தமிழ்நாட்டின் தலைநகராக பல தசாப்தங்களாக சென்னை விளங்கி வரும் நிலையில், திருச்சிராப்பள்ளியை இரண்டாவது தலைநகராக அறிவிக்க வேண்டும் என்ற நீண்டகால கோரிக்கை மீண்டும் தீவிரமடைந்துள்ளது. தலைமைச் செயலக வட்டாரங்களில் இது தொடர்பான ஆய்வு நடைபெற்று வருவதாகவும், விரைவில் அதிகாரப்பூர்வ அறிவிப்பு வெளியாகலாம் என்றும் பேசப்படுகிறது.

பிரிட்டிஷ் ஆட்சிக் காலத்தில் மெட்ராஸ் மாகாணத் தலைநகராக உருவான சென்னை, சுதந்திரத்திற்குப் பிறகும் தமிழ்நாட்டின் நிர்வாக மையமாகத் தொடர்கிறது. துறைமுகம், சர்வதேச விமான நிலையம், பரந்த அரசு அலுவலகங்கள் மற்றும் பொருளாதார வாய்ப்புகள் காரணமாக இது இயற்கையான தேர்வாக இருந்தது. 

ஆனால் மாநிலத்தின் வடகிழக்கு மூலையில் அமைந்திருப்பதால், கன்னியாகுமரி, தூத்துக்குடி, திருநெல்வேலி உள்ளிட்ட தென் மாவட்ட மக்கள் அரசு சேவைகளுக்காக நூற்றுக்கணக்கான கிலோமீட்டர் பயணிக்க வேண்டிய நிலை தொடர்கிறது. இதனால் நிர்வாக அணுகல் சமநிலையற்றதாக உள்ளது என்ற குற்றச்சாட்டு நீண்ட காலமாக எழுகிறது.

இதையும் படிங்க: விஜய் போட்டியிட்ட இடத்தில் நானா?... திருச்சி கிழக்கில் களமிறங்குவது குறித்து திருமா. கொடுத்த விளக்கம்...!

முன்னாள் முதல்வர் எம்.ஜி.ஆர். ஆட்சிக் காலத்திலேயே திருச்சியை இரண்டாவது தலைநகராக்கும் திட்டம் பரிசீலிக்கப்பட்டது. ஆனால் பல்வேறு காரணங்களால் அது நிறைவேறவில்லை. அவரது கனவு என்று இப்போதும் சுட்டிக்காட்டப்படும் இந்தக் கோரிக்கை, ஒவ்வொரு ஆட்சியிலும் எழுந்து பின்னர் அடங்கிப்போவது வழக்கம். 

தற்போது முதல்வர் ஜோசப் விஜய் தலைமையிலான அரசு ஆட்சியில், மதிமுக தலைவர் துரை வைகோ உள்ளிட்டோர் தொடர்ந்து வலியுறுத்தி வருகின்றனர். மாநிலத்தின் புவியியல் மையப்பகுதியாக திருச்சி அமைந்திருப்பதால், பெரும்பாலான மாவட்டங்களிலிருந்து மூன்று முதல் ஐந்து மணி நேரத்தில் அணுக முடியும் என்பது முக்கிய வாதமாக முன்வைக்கப்படுகிறது.

திருச்சி விமான நிலையம், தேசிய நெடுஞ்சாலைகள், மேம்படுத்தப்படும் ரயில் இணைப்புகள் (சென்னை-திருச்சி பாதையில் 130 கிமீ வேகத் திட்டம் உட்பட) ஆகியவை ஏற்கனவே உள்ளன. இதனால் கூடுதல் உள்கட்டமைப்புச் செலவு குறையும். சென்னையின் போக்குவரத்து நெரிசல், ரியல் எஸ்டேட் விலை உயர்வு ஆகியவற்றைக் குறைத்து, நிர்வாகத்தைப் பரவலாக்கும். 

மத்திய மற்றும் தென் மாவட்டங்களின் வளர்ச்சிக்கு உதவும் என்றும் எதிர்பார்க்கப்படுகிறது. ஆந்திரப் பிரதேசம், மகாராஷ்டிரா உள்ளிட்ட மாநிலங்களில் இரண்டாவது அல்லது துணைத் தலைநகரங்கள் செயல்படுவது இதற்கு உதாரணமாகக் காட்டப்படுகிறது.

சென்னைக்கு அருகே துணை நகரம் அமைக்கும் திட்டங்கள் பேசப்பட்டு வரும் நிலையில், திருச்சியை இரண்டாவது தலைநகராக்கும் முடிவு எடுக்கப்பட்டால், அது மாநில நிர்வாக வரலாற்றில் முக்கிய திருப்பமாக அமையும். தலைமைச் செயலக வட்டாரங்களில் ஆய்வு நடைபெற்று வருவதால், விரைவில் தெளிவான அறிவிப்பு எதிர்பார்க்கப்படுகிறது.

இதையும் படிங்க: ஹாட்ஸ்பாட் ஆன திருச்சி கிழக்கு.! நெருங்கியது இடைத்தேர்தல்.? ஆட்சியர் ஆய்வு..!!