தமிழகத்தின் கடலோரப் பகுதிகளில் தற்போது நிலவும் வானிலை நிலைமை மக்களுக்கு சற்று சிரமத்தை ஏற்படுத்தும் வகையில் உள்ளது. சென்னை வானிலை ஆய்வு மையத்தின் அறிவிப்பின்படி, கடலோர தமிழகம் மற்றும் புதுவை, காரைக்கால் பகுதிகளில் அதிக வெப்பநிலைக்கு இணையாக அதிக ஈரப்பதம் நிலவுவதால் அசௌகரியமான வானிலை ஏற்பட வாய்ப்புள்ளது. இந்த நிலை அடுத்த சில நாட்களுக்கு தொடரும் என எச்சரிக்கப்பட்டுள்ளது. 

சென்னையைப் பொறுத்தவரை இன்று வானம் ஓரளவு மேகமூட்டத்துடன் காணப்படும். மாலை அல்லது இரவு நேரங்களில் நகரின் சில இடங்களில் இடி மின்னலுடன் கூடிய மிதமான மழை பெய்யக்கூடும். இது சற்று நிம்மதியை அளிக்கும் என்றாலும், ஒட்டுமொத்த வெப்ப உணர்வை முழுமையாகக் குறைக்காது. அதிகபட்ச வெப்பநிலை 37-38 டிகிரி செல்சியஸ் அளவில் இருக்கும் எனக் கணிக்கப்பட்டுள்ளது.

தமிழகம் முழுவதும் இன்று முதல் அடுத்த ஐந்து நாட்களுக்கு வெப்பத்தின் தாக்கம் அதிகமாக இருக்கும். அதிகபட்ச வெப்பநிலை இயல்பை விட 2 முதல் 3 டிகிரி செல்சியஸ் வரை உயரும் என்று சென்னை வானிலை ஆய்வு மையம் தெளிவாக எச்சரித்துள்ளது. குறிப்பாக கடலோரப் பகுதிகளில் ஈரப்பதம் அதிகமாக இருப்பதால், வெயில் நேரத்தில் வெளியில் செல்பவர்கள் அதிக சிரமத்தை எதிர்கொள்ள நேரிடும். பகல் நேரங்களில் வெயில் கொளுத்தும் நிலையில், மக்கள் பாதுகாப்பாக இருக்க அறிவுறுத்தப்பட்டு உள்ளது.

இதையும் படிங்க: மேற்கு தொடர்ச்சி மலையில் 50 கி.மீ வேகத்தில் வீசப்போகும் பலத்த காற்று! வானிலை மையம் அதிரடி வார்னிங்!

இந்த வெப்ப அலையுடன் இணைந்த அதிக ஈரப்பதம் மக்களின் உடல் நலத்தை பாதிக்கும் வாய்ப்பு உள்ளது. குறிப்பாக குழந்தைகள், முதியவர்கள், நீரிழிவு, இரத்த அழுத்தம் போன்ற நோயாளிகள் மற்றும் வெளிப்பணி செய்பவர்கள் மிகுந்த எச்சரிக்கையுடன் இருக்க வேண்டும். வெளியில் செல்லும்போது தேவையான நடவடிக்கைகளை மேற்கொள்ளுமாறு வானிலை மையம் மக்களுக்கு அறிவுறுத்தியுள்ளது. போதுமான அளவு தண்ணீர் அருந்துதல், நிழலில் தங்குதல், இலேசான உடைகளை அணிதல், தலையை மூடிக்கொள்ளுதல் போன்ற எளிய முன்னெச்சரிக்கை நடவடிக்கைகள் இந்த சூழலில் மிக முக்கியமானவை என்று கூறப்பட்டுள்ளது. 

இதையும் படிங்க: தமிழக வானிலை முன்னறிவிப்பு: கோவை, நீலகிரியில் கனமழை... மீனவர்களுக்கு எச்சரிக்கை!