சேலம்: பாட்டாளி மக்கள் கட்சியின் (பாமக) பொதுக்குழுக் கூட்டம் இன்று (டிசம்பர் 29) சென்னையில் தொடங்கி நடைபெற்று வருகிறது. இக்கூட்டத்தில் கட்சித் தலைவராக டாக்டர் எஸ். ராமதாஸ் மீண்டும் தேர்வு செய்யப்பட்டார். கூட்டணி முடிவு, வேட்பாளர் தேர்வு உள்ளிட்டவற்றுக்கு ராமதாஸுக்கு முழு அதிகாரம் வழங்கப்பட்டது. “துரோகத்தை வீழ்த்துவோம், ராமதாஸின் கரத்தை வலுப்படுத்துவோம், 2026இல் பெரும் பலத்துடன் சட்டப்பேரவைக்குள் நுழைவோம்” என்று உறுதிமொழி எடுத்துக்கொண்டனர் உறுப்பினர்கள்.
கூட்டத்தில் பேசிய பாமக செயல் தலைவர் ஸ்ரீகாந்தி, அன்புமணி ராமதாஸை கடுமையாக விமர்சித்தார். “பாமகவை வளர்த்தெடுத்த ராமதாஸிடம் இருந்து கட்சியை அபகரித்துவிட்டு யாருக்காக நீங்கள் போராடப் போகிறீர்கள்? ராமதாஸை கேள்வி கேட்க உங்களுக்கு என்ன தகுதி உள்ளது? மருத்துவர் பட்டமும், எம்பி, அமைச்சர் பதவிகளும் ராமதாஸ் போட்ட பிச்சை.
அன்புமணி செய்தது பச்சைத் துரோகம். தலைவரை கண்டுகொள்ளாமல் ‘இனி நான்தான் தலைவர்’ என்று சொன்னால் நாம் ஏற்போமா? அதிகாரம் வேண்டுமெனில் தனியாகக் கட்சி தொடங்கட்டும். இது ராமதாஸ் வளர்த்தெடுத்த கட்சி. அவர்தான் பாமக எனும் கோட்டைக்கு ராஜா. யாரும் உரிமை கொண்டாட முடியாது.
இதையும் படிங்க: அன்புமணியை தொடர்ந்து விமர்சிக்கும் ஜி.கே.மணி!! திமுகவில் இணைந்து எம்.எல்.ஏ பதவி பெற திட்டம்!
திமுக கைக்கூலி என்று எங்களை விமர்சித்தவர்கள் எல்லாம் ஆர்எஸ்எஸ் அடிமைகள். 2026 தேர்தலில் எம்எல்ஏக்களின் பலத்துடன் சட்டப்பேரவைக்குள் நுழைவோம். கூட்டணி, தொகுதிகள் குறித்து ராமதாஸ் ஏற்கெனவே முடிவெடுத்துவிட்டார். ராமதாஸின் ஆட்டத்தை இனிமேல்தான் பார்க்கப் போகிறீர்கள். குறுக்கே பேசவோ காலை வாரிவிடவோ யாரும் இல்லை” என்று ஸ்ரீகாந்தி பேசினார்.
அதேபோல கௌரவத் தலைவர் ஜி.கே. மணி பேசுகையில், “அன்புமணி இனி அரசியல் செய்ய முடியாது. அவர் அரசியலை விட்டு வேறு வேலை பார்க்கலாம். பாமக சாதாரணமாக உருவான கட்சி அல்ல. இனி யாராலும் இதை அபகரிக்க முடியாது” என்று கூறினார். முன்னதாக பசுமைத் தாயகம் தலைவர் பொறுப்பில் இருந்து சௌமியா அன்புமணியை நீக்கிவிட்டு அந்தப் பொறுப்பு ஸ்ரீகாந்திக்கு வழங்கப்பட்டது.
பாமகவில் நீண்டகாலமாக நிலவும் உட்கட்சி மோதல் இக்கூட்டத்தில் உச்சத்தை அடைந்துள்ளது. ராமதாஸ் தரப்பு அன்புமணியை கடுமையாக விமர்சித்து வரும் நிலையில், 2026 சட்டமன்றத் தேர்தலுக்கு கட்சியை வலுப்படுத்தும் முயற்சியாக இக்கூட்டம் பார்க்கப்படுகிறது.
இதையும் படிங்க: அன்புமணியின் சூழ்ச்சி! மனவேதனையில் ராமதாஸ்!! ஜி.கே. மணி கட் அண்ட் ரைட் பேச்சு!