தமிழ்நாட்டில் இளநிலை பி.இ, பி.டெக் மற்றும் பி.ஆர்க் ஆகிய பொறியியல் படிப்புகளுக்கான ஆன்லைன் கலந்தாய்வில் பங்கேற்கும் பெற்றோர்கள் மற்றும் மாணவர்கள், போதிய விழிப்புணர்வு இல்லாத காரணத்தால் போலி விளம்பரங்களை நம்பித் தரமற்ற கல்லூரிகளைத் தேர்வு செய்து ஏமாறுவதைத் தடுக்கத் தமிழ்நாடு பொறியியல் மாணவர் சேர்க்கைக் குழு தற்பொழுது ஒரு புதிய அதிரடி வசதியை இணையதளத்தில் அறிமுகம் செய்துள்ளது.

இளநிலை பொறியியல் படிப்புகளில் சேர்வதற்கான ஆன்லைன் கலந்தாய்வு (Online Counselling) தற்பொழுது முழு வீச்சில் நடைபெற்று வரும் வேளையில், போதிய கட்டமைப்பு வசதிகள் மற்றும் பேராசிரியர்கள் இல்லாத கல்லூரிகளை மாணவர்கள் தேர்வு செய்வதைத் தடுத்து, 100 விழுக்காடு தரமான கல்லூரிகளை அடையாளம் காண இந்த டிஜிட்டல் வசதி வழிவகை செய்கிறது. ஆன்லைன் மூலம் நடத்தப்படும் கலந்தாய்வில் போதிய வழிகாட்டுதல் இல்லாததால், கட்-ஆஃப் மதிப்பெண் 190-க்கு மேல் எடுத்த திறமையான மாணவர்கள் கூட, தரமற்ற கல்லூரிகளைத் தேர்வு செய்து தங்களது எதிர்காலத்தை இழக்கும் அவல நிலை நீடித்து வந்தது. மேலும், தமிழகத்தில் பல பொறியியல் கல்லூரிகளின் பெயர்கள் ஒரே மாதிரி (Similar Names) இருப்பதால், எதைத் தேர்ந்தெடுப்பது என்ற குழப்பத்தில் மாணவர்கள் தவறான கல்லூரிகளைத் தேர்வு செய்து விடுகின்றனர்.

இனி இத்தகைய குளறுபடிகளுக்கு முற்றுப்புள்ளி வைக்கும் வகையில், அதிகாரப்பூர்வமாக https://cutoff.tneaonline.org/ என்ற பிரத்யேக இணையப்பக்கம் தற்பொழுது பொதுமக்களின் பயன்பாட்டிற்காகத் திறந்து விடப்பட்டுள்ளது. இந்த இணையதளத்தில், கடந்த 2021-ஆம் ஆண்டு முதல் 2025-ஆம் ஆண்டு வரையிலான கடந்த 5 ஆண்டுகளில், ஒவ்வொரு கல்லூரியிலும் உள்ள ஒவ்வொரு குறிப்பிட்ட பாடப்பிரிவிலும் (Departments) மாணவர்கள் சேருவதற்காக நிர்ணயிக்கப்பட்ட கட்-ஆஃப் மதிப்பெண் விவரங்கள் மற்றும் அண்ணா பல்கலைக்கழகத்தால் கடந்த ஆண்டு அனுமதிக்கப்பட்ட இடங்களில் எத்தனை இடங்கள் நிரம்பின என்ற அசல் சேர்க்கை விவரங்கள் (Admission Statistics) சமூக வாரியான இட ஒதுக்கீட்டின்படி (Community-wise Reservation) மிகத் துல்லியமாகப் பதிவேற்றம் செய்யப்பட்டுள்ளன.

இதையும் படிங்க: தமிழ்நாடே குற்ற பூமியாக மாறிவிட்டது! தவெக அரசை எச்சரித்த அதிமுக முன்னாள் அமைச்சர் ஆர்.பி.உதயகுமார்!

மாணவர்கள் இந்த இணையப் பக்கத்திற்குச் சென்று 'Cutoff Calculator' என்ற பகுதியைக் கிளிக் செய்து, தங்களது கட்-ஆஃப் மதிப்பெண், தரவரிசை எண் (Rank Number), குறிப்பிட்ட ஆண்டு மற்றும் தங்களது இட ஒதுக்கீட்டுப் பிரிவைத் தேர்வு செய்தால் போதும். உடனே, அந்த குறிப்பிட்ட கல்லூரியின் அந்தப் பிரிவில் சேர்ந்த மாணவனின் அதிகபட்ச மற்றும் குறைந்தபட்ச கட்-ஆஃப் மதிப்பெண், கடந்த ஆண்டுகளில் அங்குப் படித்து வரும் மாணவர்களின் மொத்த எண்ணிக்கை உள்ளிட்ட ஒட்டுமொத்த ஜாதகமும் ஸ்கிரீனில் வந்துவிடும். மிகக் குறைவான மாணவர்கள் சேர்ந்த கல்லூரிகளில் போதிய ஆசிரியர்கள் இருக்க மாட்டார்கள் என்பதால், கடந்த கால மாணவர் சேர்க்கை எண்ணிக்கையை வைத்தே அக்கல்லூரியின் தரத்தை மாணவர்கள் எளிதாக மதிப்பிட முடியும். மேலும், பெயர்க் குழப்பத்தைத் தவிர்க்கக் கல்லூரிகளின் அசல் இருப்பிடம் மற்றும் முழுமையான முகவரியும் இதில் சேர்க்கப்பட்டுள்ளது. பொறியியல் சேர்க்கைக் குழுவின் இந்த அதிரடி விழிப்புணர்வு வசதி, நடப்பாண்டு கலந்தாய்வில் பங்கேற்கும் இலட்சக்கணக்கான மாணவர்களுக்கும், பெற்றோர்களுக்கும் ஒரு பெரும் வரப்பிரசாதமாக அமைந்துள்ளது.

இதையும் படிங்க: பத்திரிகைகளின் யூகங்களுக்கு பதிலளிக்க முடியாது! 3-வது நாளாக ஆதரவாளர்களுடன் சி.விஜயபாஸ்கர் ஆலோசனை!