நாம் தமிழர் கட்சியின் தலைமை ஒருங்கிணைப்பாளர் சீமான் அம்பாசமுத்திரம் தொகுதி இடைத்தேர்தலில் போட்டியிட உள்ளதாக உறுதியாகத் தெரிவித்துள்ளார். அதே நேரத்தில் பொது வேட்பாளராக நிற்பது குறித்து இன்னும் எந்த முடிவும் எடுக்கப்படவில்லை என்றும் அவர் தெளிவுபடுத்தியுள்ளார். இந்த விவகாரம் தமிழக அரசியல் வட்டாரங்களில் பெரும் பரபரப்பை ஏற்படுத்தியுள்ளது.சமீபத்தில் நடைபெற்ற சட்டமன்றத் தேர்தலில் அதிமுக சார்பில் அம்பாசமுத்திரம் தொகுதியில் வெற்றி பெற்ற இசக்கி சுப்பையா, பின்னர் தனது பதவியை ராஜினாமா செய்து தமிழக வெற்றிக் கழகத்தில் இணைந்தார்.

இதனால் தொகுதி காலியானது. இடைத்தேர்தல் அறிவிப்பு விரைவில் வெளியாகும் என எதிர்பார்க்கப்படும் நிலையில், சீமான் தனது போட்டியை உறுதி செய்தார். அவர் ஐந்து தொகுதி இடைத்தேர்தல்களிலும் நாம் தமிழர் கட்சி போட்டியிடும் என்றும் அறிவித்தார்.பொது வேட்பாளர் பேச்சு எழுந்த பின்னணியில் சீமான் விளக்கம் அளித்தார். “அம்பாசமுத்திரம் தொகுதியில் நான் பொது வேட்பாளராக நிற்பது குறித்து நானோ திமுகவோ அதிமுகவோ எந்த முடிவும் எடுக்கவில்லை. பொது வேட்பாளர் என கிளப்பிவிட்டது தவெகவினர்தான். நான் அம்பாசமுத்திரத்தில் போட்டியிடுவேன் என்பதில் உறுதியாக உள்ளேன். நான் சட்டமன்றம் செல்ல வேண்டும் என்று பலர் விரும்புகின்றனர்.

அதனால் மக்களுக்காகத்தான் போட்டியிடுகிறேன்,” என்றார் அவர்.திமுக மற்றும் அதிமுக ஆதரவு குறித்த கேள்விக்கு சீமான் பதிலளித்தார். “திமுக, அதிமுக ஆதரவு கொடுத்தால் வேண்டாம் என எப்படி கூறுவேன்? பசியோடு இருப்பவன் பிரியாணி வேண்டாம் என்பானா? அவர்கள் பெருந்தன்மையுடன் என்னை ஆதரித்தால் ஏற்பேன். இது கூட்டணி அல்ல. அரசியல் கொள்கை நிலைப்பாடு வேறு. தேர்தல் அறிவிப்பு நேரத்தில் ஆதரவு குறித்து முடிவெடுக்கலாம்,” என்று தெரிவித்தார்.மேலும் அவர், “ஒருமுறை சட்டப்பேரவைக்கு என்னை அனுப்பிப் பாருங்கள். அங்கு எப்படி வேலை செய்ய வேண்டும் என்று காட்டுவேன். அம்பாசமுத்திரம் தொகுதியை தலைசிறந்த தொகுதியாக மாற்றுவேன். எனக்கு ஒரு கனவும் இலக்கும் உள்ளது. அம்பாசமுத்திரத்தில் தவெகவும் நாம் தமிழர் கட்சியும் போட்டியிடட்டும். அண்ணனா தம்பியா என்று தெரிந்துவிடும்,” என்று கூறினார்.

இதையும் படிங்க: அம்பாசமுத்திரம் இடைத்தேர்தலில் களம் காணும் சீமான்!! திமுக ஆதரவா? மு.க.ஸ்டாலின் பதில்?!

இதற்கிடையே திமுக தலைவர் மு.க. ஸ்டாலின் இதுகுறித்து கேட்கப்பட்டபோது, “முதலில் தேர்தல் தேதி அறிவிக்கட்டும். அதன்பிறகு முடிவெடுப்போம்,” என்று பதிலளித்தார். இதனால் இரு பெரும் கட்சிகளும் இன்னும் தங்கள் நிலைப்பாட்டை உறுதிப்படுத்தவில்லை.அம்பாசமுத்திரம் தொகுதி தற்போது தமிழக அரசியலின் கவனத்தை ஈர்த்துள்ளது. நாம் தமிழர் கட்சி பல ஆண்டுகளாக தனித்துப் போட்டியிட்டு வருகிறது. சீமானின் இந்த அறிவிப்பு மற்றும் அவரது ஆதரவு தொடர்பான கருத்துகள், வரவிருக்கும் இடைத்தேர்தல் களத்தில் புதிய பரிமாணத்தை உருவாக்கும் என அரசியல் ஆர்வலர்கள் கருதுகின்றனர்.

இதையும் படிங்க: ஈழத் தமிழர்களை நாடு கடத்துவதா.? இனவெறிக்கு ஆளாக்குவதா.? சீமான் சரமாரி கேள்வி..!!