தமிழகத்தில் தவெக அரசு அமைந்ததைத் தொடர்ந்து, வழிபாட்டுத் தலங்கள், பள்ளிக்கூடங்கள், கல்லூரிகள் மற்றும் பேருந்து நிலையங்கள் அருகே பொதுமக்கள் மற்றும் மாணவர்களுக்கு இடையூறாக செயல்பட்டு வந்த 717 டாஸ்மாக் மதுபானக் கடைகள் அதிரடியாக மூடப்பட்டுள்ளதாகவும், மூடப்பட்ட கடைகளின் முழுமையான முகவரிப் பட்டியல் அதிகாரப்பூர்வமாக வெளியிடப்பட்டுள்ளதாகவும் மதுவிலக்கு மற்றும் ஆயத்தீர்வைத் துறை அறிவித்துள்ளது.

தமிழக சட்டப்பேரவையில் நடைபெற்ற மானியக் கோரிக்கை விவாதத்தின் போது பேசிய மதுவிலக்கு மற்றும் ஆயத்தீர்வைத் துறை அமைச்சர் விக்னேஷ், அரசுப் பொறுப்பேற்றது முதல் பொதுமக்கள் நலன் கருதி மூடப்பட்ட 717 மதுபானக் கடைகளின் முழு விவரங்கள் மாலைக்குள் அதிகாரப்பூர்வமாக வெளியிடப்படும் எனத் தெரிவித்திருந்தார். அதன்படி, தற்போது மாவட்டம், மண்டலம், கடை எண் மற்றும் அவை செயல்பட்டு வந்த துல்லியமான முகவரியுடன் கூடிய விரிவான பட்டியல் பொதுவெளியில் வெளியிடப்பட்டுள்ளது.

அரசு வெளியிட்டுள்ள அதிகாரப்பூர்வ தரவுகளின்படி, தமிழகம் முழுவதும் உள்ள 5 முக்கிய மண்டலங்களில் இந்த அதிரடி நடவடிக்கை மேற்கொள்ளப்பட்டுள்ளது. மண்டல வாரியாகப் பார்க்கும்போது, தூத்துக்குடியில் அதிகபட்சமாக 64 கடைகளும், கோவையில் 59 கடைகளும், மதுரையில் 52 கடைகளும், விருதுநகரில் 42 கடைகளும் மூடப்பட்டுள்ளன. இதேபோல் சென்னை மண்டலத்தில் 80 கடைகளும், திருச்சி, சேலம் உள்ளிட்ட ஏனைய மண்டலங்களிலும் நூற்றுக்கணக்கான கடைகளுக்கு முழுமையாக மூடுவிழா காணப்பட்டுள்ளது.

இதையும் படிங்க: ₹25 லட்சம் காப்பீட்டுக்கு ₹4,000 கோடி நிதி ஒதுக்கீடு எங்கே? தவெக அரசை நோக்கி திமுக கேள்வி!

பொதுமக்கள், குறிப்பாகப் பெண்கள் மற்றும் பள்ளி மாணவ, மாணவிகள் அச்சமின்றிப் பயணிக்கும் வகையில், மக்கள் அதிகம் கூடும் இடங்களான கோயில்கள், கல்வி நிலையங்கள் மற்றும் பேருந்து நிலையங்களை ஒட்டி செயல்பட்ட கடைகள் கணக்கெடுக்கப்பட்டு இம்முடிவு எடுக்கப்பட்டுள்ளதாக அரசுத் தரப்பில் தெரிவிக்கப்பட்டுள்ளது. இப்பட்டியல் வெளிப்படைத்தன்மையுடன் வெளியிடப்பட்டிருப்பது பொதுமக்கள் மற்றும் சமூக ஆர்வலர்கள் மத்தியில் பெரும் வரவேற்பைப் பெற்றுள்ளது.

இதையும் படிங்க: 3 தமிழர்கள் சுட்டுக்கொலை விவகாரத்தில் தவெக அரசு மௌனம் காப்பது ஏன்? உதயநிதி ஸ்டாலின் காட்டம்!