தென்னிந்தியாவின் மிக முக்கியமான வழித்தடமான சென்னை - பெங்களூரு இடையே பயணம் செய்யும் ரயில் பயணிகளுக்குத் தெற்கு ரயில்வே ஒரு முக்கிய அறிவிப்பை வெளியிட்டுள்ளது. பெங்களூரு ரயில் நிலையத்தில் மேற்கொள்ளப்படவுள்ள உள்கட்டமைப்பு மற்றும் மறுசீரமைப்புப் பணிகள் (Re-modelling works) காரணமாக, வரும் மே 29-ஆம் தேதி முதல் ஜூலை 07-ஆம் தேதி வரை சில முக்கிய எக்ஸ்பிரஸ் ரயில்கள் ரத்து செய்யப்பட்டுள்ளன.

அம்ரித் பாரத் திட்டத்தின் கீழ் பெங்களூரு ரயில் நிலையத்தைப் புதுப்பிக்கும் பணிகள் தற்போது தீவிரமடைந்துள்ளன. இதற்காகத் தண்டவாளப் பராமரிப்பு மற்றும் மேடை விரிவாக்கப் பணிகள் நடைபெறவுள்ளதால், சென்னை சென்ட்ரல் மற்றும் எழும்பூரில் இருந்து பெங்களூரு நோக்கி இயக்கப்படும் தினசரி மற்றும் வாராந்திர எக்ஸ்பிரஸ் ரயில்களின் சேவையில் மாற்றம் செய்யப்பட்டுள்ளது.

ஏறத்தாழ ஒரு மாத காலத்திற்கு மேலாக இந்த ரத்து நடவடிக்கை தொடரும் என்பதால், கோடை விடுமுறை முடிந்து திரும்பும் பயணிகள் மற்றும் அலுவல் நிமித்தமாகப் பயணிப்பவர்கள் பெரும் சிரமத்திற்கு உள்ளாக நேரிடும்.

இதையும் படிங்க: பிஷ்கெக் சென்றடைந்தார் ராஜ்நாத் சிங்: ஷாங்காய் ஒத்துழைப்பு அமைப்பின் பாதுகாப்பு அமைச்சர்கள் கூட்டத்தில் பங்கேற்பு!

இருப்பினும், ரத்து செய்யப்பட்ட ரயில்களில் ஏற்கனவே முன்பதிவு செய்த பயணிகளுக்கு ஒரு நிம்மதியான செய்தியை ரயில்வே நிர்வாகம் அறிவித்துள்ளது. "ரத்து செய்யப்பட்ட ரயில்களில் பயணச்சீட்டு முன்பதிவு செய்த பயணிகளுக்கு, அதற்கான முழுத் தொகையும் (Full Refund) எந்தவித பிடித்தமுமின்றித் திருப்பி வழங்கப்படும்" எனத் தெற்கு ரயில்வே தெரிவித்துள்ளது.

ஆன்லைன் மூலம் பதிவு செய்தவர்களுக்கு அவர்களின் வங்கிக் கணக்கிலேயே பணம் வரவு வைக்கப்படும். பயணிகள் தங்கள் பயணத்தைத் திட்டமிடும் முன் ரயில்வேயின் அதிகாரப்பூர்வ இணையதளம் அல்லது 'யுடிஎஸ்' (UTS) செயலியில் ரயில்களின் தற்போதைய நிலையைச் சரிபார்த்துக் கொள்ளுமாறு அறிவுறுத்தப்பட்டுள்ளனர்.

இதையும் படிங்க: வழக்கறிஞராகப் பதிவு செய்தார் பேரறிவாளன்! 31 ஆண்டு சிறைவாசத்திற்குப் பின் நீதிமன்றத்தில் புதிய தொடக்கம்!