தமிழகத்தில் காலியாக உள்ள 6 மாநிலங்களவை (Rajya Sabha) இடங்களுக்கானத் தேர்தல் வரும் மார்ச் 16-ஆம் தேதி நடைபெற உள்ள நிலையில், அதிமுக தனது வேட்பாளரை அதிகாரப்பூர்வமாக அறிவித்துள்ளது. அதிமுக-வின் மூத்த தலைவரும், முன்னாள் மத்திய அமைச்சருமான முனைவர் மு. தம்பிதுரை மீண்டும் ஒருமுறை மாநிலங்களவை வேட்பாளராக எடப்பாடி பழனிசாமியால் தேர்வு செய்யப்பட்டுள்ளார்.

73 வயதான மு. தம்பிதுரை, ஏற்கனவே 5 முறை மக்களவை உறுப்பினராகவும், மத்திய சட்டத்துறை அமைச்சராகவும், மக்களவை துணைத் தலைவராகவும் பணியாற்றிய நீண்ட நாடாளுமன்ற அனுபவம் கொண்டவர். அவரது இந்த அனுபவம் மற்றும் டெல்லி அரசியலில் அவருக்கு உள்ளத் தொடர்புகளைக் கருத்தில் கொண்டு மீண்டும் அவருக்கு வாய்ப்பு வழங்கப்பட்டுள்ளது.

அதிமுக-விற்குச் சட்டமன்ற உறுப்பினர்களின் எண்ணிக்கைப் படி கிடைக்கவுள்ள 2 இடங்களில், ஒன்று தம்பிதுரைக்கு வழங்கப்பட்டுள்ளது. மற்றொரு இடத்தை அதிமுக-வின் பலமானக் கூட்டணி கட்சியான பாட்டாளி மக்கள் கட்சிக்கு (பாமக) ஒதுக்கீடு செய்யப்பட்டுள்ளது. இதன் மூலம் பாமக தலைவர் அன்புமணி ராமதாஸ் மீண்டும் மாநிலங்களவை உறுப்பினராகத் தேர்வு செய்யப்பட அதிக வாய்ப்புள்ளது.

இதையும் படிங்க: அமித் ஷா பெயரை வைக்க சொன்னாலும் எடப்பாடி வைப்பார் - உதயநிதி ஸ்டாலின் கடும் தாக்கு!

மாநிலங்களவைத் தேர்தலுக்கான வேட்புமனுத் தாக்கல் மார்ச் 5 (நாளை) உடன் நிறைவடைகிறது. இதனைத் தொடர்ந்து மார்ச் 16, 2026 அன்று வாக்குப்பதிவு நடைபெற்று, அன்றைய தினமே முடிவுகள் அறிவிக்கப்பட உள்ளன.

திமுக தனது 4 இடங்களில் தேமுதிக மற்றும் காங்கிரஸிற்கு தலா ஒரு இடத்தையும், தனது கட்சிக்கு 2 இடங்களையும் (திருச்சி சிவா, கான்ஸ்டன்டைன் ரவீந்திரன்) அறிவித்துள்ள நிலையில், அதிமுகவும் தனது வேட்பாளரை அறிவித்துத் தேர்தல் பணிகளை முடுக்கிவிட்டுள்ளது.

முனைவர் மு. தம்பிதுரை ஏற்கனவே 2020-ஆம் ஆண்டு மாநிலங்களவை உறுப்பினராகத் தேர்வு செய்யப்பட்டு, வரும் ஏப்ரல் 2-ஆம் தேதியுடன் அவரது பதவிக்காலம் முடிவடைய இருந்த நிலையில், தற்போது மீண்டும் அவருக்கு இப்பதவி வழங்கப்பட்டுள்ளது குறிப்பிடத்தக்கது.

இதையும் படிங்க: ஈரோட்டில் இ.பி.எஸ் சூறாவளி பிரச்சாரம்! மார்ச் 7-ல் அந்தியூர், மார்ச் 8-ல் பெருந்துறை, பவானியில் பரப்புரை!