வடகிழக்குப் பருவமழை தமிழகம் முழுவதும் தீவிரமடைந்து வரும் நிலையில், பெய்யும் ஒவ்வொரு துளி மழைநீரையும் வீணடிக்காமல் நிலத்தடி நீராக மாற்றும் தொலைநோக்குத் திட்டத்துடன், தமிழ்நாடு குடிநீர் வடிகால் வாரியம் (TWAD) சார்பில் முன்னெடுக்கப்பட்டுள்ள மாநிலம் தழுவிய மழைநீர் சேகரிப்பு விழிப்புணர்வு பிரச்சாரத்தை முதலமைச்சர் ஜோசப் விஜய் இன்று அதிகாரப்பூர்வமாகத் தொடங்கி வைத்தார்.

இதன் தொடக்கமாக, சென்னை சேப்பாக்கத்தில் உள்ள தமிழ்நாடு குடிநீர் வடிகால் வாரிய தலைமை அலுவலக வாயிலில் நிறுவப்பட்டுள்ள மழைநீர் சேமிப்பு விழிப்புணர்வுக்கான அதிகாரப்பூர்வ 'துளி' இலச்சினையை (Logo) முதலமைச்சர் விஜய் முறைப்படி திறந்து வைத்து அறிமுகப்படுத்தினார். அதனைத் தொடர்ந்து, பொதுமக்கள் தங்கள் வீடுகளில் மிகக் குறைந்த செலவில் மழைநீர் சேகரிப்பு அமைப்பை எளிதாக நிறுவுவதற்கு வழிகாட்டும் வகையில், எழிலகம் வளாகத்தில் TWAD வாரியத்தால் சுமார் 800 சதுர அடியில் அமைக்கப்பட்டிருந்த நவீன மாதிரி இல்லத்தை அவர் நேரில் பார்வையிட்டுத் திறந்து வைத்தார். 

வீட்டின் மொட்டை மாடியில் விழும் மழைநீரைச் சேகரிக்கும் பிரத்யேகக் குழாய் இணைப்பு, மணல், ஜல்லி மற்றும் வலைகளால் ஆன மூன்று அடுக்கு நவீன வடிகட்டி அமைப்பு மற்றும் சுத்திகரிக்கப்பட்ட நீரை ஆழ்துளைக் கிணறு வழியாக நிலத்தடிக்குச் செலுத்தும் செறிவூட்டல் தொழில்நுட்பங்கள் ஆகியவற்றின் செயல்பாடுகளை அவர் நேரில் ஆய்வு செய்தார்.   

இதையும் படிங்க: “பொய்யிலே பிறந்து... பொய்யிலே வளர்ந்த...” - எம்.ஜி.ஆர். பாடலை சுட்டிக்காட்டி விஜய் அரசை விளாசிய ஆர்.பி.உதயகுமார்...!

இதனைத் தொடர்ந்து அங்குத் திரண்டிருந்த பொதுமக்களைச் சந்தித்துக் கையசைத்து வாழ்த்துக்களைப் பெற்ற முதலமைச்சர், அடுத்தகட்டமாக மெரினா கடற்கரை சர்வீஸ் சாலையில் அமைக்கப்பட்டிருந்த 28 அடி உயர பிரம்மாண்ட எல்.இ.டி திரையில் பொதுமக்கள் எளிதில் புரிந்துகொள்ளும் வகையில் உருவாக்கப்பட்ட மழைநீர் சேகரிப்பு விழிப்புணர்வு சிறப்புக் காணொளியை வெளியிட்டார். 

பின்னர் பேசிய அவர், "ஒவ்வொரு துளி நீரும் - நம் எதிர்காலம்" என்ற கருப்பொருளில் இந்த மெகா விழிப்புணர்வு இயக்கம் மாநிலம் முழுவதும் தீவிரமாக முன்னெடுக்கப்படும் என்று தெரிவித்தார். மேலும், தமிழகத்தில் உள்ள அனைத்து அரசு அலுவலகங்கள், பள்ளிகள் மற்றும் கல்லூரிகளில் மழைநீர் சேகரிப்புக் கட்டமைப்பு கட்டாயமாக்கப்படும் என்றும், புதிய வீடுகளுக்கான வரைபடத்தில் மழைநீர் சேகரிப்பு அமைப்பைச் சேர்ப்போருக்குத் தமிழக அரசின் சார்பில் சிறப்பு மானியம் வழங்கப்படும் என்றும், இதனை வீடுகளில் அமைக்க விரும்புவோருக்கு குடிநீர் வடிகால் வாரியம் மூலம் முழுமையான இலவச தொழில்நுட்ப ஆலோசனைகள் வழங்கப்படும் என்றும் உறுதியளித்தார்.

இதையும் படிங்க: “உடனே இதை செய்யுங்க...” - அமைச்சர்களை முகத்திற்கு நேராக பார்த்து சி.எம்.விஜய் அதிரடி உத்தரவு...!