்ட சக்திவாய்ந்த வெடி விபத்து அப்பகுதியில் பெரும் பரபரப்பையும் ஆழ்ந்த சோகத்தையும் உண்டாக்கியுள்ளது. வழக்கம்போல் ஆலைத் தொழிலாளர்கள் தங்கள் பணியில் ஈடுபட்டிருந்த வேளையில் எதிர்பாராதவிதமாக உராய்வு காரணமாகவோ அல்லது வேதிப் பொருட்களின் கசிவு காரணமாகவோ பயங்கர வெடி விபத்து நிகழ்ந்தது.

இந்த வெடிச்சத்தம் பல கிலோமீட்டர் தூரம் வரை எதிரொலித்ததால் சுற்றியுள்ள கிராமங்களில் வசிக்கும் மக்கள் அதிர்ச்சியடைந்து அலறி அடித்துக்கொண்டு வீடுகளை விட்டு வெளியேறினர். ஆலையின் சில பகுதிகள் இந்த விபத்தில் பலத்த சேதமடைந்தன.விபத்தின் போது ஆலையில் பணியாற்றிக் கொண்டிருந்த கீரனூர் பகுதியைச் சேர்ந்த இருபது வயதான இளைஞர் சூரியகுமார் வெடி விபத்தின் வீரியத்தைத் தாங்க முடியாமல் சம்பவ இடத்திலேயே பரிதாபமாக உயிரிழந்தார்.

விபத்து நடந்தவுடன் அருகில் இருந்த கிராம மக்கள் உடனடியாகச் சம்பவ இடத்திற்கு விரைந்தனர். தகவல் அறிந்த தீயணைப்பு மற்றும் மீட்புப் படையினர் துரிதமாக வந்து மேலும் தீ பரவாமல் அணைத்து நிலைமையைக் கட்டுக்குள் கொண்டு வந்தனர். உயிரிழந்த இளைஞரின் உடல் பிரேதப் பரிசோதனைக்காக அரசு மருத்துவமனைக்கு அனுப்பி வைக்கப்பட்டது.புதுக்கோட்டை மாவட்ட காவல் துறை அதிகாரிகளும் வருவாய்த் துறை அலுவலர்களும் சம்பவ இடத்திற்கு நேரில் சென்று ஆய்வு மேற்கொண்டனர்.

இதையும் படிங்க: தென்காசியில் பட்டாசு ஆலைகள்?... உயர் நீதிமன்ற மதுரைக்கிளை பிறப்பித்த பரபரப்பு உத்தரவு

இலுப்பூர் மற்றும் கீரனூர் காவல் நிலையத்தினர் இந்த வெடி விபத்து குறித்து வழக்குப் பதிவு செய்து தீவிர விசாரணையைத் தொடங்கியுள்ளனர். பட்டாசு ஆலைக்கு முறையான உரிமம் உள்ளதா, போதிய பாதுகாப்பு உபகரணங்கள் வழங்கப்பட்டிருந்தனவா, விதிகளின்படி இரசாயனங்கள் கையாளப்பட்டனவா அல்லது அளவுக்கு அதிகமான வெடிப்பொருட்கள் சேமித்து வைக்கப்பட்டிருந்தனவா என்பன குறித்து அதிகாரிகள் விரிவாக விசாரணை நடத்தி வருகின்றனர்.

இதையும் படிங்க: #BREAKING விடிந்ததுமே பயங்கரம்... ஆம்னி பேருந்து மீது அதிவேகமாக மோதிய கார்... 3 பேர் உடல் நசுங்கி பலி... 4 பேரின் நிலை என்ன?