தருமபுரி சட்டமன்றத் தொகுதி தேமுதிக வேட்பாளரை ஆதரித்துப் பரப்புரை மேற்கொண்ட தேமுதிக பொதுச்செயலாளர் பிரேமலதா விஜயகாந்திற்கு எதிராக, விடுதலைச் சிறுத்தைகள் கட்சி (விசிக) தொண்டர்கள் ஆவேசமாகக் கேள்வி எழுப்பிய சம்பவம் பெரும் பரபரப்பை ஏற்படுத்தியுள்ளது. அண்மையில் நடைபெற்ற திமுக கூட்டணிக் கூட்டத்தில், விசிக தலைவர் திருமாவளவன் பெயரை மேடையில் அறிவித்தபோது பிரேமலதா எழுந்து நின்று மரியாதை செய்யவில்லை என்ற விவகாரமே இந்த மோதலுக்குக் காரணமாக அமைந்துள்ளது.

தருமபுரியில் பிரேமலதா வாகனத்தில் சென்று கொண்டிருந்தபோது, அங்குத் திரண்டிருந்த விசிக தொண்டர்கள் கறுப்புக் கொடிகளுடன் அவருக்கு எதிராக முழக்கமிட்டனர். மேடையில் எமது தலைவர் திருமாவளவன் அவர்களின் பெயரை உச்சரித்து அழைக்கும்போது, நீங்கள் மட்டும் எந்திரிக்காமல் அமர்ந்திருந்தது ஏன்? ஏன்? ஏன்? எனத் தொண்டர்கள் உரத்த குரலில் கேள்வி எழுப்பினர். தலித் சமூகத்தின் தலைவராகப் பார்க்கப்படும் திருமாவளவனைப் பிரேமலதா வேண்டுமென்றே அவமதித்துவிட்டதாக அவர்கள் குற்றம் சாட்டினர்.

கடந்த வாரம் கடலூரில் நடைபெற்ற திமுக மற்றும் கூட்டணிக் கட்சிகளின் பிரம்மாண்டப் பொதுக்கூட்டத்தில் இச்சம்பவம் நடந்ததாகக் கூறப்படுகிறது. நிகழ்வு: மேடையில் தலைவர்கள் அறிமுகம் செய்யப்பட்டபோது, முதல்வர் ஸ்டாலின் மற்றும் பிற தலைவர்களின் பெயர்களைக் குறிப்பிட்டபோது பிரேமலதா எழுந்து நின்று மரியாதை செய்தார். ஆனால், திருமாவளவனின் பெயரை அறிவித்தபோது அவர் இருக்கையை விட்டு எந்திரிக்கவில்லை என்றும், இது 'புரோட்டோகால்' மீறல் என்றும் விசிக தரப்பில் விமர்சனங்கள் எழுந்தன.

இதையும் படிங்க: தேமுதிகவில் இருந்து விலகி அதிமுகவில் இணைந்தார் 'மீசை' ராஜேந்திரன்!

தருமபுரியில் தொண்டர்களின் இந்தக் கேள்விகளை எதிர்கொண்ட பிரேமலதா, வாகனத்தில் இருந்தபடியே அமைதியாகக் கடந்து செல்ல முயன்றார். முன்னதாக இது குறித்துப் பேசியிருந்த அவர், திருமா அவர்கள் மீது எனக்கு எப்போதும் மரியாதை உண்டு; இதனை அரசியலாக்க வேண்டாம் என்று சிரித்தபடியே கடந்து சென்றார் என்பது குறிப்பிடத்தக்கது.

திமுக கூட்டணியில் தேமுதிக மற்றும் விசிக ஆகிய இரண்டு கட்சிகளும் அங்கம் வகிக்கும் நிலையில், அடிமட்டத் தொண்டர்களிடையே நிலவும் இந்த மோதல் தேர்தல் களத்தில் கூட்டணியின் ஒற்றுமையைப் பாதிக்குமோ என்ற அச்சத்தை ஏற்படுத்தியுள்ளது. குறிப்பாகத் தருமபுரி, கடலூர் போன்ற வட மாவட்டங்களில் இது பெரும் விவாதப் பொருளாக மாறியுள்ளது.

இதையும் படிங்க: தேமுதிகவில் இருந்து விலகினார் மீசை ராஜேந்திரன்! பிரேமலதா விஜயகாந்திற்கு அதிரடி கடிதம்!