டாடா மோட்டார்ஸ் நிறுவனத்தின் புதிய ஐகானிக் எஸ்யூவி மாடலான டாடா சியாரா, விற்பனை தொடங்கிய சில வாரங்களிலேயே பெரும் வெற்றியைப் பதிவு செய்துள்ளது. நிறுவனம் அறிவித்துள்ளபடி, வாடிக்கையாளர்களுக்கு 10,000க்கும் மேற்பட்ட சியாரா கார்களை வெற்றிகரமாக டெலிவரி செய்துள்ளது. இது டெலிவரி தொடங்கிய ஜனவரி 15, 2026 முதல் வெறும் 47 நாட்களிலேயே (சுமார் 6-7 வாரங்கள்) நிகழ்ந்த சாதனையாகும்.

இதற்கு முன்னதாக, கடந்த டிசம்பர் 2025-இல் முன்பதிவு தொடங்கிய முதல் 24 மணி நேரத்திலேயே 70,000க்கும் மேற்பட்டோர் உறுதியான முன்பதிவுகளை (confirmed bookings) செய்திருந்தனர். மேலும், 1.35 லட்சத்திற்கும் அதிகமான வாடிக்கையாளர்கள் தங்கள் விருப்பமான வேரியன்ட் மற்றும் கான்ஃபிகரேஷன்களைத் தேர்வு செய்து முன்பதிவு வரிசையில் இணைந்திருந்தனர். இதனால் மொத்த முன்பதிவுகள் 1 லட்சத்தைத் தாண்டியதாக டாடா மோட்டார்ஸ் தெரிவித்திருந்தது. 

இந்த அமோக வரவேற்பு, சியாராவின் மீதான மக்களின் எதிர்பார்ப்பையும் நம்பிக்கையையும் தெளிவாகக் காட்டுகிறது. பழைய டாடா சியாராவின் நினைவுகளை மீட்டெடுத்து, நவீன தொழில்நுட்பம், பாதுகாப்பு அம்சங்கள் மற்றும் ஸ்டைலிஷ் டிசைனுடன் மீண்டும் அறிமுகப்படுத்தப்பட்ட இந்த எஸ்யூவி, மிட்-சைஸ் எஸ்யூவி பிரிவில் குறிப்பிடத்தக்க போட்டியை ஏற்படுத்தியுள்ளது. 

இதையும் படிங்க: Lenovo-வில் புதிய டேப்லெட் மாடல் ரிலீஸ்..!! இத்தனை சிறப்பம்சங்களா..!! என்ன விலை தெரியுமா..??

பெட்ரோல் மற்றும் டீசல் என்ஜின் ஆப்ஷன்களுடன், பல்வேறு வேரியன்ட்களில் (Smart Plus முதல் Accomplished Plus வரை) கிடைக்கும் இது, ரூ.11.49 லட்சம் முதல் ரூ.21.29 லட்சம் வரையிலான எக்ஸ்-ஷோரூம் விலையில் விற்பனை செய்யப்படுகிறது. டாடா மோட்டார்ஸ் தற்போது உற்பத்தியை அதிகரித்து, மாதம் 15,000 யூனிட்கள் வரை உற்பத்தி செய்ய திட்டமிட்டுள்ளதாகத் தகவல்கள் தெரிவிக்கின்றன. 

இதன்மூலம், காத்திருப்பு நேரத்தைக் குறைத்து, மேலும் அதிக வாடிக்கையாளர்களுக்கு விரைவில் டெலிவரி செய்ய முடியும் என எதிர்பார்க்கப்படுகிறது. இந்த சாதனை, டாடா மோட்டார்ஸின் வளர்ச்சி மற்றும் வாடிக்கையாளர் நம்பிக்கையை மீண்டும் உறுதிப்படுத்துகிறது. "Escape Mediocre" என்ற டேக்லைனுடன் சாலைகளில் திரும்பிய சியாரா, இனி பல லட்சக்கணக்கானோரின் தேர்வாக மாறும் என்பது உறுதியாகத் தெரிகிறது.