தமிழகத்தில் போதைப்பொருள் புழக்கம் கட்டுக்கடங்காமல் சென்றுவிட்டதாகவும், தற்போது ‘கஞ்சா ஹீரோக்கள்’ தான் மாநிலம் முழுவதும் உலா வந்து கொண்டிருக்கிறார்கள் என்றும் பாஜக மூத்த தலைவர் தமிழிசை சௌந்தரராஜன் கடுமையாக விமர்சித்துள்ளார்.

புத்தாண்டு தினமான இன்று செய்தியாளர்களைச் சந்தித்த அவர், தமிழக அரசின் ‘விடியல்’ ஆட்சி என்பது வெறும் விளம்பரம் மட்டுமே எனச் சாடினார். போதைப்பொருள் விற்பனை செய்பவர்களைக் கண்டுபிடிப்பதை ரகசியமாக வைத்திருக்கும் அரசு, அவர்களைக் காப்பாற்ற முயல்கிறதா என்ற கேள்வியையும் அவர் எழுப்பினார். மேலும், சென்னையில் போராடி வரும் இடைநிலை ஆசிரியர்களின் துயர நிலை மற்றும் உழைக்கும் பெண்களின் அடிப்படை வசதி குறைபாடுகள் குறித்துப் பேசிய அவர், தமிழக மக்கள் உண்மையான விடியலைக் காண வேண்டும் என்றால், தேசிய அளவிலான மாற்றமே தீர்வாக அமையும் எனத் தனது அரசியல் நிலைப்பாட்டை அழுத்தமாகப் பதிவு செய்தார்.

பாஜக மூத்த தலைவர் தமிழிசை சௌந்தரராஜன் இன்று செய்தியாளர்களுக்குப் பேட்டியளித்தார். அப்போது தமிழகத்தில் நிலவும் போதைப்பொருள் கலாச்சாரம் குறித்துப் பேசிய அவர், “மதுரையில் ஒரு ‘அஞ்சா நெஞ்சன்’ இருந்தார், இப்போது சென்னையில் ‘ஜீரோ கஞ்சா’ என்கிறார்கள்; ஆனால் உண்மையில் இங்கு நடப்பதோ ‘ஹீரோ கஞ்சா’ விளையாட்டுதான்” எனத் தனது பாணியில் கிண்டலடித்தார். தமிழகத்தில் கஞ்சா விற்பனை செய்பவர்கள் யாரென்று கேட்டால் அரசு அதை ரகசியமாக வைத்திருப்பதாகவும், கஞ்சா ஹீரோக்களின் கூடாரமாகத் தமிழ்நாடு மாறிவிட்டதாகவும் அவர் குற்றம் சாட்டினார். போதைப்பொருள் புழக்கத்தை ஒழிக்கத் துப்பு துலக்குபவர்களை விட, விற்பனை செய்பவர்களுக்கே அரசு அதிக முக்கியத்துவம் அளிக்கிறதோ என்ற சந்தேகம் எழுவதாகவும் அவர் தெரிவித்தார்.

இதையும் படிங்க: “விண்ணைப் பிளந்த வாணவேடிக்கை!” - 2026 புத்தாண்டை உற்சாகத்துடன் வரவேற்ற தமிழக மக்கள்!

பெண்கள் முன்னேற்றம் குறித்துப் பேசும் இந்த அரசு, உண்மையில் உழைக்கும் பெண்களின் அடிப்படைத் தேவைகளைக் கூடப் பூர்த்தி செய்யவில்லை எனத் தமிழிசை சாடினார். “ஒரு பக்கம் ‘வெல்லும் பெண்கள்’ என விளம்பரம் செய்கிறார்கள்; ஆனால் மறுபக்கம் ஜவுளித் துறையில் பணியாற்றும் பெண்கள், தங்களது அடிப்படைத் தேவைகளுக்காகக் கூட வழியின்றி அவதிப்பட்டு வருகின்றனர்” என அவர் சுட்டிக்காட்டினார். கழிப்பறை வசதிகள் கூட இல்லாத இடங்களில் பணியாற்றும் பெண்கள், தங்களது உடைகளைக் மாற்றக் கூட முடியாமல் கூனிக்குறுகி நிற்கும் அவல நிலை நீடிப்பதாக அவர் வேதனையுடன் தெரிவித்தார். புத்தாண்டு தினத்தில் இத்தகைய வருத்தமான செய்திகளைச் சொல்ல வேண்டியிருப்பது கவலையளித்தாலும், இதுதான் தமிழகத்தின் எதார்த்த நிலையென அவர் குறிப்பிட்டார்.

தமிழகத்திற்கு உண்மையான விடியல் இன்னும் பிறக்கவில்லை என்று குறிப்பிட்ட தமிழிசை, மக்கள் ஒரு மாற்றத்தை எதிர்நோக்கி உள்ளதாகத் தெரிவித்தார். “தமிழக மக்கள் உண்மையான விடியலைக் காண வேண்டும் என்றால், தாமரை மலர வேண்டும்; தேசிய ஜனநாயகக் கூட்டணியின் பலம் அதிகரிக்க வேண்டும்” எனத் தேர்தல் முழக்கத்தை முன்வைத்தார். ஆசிரியர்கள் வீதியில் இறங்கிப் போராடும் சூழலும், சாமானியப் பெண்களின் அடிப்படை உரிமைகள் மறுக்கப்படும் நிலையும் மாற வேண்டும் என்றால், வருகின்ற 2026 சட்டமன்றத் தேர்தல் ஒரு மிகப்பெரிய திருப்புமுனையாக அமையும் எனத் தமிழிசை சௌந்தரராஜன் தனது பேட்டியின் போது உறுதிபடத் தெரிவித்தார்.

இதையும் படிங்க: “கண்காணிப்பு வளையத்தில் தமிழ்நாடு!” - புத்தாண்டு பாதுகாப்பிற்காக ஒரு லட்சம் போலீஸார் குவிப்பு!