“பிறக்கின்ற 2026-ஆம் ஆண்டு தமிழகத்தில் ஒரு புதிய மாற்றத்தை ஏற்படுத்தும் ஆண்டாக அமையப் போகிறது; நாடும் மக்களும் நலம்பெற நல்லிணக்கத்தைப் பேணும் ஒரு நல்லாட்சி அமைய அனைவரும் ஒன்றிணைய வேண்டும்” எனத் தமிழ் மாநில காங்கிரஸ் (மூ) தலைவர் ஜி.கே.வாசன் எம்.பி. புத்தாண்டு வாழ்த்து தெரிவித்துள்ளார்.

புத்தாண்டு பிறக்கவுள்ள நிலையில், தமிழகத்தின் அரசியல் களம் சூடுபிடுத்துள்ள நிலையில், இந்த அறிக்கை முக்கியத்துவம் வாய்ந்ததாகப் பார்க்கப்படுகிறது. கடந்த காலங்களில் நிறைவேறாத மக்களின் கோரிக்கைகள் மற்றும் எதிர்பார்ப்புகள் நிறைவேற, ‘நல்லவர்கள் மற்றும் வல்லவர்கள்’ பக்கம் மக்கள் துணை நிற்க வேண்டும் என அவர் தனது அறிக்கையில் சூசகமாக தெரிவித்துள்ளார். 

தமிழ் மாநில காங்கிரஸ் (மூ) தலைவரும், நாடாளுமன்ற உறுப்பினருமான ஜி.கே.வாசன் இன்று விடுத்துள்ள புத்தாண்டு வாழ்த்துச் செய்தியில், உலக மக்கள் அனைவராலும் இனம், மொழி, நாடு பாகுபாடின்றி மகிழ்ச்சியோடு கொண்டாடப்படும் இந்தப் புத்தாண்டு, அனைவரது வாழ்விலும் ஒளிவிளக்காக அமைய வேண்டும் எனத் தனது விருப்பத்தைப் பகிர்ந்துள்ளார். “இந்த ஆண்டு தமிழக அரசியலில் ஒரு திருப்புமுனையை ஏற்படுத்தும் ஆண்டாக இருக்கும்; நாடும் நாட்டு மக்களும் வளம்பெற, அனைவரிடமும் நல்லிணக்கத்தைப் பேணும் ஒரு சிறந்த ஆட்சியைத் தேர்ந்தெடுக்க வேண்டிய ‘குரூசியல்’ கட்டத்தில் நாம் இருக்கிறோம்” என அவர் தனது அரசியல் நிலைப்பாட்டை அழுத்தமாகப் பதிவு செய்துள்ளார்.

இதையும் படிங்க: தமிழகத்தில் 9 ஐஏஎஸ் அதிகாரிகள் பணியிட மாற்றம்! சத்யபிரத சாகுவுக்கு புதிய பொறுப்பு!

தமிழகத்தின் தற்போதைய சூழலைச் சுட்டிக்காட்டியுள்ள அவர், கடந்த காலங்களில் நிறைவேறாமல் இருக்கும் மக்களின் அடிப்படை நோக்கங்கள் மற்றும் கோரிக்கைகள் வெற்றிபெற வேண்டுமெனில், மாநிலத்தில் ஒரு ‘நல்லாட்சி’ மலர வேண்டியது அவசியம் எனத் தெரிவித்துள்ளார். இதற்காக, “நல்லவர்கள் மற்றும் வல்லவர்கள் பக்கம் மக்கள் அனைவரும் ஒன்றிணைந்து துணை நிற்க வேண்டும்” என அவர் அழைப்பு விடுத்துள்ளார். 2026 சட்டமன்றத் தேர்தல் நெருங்கி வரும் வேளையில், தமாகா தலைவரின் இந்த ‘ஆட்சி மாற்றம்’ குறித்த கருத்துக்கள் அரசியல் வட்டாரங்களில் பேசுபொருளாகியுள்ளது.

மேலும், “இந்த புத்தாண்டு உங்கள் அனைவரது வாழ்விலும் மகிழ்ச்சியைப் பொங்கச் செய்யட்டும், எடுக்கும் முயற்சிகள் அனைத்தும் வெற்றியடையட்டும், நாட்டில் சமத்துவமும் சமாதானமும் நிலைக்கட்டும்” என அவர் மனதார வாழ்த்தியுள்ளார். “வளமான தமிழகம் அமையட்டும்” என்ற தாரக மந்திரத்துடன் அவர் விடுத்துள்ள இந்த வாழ்த்து மடல், தமாகா தொண்டர்களிடையே புதிய உத்வேகத்தை அளித்துள்ளது. 

இதையும் படிங்க: தமிழக காவல்துறையில் 70 ஐபிஎஸ் அதிகாரிகள் இடமாற்றம் - டேவிட்சன் தேவாசீர்வாதம் டிஜிபியாக உயர்வு!