சென்னை: தமிழகத்தில் டாஸ்மாக் கடைகளில் விற்பனை செய்யப்படும் மதுபானப் பாட்டில்களைத் திரும்பப் பெறுவதற்காக மேற்கொள்ளப்படும் டெண்டர் நடவடிக்கையில் இறுதி முடிவெடுக்கக் கூடாது என்று தமிழக அரசுக்கு சென்னை உயர் நீதிமன்றம் உத்தரவிட்டுள்ளது. இந்தத் திட்டத்தை எதிர்த்து காலி பாட்டில் வியாபாரிகள் நலச்சங்கம் தொடர்ந்த வழக்கில், டெண்டரில் பங்கேற்றவர்களின் விவரங்களைத் தாக்கல் செய்யவும் அரசுக்கு அறிவுறுத்தப்பட்டுள்ளது.

சுற்றுச்சூழல் பாதுகாப்பை மேம்படுத்தும் நோக்கில், டாஸ்மாக் கடைகளில் விற்பனை செய்யப்படும் மதுபானப் பாட்டில்களைத் திரும்பப் பெறும் திட்டத்தை தமிழக அரசு முன்னெடுத்துள்ளது. இதற்காக, காலி பாட்டில்களைச் சேகரிக்கும் ரிவர்ஸ் வெண்டிங் மெஷின்களை நிறுவி இயக்கத் திட்டமிடப்பட்டுள்ளது. இந்தப் பணிகளை மேற்கொள்வதற்கான டெண்டர் கடந்த ஆகஸ்ட் 31ஆம் தேதி கோரப்பட்டதாகத் தெரிவிக்கப்பட்டுள்ளது.

இந்தத் திட்டத்தை எதிர்த்து பாட்டில் வியாபாரிகள் நலச்சங்கம் சார்பில் சென்னை உயர் நீதிமன்றத்தில் மனு தாக்கல் செய்யப்பட்டது. அதில், மாநிலம் முழுவதும் இயந்திரங்களை நிறுவி இயக்கும் பணியை ஒரே நிறுவனத்திடம் ஒப்படைக்க அரசு முடிவு செய்துள்ளதாகக் குறிப்பிடப்பட்டுள்ளது. நீட்டிப்பு காலத்தையும் சேர்த்து மொத்தம் 10 ஆண்டுகளுக்கு ஒப்பந்தம் வழங்கத் திட்டமிடப்பட்டிருப்பதாகவும் மனுவில் தெரிவிக்கப்பட்டுள்ளது.

இதையும் படிங்க: டாஸ்மாக் பாரில் கடனா..? அமைச்சர் விக்னேஷ் சொன்னது என்ன.? தமிழ்நாடு அரசு விளக்கம்.!

தற்போது பல ஆண்டுகளாக மதுபானக் கடைகளில் இருந்து காலி பாட்டில்களைச் சேகரித்து விற்பனை செய்து வரும் 500க்கும் மேற்பட்ட வியாபாரிகள் இந்த நடவடிக்கையால் பாதிக்கப்படக்கூடும் என்று மனுதாரர்கள் வாதிட்டுள்ளனர். எனவே, மாநிலம் முழுவதற்குமான ஒப்பந்தத்தை ஒரே நிறுவனத்துக்கு வழங்குவதற்குப் பதிலாக, மாவட்ட வாரியாக டெண்டரைப் பிரித்து வழங்க வேண்டும் என்றும் கோரிக்கை விடுத்துள்ளனர்.

இந்த மனு சென்னை உயர் நீதிமன்றத்தில் விசாரணைக்கு வந்தபோது, மதுபாட்டில்களைத் திரும்பப் பெறும் திட்டத்துக்கான டெண்டரில் இறுதி முடிவெடுக்க வேண்டாம் என்று தமிழக அரசுக்கு நீதிமன்றம் உத்தரவிட்டது. அதே நேரத்தில், டெண்டர் நிபந்தனைகளைப் பூர்த்தி செய்யும் நிறுவனங்கள் அதில் பங்கேற்பதற்குத் தடையில்லை என்றும் தெளிவுபடுத்தியது.

மேலும், இந்த டெண்டரில் எத்தனை நிறுவனங்கள் பங்கேற்றுள்ளன என்பது குறித்த அறிக்கையைத் தாக்கல் செய்ய தமிழக அரசுக்கு உத்தரவிட்ட நீதிமன்றம், வழக்கின் அடுத்தகட்ட விசாரணையை அக்டோபர் 26ஆம் தேதிக்கு ஒத்திவைத்தது.

இந்த வழக்கின் அடுத்த விசாரணையில், டெண்டர் நடைமுறை மற்றும் வியாபாரிகள் எழுப்பியுள்ள கோரிக்கைகள் தொடர்பாக மேலும் விவாதம் நடைபெறும் என எதிர்பார்க்கப்படுகிறது.

இதையும் படிங்க: குடிமகன்களால் தொல்லை..! எடுத்த நடவடிக்கை என்ன? தமிழக அரசுக்கு ஐகோர்ட் உத்தரவு!