காசா முனையை நிர்வகித்து வரும் ஹமாஸ் ஆயுதக்குழுவினர் கடந்த 2023ம் ஆண்டு அக்டோபர் 7ம் தேதி இஸ்ரேலுக்குள் புகுந்து பயங்கரவாத தாக்குதல் நடத்தினர். இந்நிலையில் இரண்டு ஆண்டுகளாக நீடித்து வரும் இஸ்ரேல்-ஹமாஸ் போரில் முக்கிய திருப்பமாக, இஸ்ரேல் அரசு காசாவில் தற்காலிக போர் நிறுத்தத்திற்கு ஒப்புதல் அளித்துள்ளது. இந்த ஒப்பந்தம் அமெரிக்க அதிபர் டொனால்ட் டிரம்பின் தலைமையிலான 20 அம்ச அமைதித் திட்டத்தின் முதல் கட்டமாகும். இதையடுத்து, காசாவில் போர் நிறுத்தம் இன்று முதல் (அக்டோபர் 10) உடனடியாக அமலுக்கு வந்துள்ளது.
இஸ்ரேல் பிரதமர் பெஞ்சமின் நெதன்யாகு அலுவலகம் வெளியிட்ட அறிக்கையின்படி, அக்டோபர் 9 அன்று இரவு அமைச்சரவை கூட்டத்தில் இந்த ஒப்பந்தத்திற்கு ஒப்புதல் அளிக்கப்பட்டது. போர் நிறுத்தம் அரசு ஒப்புதலுக்குப் பிறகு உடனடியாக அல்லது 24 மணி நேரத்திற்குள் தொடங்கும். இதனைத் தொடர்ந்து, 24 மணி நேர சட்டரீதியான ஆட்சேபனை காலம் இருக்கும். அதன் பிறகு 72 மணி நேர கவுண்டவுன் தொடங்கி, பிணைக் கைதிகள் விடுவிக்கப்படுவார்கள்.
இதையும் படிங்க: முடிவுக்கு வரும் காசா போர்..?? டிரம்ப் சொன்ன விஷயம் என்ன..??
இந்த ஒப்பந்தத்தின் முதல் கட்டத்தில், ஹமாஸ் கையில் உள்ள 48 பிணைக் கைதிகள் (உயிருடன் இருப்பவர்கள் மற்றும் இறந்தவர்களின் உடல்கள்) விடுவிக்கப்படுவார்கள். இதற்கு ஈடாக, இஸ்ரேல் 250 ஆயுள் தண்டனை பெற்ற பாலஸ்தீன கைதிகள் மற்றும் அக்டோபர் 7, 2023க்குப் பிறகு கைது செய்யப்பட்ட 1,700 பாலஸ்தீனர்களை விடுவிக்கும். மேலும் இஸ்ரேல், காசாவில் இருந்து ராணுவத்தை திரும்ப பெற்றுக்கொண்டு, மனிதாபிமான உதவிகள் தடையின்றி செல்ல அனுமதிக்கும்.
இந்த அமைதி ஒப்பந்தத்தை அமெரிக்கா, கத்தார், எகிப்து மற்றும் துருக்கி ஆகிய நாடுகள் இடைத்தரகர்களாக செயல்பட்டு உருவாக்கின. டிரம்ப் தலைமையிலான குழு, ஷார்ம் எல்-ஷெய்க் மற்றும் கெய்ரோவில் பேச்சுவார்த்தைகளை நடத்தியது. அரபு நாடுகளான சவுதி அரேபியா, ஐக்கிய அரபு அமீரகம், ஜோர்டான் மற்றும் மொராக்கோ ஆகியவை இதற்கு ஆதரவு தெரிவித்துள்ளன. மேலும் ஈரான் சர்வதேச கண்காணிப்பை வலியுறுத்தியுள்ளது.
இருப்பினும், ஹமாஸ் நிரந்தர போர் நிறுத்தத்தை விரும்பியது, ஆனால் இஸ்ரேல் தற்காலிக ஒப்பந்தத்தையே ஏற்றுக்கொண்டது. அடுத்த கட்டங்களில் ஹமாஸ் ஆயுதமிழப்பு, காசா மறுகட்டமைப்பு, பாலஸ்தீன அதிகார அமைப்பு மறுசீரமைப்பு மற்றும் பாலஸ்தீன சுயாட்சி போன்றவை குறித்து விவாதிக்கப்படும். மேலும் “அமைதி வாரியம்” என்ற சர்வதேச கண்காணிப்பு அமைப்பு உருவாக்கப்படும்.
இந்த போர் நிறுத்தம் காசாவில் உள்ள 2.3 மில்லியன் மக்களுக்கு நிவாரணம் அளிக்கும் என எதிர்பார்க்கப்படுகிறது. போரால் 45,000க்கும் மேற்பட்டோர் கொல்லப்பட்ட நிலையில், பெரும் அழிவு ஏற்பட்டது. மேலும் இந்த போர் நிறுத்தத்திற்கு பிணைக் கைதிகளின் குடும்பங்கள் மகிழ்ச்சி தெரிவித்துள்ளனர். எனினும், ஒப்பந்தம் முழுமையாக நிறைவேற்றப்படுமா என்பது காலம் தான் பதிலளிக்கும்.
இதையும் படிங்க: முடிவுக்கு வரும் காசா போர்..?? டிரம்ப் சொன்ன விஷயம் என்ன..??