2026 சட்டசபைத் தேர்தல் நெருங்கும் நேரத்தில் தமிழக அரசியலில் பரங்கில் பரபரப்பான திருப்பம் ஏற்பட்டுள்ளது. தமிழக வெற்றிக் கழகத் தலைவர் நடிகர் விஜய்யுடன் கூட்டணி குறித்து நேரடியாகப் பேசும்படி காங்கிரஸ் மேலிடம் தமிழக நிர்வாகிகளுக்கு ரகசிய உத்தரவு பிறப்பித்துள்ளது. 

“விஜய் என்ன எதிர்பார்க்கிறார், எத்தனை தொகுதிகள் கேட்கிறார், ஆட்சியில் என்ன பங்கு வேண்டும் என்கிறார் என்பதை நேரடியாகக் கேட்டுத் தெரிந்துகொள்ளுங்கள்” என்று ராகுல் காந்தி உத்தரவிட்டதாக காங்கிரஸ் உயர்மட்ட வட்டாரங்கள் தெரிவிக்கின்றன.

தற்போது தி.மு.க. கூட்டணியில் இருக்கும் காங்கிரஸ், தமிழகத்தில் தனித்தும் போட்டியிட முடியாது, தி.மு.க.வுடன் தொடர்ந்தாலும் 20–25 தொகுதிகளுக்கு மேல் கிடைக்கும் நிலை உள்ளது. ஆனால் விஜய்யின் த.வெ.க. கூட்டணியில் இணைந்தால், “ஆட்சியில் பங்கு” என்ற உறுதியின் அடிப்படையில் அதிக தொகுதிகளும், அமைச்சர் பதவிகளும் கிடைக்க வாய்ப்பு இருப்பதாக தமிழக காங்கிரஸ் முன்னாள் தலைவர்கள் சிலர் மேலிடத்தில் வலியுறுத்தி வருகின்றனர். இதன் காரணமாகவே ராகுல் காந்தி, விஜய்யின் மனநிலையை நேரடியாக அறிய முடிவு செய்துள்ளார்.

இதையும் படிங்க: நன்றி மறந்தவர்கள்!! துரோகம் செய்தவர்களுக்கு பாடம் புகட்டும் மாநாடு! பிரேமலதா ஆவேசம்!

ஏற்கெனவே ஒரு தமிழக காங்கிரஸ் மூத்த நிர்வாகி விஜய்யை ரகசியமாகச் சந்தித்துப் பேசியதாகத் தெரிகிறது. விரைவில் டெல்லியில் இருந்து வரும் காங்கிரஸ் முக்கியத் தலைவர் ஒருவர் சென்னை வந்து விஜய்யை நேரில் சந்திக்க ஏற்பாடு செய்யப்பட்டுள்ளது.

அதே நேரத்தில், அகில இந்திய காங்கிரஸ் பொதுச்செயலர் கே.சி. வேணுகோபால் தமிழக காங்கிரஸாருக்கு தெளிவான உத்தரவு பிறப்பித்துள்ளார்: “தி.மு.க. கூட்டணியில் தொடர்வது என்று முடிவாகியுள்ளது. 

தொகுதிப் பங்கீடு பேச்சுக்கு குழு அமைக்கப்படும். ஆனால் தி.மு.க. ஆதரவாளர்களான காங்கிரஸ் தலைவர்கள் யாரும் விஜய்யை விமர்சிக்கக் கூடாது.” இந்த இரட்டை நிலைப்பாடு தமிழக காங்கிரஸில் பெரும் குழப்பத்தை ஏற்படுத்தியுள்ளது.

த.வெ.க. வட்டாரங்கள் கூறுகையில், “தேசிய அளவில் பா.ஜ.க.வை எதிர்க்க காங்கிரஸுக்கு தமிழகத்தில் வலுவான கூட்டணி தேவை. தி.மு.க.வை விட அதிக தொகுதிகளை விட்டுக்கொடுத்து, காங்கிரஸ் – த.வெ.க. – சில சிறிய கட்சிகள் இணைந்தால் ஆட்சியைக் கைப்பற்ற முடியும். 58 ஆண்டுகளுக்குப் பிறகு தமிழகத்தில் காங்கிரஸ் ஆட்சியில் பங்கு பெறலாம்” என்று விஜய் தரப்பு ராகுலிடம் தெரிவித்துள்ளதாகக் கூறப்படுகிறது.

விஜய் இதுவரை எந்தக் கட்சியும் தனது கூட்டணியில் இணையவில்லை என்றாலும், என்.டி.ஏ.வில் இருந்து வெளியேறிய சில கட்சிகள் மறைமுகமாகப் பேசி வருவதாகவும் தெரிகிறது. இந்நிலையில் காங்கிரஸுடன் கூட்டணி அமைந்தால், தமிழக அரசியல் வரைபடமே மாறிப்போகும் என்று அரசியல் விமர்சகர்கள் கூறினர்.

இதையும் படிங்க: அடுத்த டார்கெட் தமிழ்நாடு! உத்தரவாதம் கொடுத்தார் மோடி! உற்சாகத்தில் பாஜக தொண்டர்கள்!