இந்தியா மற்றும் இலங்கையில் நடைபெற்று வரும் 10-வது ஐசிசி ஆண்கள் டி20 உலகக் கோப்பை கிரிக்கெட் தொடரில் பெரும் சர்ச்சை எழுந்துள்ளது. 20 அணிகள் பங்கேற்றுள்ள இத்தொடரில் 5 பிரிவுகளாக அணிகள் பிரிக்கப்பட்டுள்ளன.

'ஏ' பிரிவில் உள்ள இந்தியா மற்றும் பாகிஸ்தான் அணிகள் வரும் பிப்ரவரி 15-ஆம் தேதி கொழும்பு பிரேமதாசா மைதானத்தில் மோத உள்ளன. இந்த போட்டி கிரிக்கெட் உலகின் மிகவும் எதிர்பார்க்கப்படும் மற்றும் வருவாய் தரும் போட்டியாகும்.

ஆனால் பாகிஸ்தான் அரசு, இந்தியாவுடனான இந்த போட்டியை மட்டும் புறக்கணிக்க முடிவு செய்துள்ளது. வங்கதேசத்துக்கு ஆதரவு தெரிவிக்கும் வகையில் இந்த முடிவு எடுக்கப்பட்டதாக பாகிஸ்தான் பிரதமர் ஷெபாஸ் ஷெரீப் தெரிவித்தார்.

இதையும் படிங்க: 10வது டி20 உலகக் கோப்பை கிரிக்கெட் தொடர் இன்று துவக்கம்!! முதல் நாளில் 3 ஆட்டங்கள்; இந்தியா - அமெரிக்கா மோதல்!

வங்கதேசம் ஐசிசியால் தொடரிலிருந்து நீக்கப்பட்டதைத் தொடர்ந்து இந்த அறிவிப்பு வெளியானது. இதனால் பாகிஸ்தான் அணி மற்ற போட்டிகளில் விளையாடினாலும், இந்தியாவுடன் மட்டும் ஆட மறுப்பதாக அறிவித்தது.

இதை ஏற்க ஐசிசி (சர்வதேச கிரிக்கெட் கவுன்சில்) மறுத்துவிட்டது. புறக்கணிப்பு தொடரின் ஒருமைப்பாட்டை பாதிக்கும் என்றும், கடுமையான விளைவுகளை சந்திக்க நேரிடும் என்றும் ஐசிசி எச்சரித்தது. 'ஃபோர்ஸ் மேஜூர்' (கட்டாய சூழல்) என்ற காரணத்தை பாகிஸ்தான் கூறினாலும், ஐசிசி அதை ஏற்கவில்லை.

இதையடுத்து ஐசிசி துணைத் தலைவர் இம்ரான் குவாஜா, அசோசியேட் உறுப்பினர் இயக்குநர் முபாஷிர் உஸ்மானி ஆகியோர் பாகிஸ்தான் கிரிக்கெட் வாரிய தலைவர் மோசின் நக்வியுடன் லாகூரில் நீண்ட பேச்சுவார்த்தை நடத்தினர்.

வங்கதேச கிரிக்கெட் வாரியத் தலைவர் அமினுல் இஸ்லாமும் இந்த சந்திப்பில் பங்கேற்றார். இந்த பேச்சுவார்த்தை முக்கியத்துவம் வாய்ந்ததாக அமைந்தது.

பாகிஸ்தான் கிரிக்கெட் வாரியம் ஐசிசிக்கு 3 நிபந்தனைகளை விதித்துள்ளதாக தகவல்கள் தெரிவிக்கின்றன. வருவாய் பகிர்வை அதிகரிக்க வேண்டும், இந்தியா-பாகிஸ்தான் இருதரப்பு தொடர்களை மீண்டும் தொடங்க வேண்டும், போட்டியின்போது இந்திய வீரர்கள் பாகிஸ்தான் வீரர்களுடன் கைகுலுக்க வேண்டும் என்பது அவை. ஆனால் இறுதி முடிவு பாகிஸ்தான் அரசின் கையில்தான் உள்ளது என்று தெரிவிக்கப்பட்டுள்ளது.

மோசின் நக்வி பிரதமர் ஷெபாஸ் ஷெரீப்பை சந்தித்து ஆலோசனை நடத்த உள்ளார். அடுத்த 24 மணி நேரத்தில் இறுதி முடிவு தெரியவரும் என எதிர்பார்க்கப்படுகிறது. இந்த சர்ச்சை தொடரின் மிக முக்கிய போட்டியை பாதிக்கும் அபாயம் உள்ளது.

ரசிகர்கள் மத்தியில் பெரும் எதிர்பார்ப்பு நிலவுகிறது. ஐசிசி இந்த பிரச்சினையை விரைவில் தீர்க்க வேண்டும் என்ற கோரிக்கை வலுத்து வருகிறது.

இதையும் படிங்க: இந்தியா vs பாகிஸ்தான்: டி20 உலகக் கோப்பை போட்டி நடக்குமா? அடுத்த 24 மணி நேரத்தில் இறுதி முடிவு!