தமிழ்நாடு அரசியல் களத்தில் புதிய திருப்பம் ஏற்பட்டுள்ளது. தமிழ்நாடு கொங்கு இளைஞர் பேரவை தலைவர் தனியரசு, அதிமுக பொதுச் செயலாளர் எடப்பாடி கே. பழனிசாமியை சந்தித்து ஆலோசனை நடத்தியுள்ளார். 2026 சட்டமன்றத் தேர்தல் அருகில் வரும் வேளையில், கூட்டணி உருவாக்கம் தொடர்பான பேச்சுவார்த்தைகள் தீவிரமடைந்துள்ள நிலையில் இந்த சந்திப்பு நிகழ்ந்துள்ளது. இது அரசியல் வட்டாரங்களில் பெரும் அலசல்களை ஏற்படுத்தியுள்ளது.

கடந்த நவம்பரில், திமுக தலைவரும் முதலமைச்சருமான மு.க. ஸ்டாலினை சந்தித்த தனியரசு, சட்டமன்றத் தேர்தலில் திமுக கூட்டணியில் இணைவது குறித்து விவாதித்திருந்தார். அந்த சந்திப்புக்குப் பிறகு, திமுக ஆட்சியின் சாதனைகளை பாராட்டியும், பாஜகவுக்கு எதிரான ஜனநாயகப் போராட்டத்தில் திமுகவின் பங்கை வலியுறுத்தியும் அவர் பேசியிருந்தார். "திமுக கூட்டணியில் இல்லாவிட்டாலும், அதன் திட்டங்களை ஆதரித்து வருகிறோம். எதிர்காலத்தில் திமுகவுடன் இணைந்து செயல்படுவது குறித்து விவாதித்தோம்" என்று தனியரசு அப்போது தெரிவித்திருந்தார்.

இதையும் படிங்க: எடப்பாடி ஒரு காபி பேஸ்ட் எக்ஸ்பர்ட்! எடப்பாடியின் ரூ.2000 அறிவிப்பை வறுத்தெடுத்த அமைச்சர் ரகுபதி!!

ஆனால், இப்போது ஏற்பட்டுள்ள திடீர் மாற்றம் அனைவரையும் ஆச்சரியத்தில் ஆழ்த்தியுள்ளது. சென்னை பசுமை வழிச்சாலையில் உள்ள எடப்பாடி பழனிசாமியின் இல்லத்தில் நடைபெற்ற இந்த சந்திப்பு, கூட்டணி விவகாரம் தொடர்பானதாக இருக்கலாம் என ஊகங்கள் எழுந்துள்ளன. முன்னதாக, அதிமுகவை கடுமையாக விமர்சித்திருந்த தனியரசு, "அதிமுக 10 ஆண்டுகள் நம்முடன் கூட்டணியில் இருந்தது. ஆனால், இப்போது பாஜகவின் கிளை அமைப்பாக மாறிவிட்டது. ஜெயலலிதா மறைவுக்குப் பின், பழனிசாமி தலைமையில் அதிமுக சரிவைச் சந்தித்து வருகிறது. குறிப்பாக மேற்கு மாவட்டங்களில் அதன் வலிமை குறைந்துள்ளது" என்று கூறியிருந்தார்.

இந்த சந்திப்பின் பின்னணியில், பிரதமர் நரேந்திர மோடியின் தமிழக வருகை முக்கியமானதாகக் கருதப்படுகிறது. வரும் ஜனவரி 23-ம் தேதி, செங்கல்பட்டு மாவட்டம் மதுராந்தகத்தில் நடைபெறும் பொதுக் கூட்டத்தில் மோடி பங்கேற்கவுள்ளார். இதில் தேசிய ஜனநாயகக் கூட்டணி (என்.டி.ஏ) கட்சிகளின் தலைவர்கள் இணைந்து மேடையேற உள்ளனர். கூட்டணியை உறுதிப்படுத்த பாஜக தீவிரமாகச் செயல்பட்டு வருகிறது. இதற்கிடையே தனியரசுவின் இந்த நகர்வு, அதிமுக-பாஜக கூட்டணியில் பேரவை இணையுமா என கேள்விகளை எழுப்பியுள்ளது.

தனியரசுவின் அரசியல் பயணத்தைப் பார்க்கையில், 2011 சட்டமன்றத் தேர்தலில் அதிமுக கூட்டணியில் நாமக்கல் மாவட்டம் பரமத்தி வேலூர் தொகுதியில் போட்டியிட்டு வென்றார். 2016-ல் காங்கேயம் தொகுதியில் மீண்டும் வெற்றி பெற்று எம்.எல்.ஏ. ஆனார். கொங்கு மண்டலத்தில் செல்வாக்கு மிக்க தலைவரான அவர், இப்போது எந்த திசையில் நகர்வார் என்பது தேர்தல் களத்தின் முக்கிய திருப்பமாக இருக்கும்.

இந்த சந்திப்பு, தமிழக அரசியலில் கூட்டணி உருவாக்கத்தின் வேகத்தை அதிகரித்துள்ளது. திமுகவுடன் நெருக்கமாக இருந்த தனியரசு, அதிமுகவுடன் இணைவதன் மூலம் கொங்கு பகுதி வாக்குகளை பழனிசாமிக்கு சேர்க்கலாம் என கணிக்கப்படுகிறது. ஆனால், இது உறுதியானதா என்பது விரைவில் தெரியவரும்.

இதையும் படிங்க: "சிந்தையில் ஒன்றுமில்லை!" எடப்பாடி பழனிசாமியின் வாக்குறுதிகளை கிண்டல் செய்த சேகர் பாபு!