ஐபிஎல் 2026 தொடரின் இன்றைய விறுவிறுப்பான ஆட்டத்தில் மும்பை இந்தியன்ஸ் மற்றும் சன்ரைசர்ஸ் ஹைதராபாத் அணிகள் மோதின. மும்பை வான்கடே மைதானத்தில் நடைபெற்ற இந்தப் போட்டியில், ரன்குவிப்பு உச்சத்தைத் தொட்டது. இறுதியில் 244 ரன்கள் என்ற இமாலய இலக்கை துரத்திய சன்ரைசர்ஸ் ஹைதராபாத் அணி, 6 விக்கெட்டுகள் வித்தியாசத்தில் அபார வெற்றி பெற்றது.

முதலில் பேட்டிங் செய்த மும்பை இந்தியன்ஸ் அணிக்குத் தொடக்க வீரர் ரியான் ரிக்லெட்டன் (Ryan Rickelton) ருத்ரதாண்டவம் ஆடினார். வெறும் 44 பந்துகளில் சதம் அடித்து, மும்பை இந்தியன்ஸ் அணிக்காக அதிவேகமாகச் சதம் அடித்த வீரர் என்ற சாதனையைப் படைத்தார்.

இதையும் படிங்க: சஞ்சு சாம்சன் அதிரடி சதம்! மும்பைக்கு எதிராக 207 ரன்கள் குவித்தது சென்னை சூப்பர் கிங்ஸ்!

55 பந்துகளில் 123 ரன்கள் குவித்து இறுதிவரை ஆட்டமிழக்காமல் இருந்தார். இதுவே ஒரு மும்பை இந்தியன்ஸ் வீரரின் அதிகபட்ச ஸ்கோர் ஆகும். வில் ஜாக்ஸ் (46) மற்றும் ரிக்லெட்டன் கூட்டணியால் மும்பை அணி 20 ஓவர்களில் 243/5 ரன்கள் குவித்தது.

244 ரன்கள் என்ற கடினமான இலக்கை நோக்கி களம் இறங்கிய ஹைதராபாத் அணிக்குத் தொடக்க வீரர் டிராவிஸ் ஹெட் (Travis Head) மற்றும் ஹென்ரிச் கிளாசன் (Heinrich Klaasen) ஆகியோர் மும்பை பந்துவீச்சை நாலாபுறமும் சிதறடித்தனர்.

கிளாசனின் அதிரடி ஆட்டத்தால் ஹைதராபாத் அணி 18.4 ஓவர்களிலேயே 4 விக்கெட் இழப்பிற்கு 249 ரன்கள் எடுத்து வெற்றி பெற்றது. ஹர்திக் பாண்டியா ஒரு விக்கெட்டும், அல்லா கசன்ஃபர் (Allah Ghazanfar) இரண்டு விக்கெட்டுகளையும் வீழ்த்தினர்.

இந்த வெற்றியின் மூலம் சன்ரைசர்ஸ் ஹைதராபாத் அணி புள்ளிப்பட்டியலில் தனது நிலையை வலுப்படுத்தியுள்ளது. 243 ரன்கள் அடித்தும் தோல்வியடைந்தது மும்பை ரசிகர்களுக்குப் பெரும் அதிர்ச்சியை ஏற்படுத்தியுள்ளது.

இதையும் படிங்க: ஏமாற்றத்தில் சிஎஸ்கே ரசிகர்கள்! மும்பைக்கு எதிரான போட்டியிலும் தோனி இல்லை!