ரயில்களில் செல்போனில் அதிக சத்தத்துடன் பாட்டு கேட்பதும், சத்தமாகப் பேசுவதும் இனி எளிதான விஷயமல்ல. தெற்கு ரயில்வே இது தொடர்பாக கடும் எச்சரிக்கை விடுத்துள்ளது. ரயில் நிலையங்கள் மற்றும் ரயில்களில் மொபைல்போனில் ஹெட்போன் பயன்படுத்தாமல் அதிக சத்தத்துடன் பாடல்களைக் கேட்பது, வீடியோக்களைப் பார்ப்பது அல்லது உரத்த குரலில் பேசுவது போன்ற செயல்களால் சக பயணிகளுக்குத் தொல்லை ஏற்படுத்தினால், ரூ.1,000 அபராதம் அல்லது ஆறு மாதங்கள் சிறைத்தண்டனை அல்லது இரண்டும் சேர்த்து விதிக்கப்படும் என அனைத்து கோட்டங்களுக்கும் உத்தரவு பிறப்பிக்கப்பட்டுள்ளது.

இந்த நடவடிக்கை, ரயில்வே சட்டம் 1989-ன் பிரிவு 145(2)-ன் கீழ் எடுக்கப்படுகிறது. சமீபத்திய திருத்தங்களின்படி, பொதுமக்களுக்கு இடையூறு விளைவிக்கும் செயல்களுக்கு இந்தத் தண்டனைகள் பொருந்தும். டிக்கெட் பரிசோதகர் அல்லது அதற்கு மேற்பட்ட அதிகாரம் கொண்ட வணிகப் பிரிவு அலுவலர்கள் இந்த அபராதத்தை வசூலிக்கலாம். மேலும், அத்தகைய பயணியின் டிக்கெட்டை ரத்து செய்து ரயிலில் இருந்து வெளியேற்றவும் அதிகாரம் உண்டு.எச்சரிக்கையை மீறி தொடர்ந்து தொந்தரவு அளித்தால், அபராதம் ரூ.5,000 வரை உயரலாம் அல்லது ஆறு மாதங்கள் வரை சிறைத்தண்டனை விதிக்கப்படலாம்.

இரவு 10 மணி முதல் காலை 6 மணி வரை ரயில்களில் சத்தமாகப் பேசுவது, பாட்டு கேட்பது அல்லது வீடியோ பார்ப்பது முற்றிலும் தவிர்க்கப்பட வேண்டும் என்றும் வலியுறுத்தப்பட்டுள்ளது.அதிவேக மொபைல் இணைய வசதி பெருகியதால், பலர் ஸ்பீக்கர் மோடில் பாடல்களையும் வீடியோக்களையும் இயக்கி சக பயணிகளுக்கு அசௌகரியத்தை ஏற்படுத்துகின்றனர். குறிப்பாக ஏசி பெட்டிகள் போன்ற மூடிய இடங்களில் இது மிகவும் தொல்லை தரும். இதைத் தடுக்கும் வகையில், ரயில் நிலையங்களிலும் ரயில்களிலும் பிராந்திய மொழிகள், இந்தி மற்றும் ஆங்கிலத்தில் விழிப்புணர்வு அறிவிப்புகள் ஒலிக்கப்படும். பயணிகள் ஹெட்போன் அல்லது இயர்போன் பயன்படுத்தி பாடல்களைக் கேட்கவும், தொலைபேசியில் பேசும்போது குறைந்த சத்தத்தில் பேசவும் அறிவுறுத்தப்படுகின்றனர்.

இதையும் படிங்க: காந்தி ஜெயந்தி தொடர் விடுமுறை: சொந்த ஊர் செல்வோருக்கு தெற்கு ரயில்வே சிறப்பு ரயில்கள் அறிவிப்பு!

இந்த விதியை மீறுபவர்கள் மீது உடனடி நடவடிக்கை எடுக்கப்படும். சக பயணிகள் தொல்லைக்கு உள்ளானால், ரயில்வே ஊழியர்களிடமோ அல்லது டிக்கெட் பரிசோதகரிடமோ புகார் அளிக்கலாம். ரயில் பயணம் அனைவருக்கும் வசதியானதாகவும் அமைதியானதாகவும் இருக்க வேண்டும் என்பதே இந்த எச்சரிக்கையின் நோக்கம். பயணிகள் ஒத்துழைத்து, பிறருக்கு இடையூறு ஏற்படுத்தாத வகையில் செல்போனைப் பயன்படுத்தினால், பயணம் இனிமையாக அமையும். தெற்கு ரயில்வே இந்த விதிகளை கண்டிப்புடன் அமல்படுத்தும் எனத் தெரிவித்துள்ளது.

இதையும் படிங்க: துணிச்சலாக செயல்பட்டு 6 உயிர்களைக் காத்த RPF வீரர்கள்: தெற்கு ரயில்வே ஐ.ஜி. அருள் ஜோதி பாராட்டு!