கடந்த ஆண்டு அக்டோபர் மாதம் வரை தமிழகத்தில் சுமார் 6.41 கோடி வாக்காளர்கள் இருந்தனர். ஆனால் SIR திருத்தப் பணிகள் தொடங்கிய பிறகு, நவம்பர் 4-ம் தேதி முதல் வீடு வீடாக கணக்கெடுப்பு நடத்தப்பட்டது. டிசம்பர் 19-ம் தேதி வரைவு வாக்காளர் பட்டியல் வெளியிடப்பட்டபோது, அதில் சுமார் 5.43 கோடி பேர்தான் இடம்பெற்றிருந்தனர். அதாவது, கிட்டத்தட்ட 97 லட்சம் பெயர்கள் நீக்கப்பட்டிருந்தன. இதில் பலர் இறந்தவர்கள், இடமாறியவர்கள், இரட்டைப் பதிவு உள்ளவர்கள், ஆதார் அல்லது ஆவணங்கள் இல்லாதவர்கள் போன்ற பிரிவுகளைச் சேர்ந்தவர்கள் என கூறப்பட்டது.

வரைவு பட்டியல் வெளியான பிறகு, டிசம்பர் 19 முதல் பிப்ரவரி 10 வரை மக்களுக்கு உரிமைகோரல் மற்றும் ஆட்சேபனை தெரிவிக்கும் கால அவகாசம் கொடுக்கப்பட்டது. லட்சக்கணக்கானோர் தங்கள் பெயரைச் சேர்க்கவோ, திருத்தவோ, தவறாக நீக்கப்பட்டதை மீட்டெடுக்கவோ விண்ணப்பித்திருந்தனர். இந்த விண்ணப்பங்கள் அனைத்தும் மாவட்ட அளவிலான தேர்தல் பதிவு அலுவலர்களால் சரிபார்க்கப்பட்டு, தேவையான ஆவணங்கள், சுய உறுதிமொழி போன்றவை ஆய்வு செய்யப்பட்டன.

இப்போது அந்த அனைத்துப் பணிகளும் முடிந்த நிலையில், இன்று தமிழக முழுவதற்குமான இறுதி வாக்காளர் பட்டியல் வெளியிடப்பட்டுள்ளது. தமிழகத்தில் இறுதி வாக்காளர் பட்டியலை தமிழக தேர்தல் அதிகாரி அர்ச்சனா பட்நாயக் வெளியிட்டார். தொடர்ந்து செய்தியாளர்களை சந்தித்து பேசி அவர், எஸ் ஐ ஆர் பணிகள் நிறைவடைந்த நிலையில் தமிழகத்தில் மொத்தமாக 5.67 கோடி வாக்காளர்கள் இருப்பதாக தெரிவித்தார்.

இதையும் படிங்க: இறுதி வாக்காளர் பட்டியல் வெளியீடு..! சென்னையில் 28.30 லட்சம் வாக்காளர்கள்..!! முழு விவரம்..!!

தமிழ்நாட்டில் மொத்தமாக 2.89 கோடி பெண் வாக்காளர்களும், 2.77 கோடி ஆண் வாக்காளர்களும் இருப்பதாக தெரிவித்தார். பெண் வாக்காளர்கள் எண்ணிக்கை 2,89,60,838. ஆண் வாக்காளர்கள் எண்ணிக்கை 2,77,38,925. கிட்டத்தட்ட 70 லட்சம் வாக்காளர்கள் நீக்கப்பட்டிருப்பதாக தெரிவித்துள்ளார். மூன்றாம் பாலினத்தவர்கள் 7,617 பேர் என மொத்தமாக தமிழகத்தில் 5,67,07,380 வாக்காளர்கள் இருப்பதாக தெரிவித்தார். தமிழகத்தில் வாக்காளர் பட்டியலில் புதிதாக 27,53,793 பேர் சேர்க்கப்பட்டிருப்பதாகவும் கூறினார். 

இதையும் படிங்க: இப்படி தான் இருக்கணும்..!! HAIR TRANSPLANT மையங்களுக்கு கடும் கட்டுப்பாடு..! தமிழக அரசு கறார்..!!