அதிமுக சார்பில் ஏற்கனவே திட்டமிட்டபடி ஜனவரி 11 மற்றும் 12 ஆகிய தேதிகளில் நடைபெறவிருந்த நேர்காணல்கள், நிர்வாகக் காரணங்களால் முறையே ஜனவரி 12 மற்றும் ஜனவரி 24 ஆகிய தேதிகளுக்கு ஒத்திவைக்கப்பட்டுள்ளன. சென்னை ராயப்பேட்டையில் உள்ள தலைமைக் கழகமான எம்.ஜி.ஆர். மாளிகையில் இந்த நேர்காணல்கள் நடைபெறும். அதிமுக பொதுச் செயலாளர் எடப்பாடி கே. பழனிசாமி அவர்களின் ஒப்புதலோடு வெளியிடப்பட்டுள்ள இந்த அறிவிப்பு, விருப்ப மனு அளித்தவர்களிடையே பெரும் பரபரப்பை ஏற்படுத்தியுள்ளது. தொகுதி நிலவரங்களை அலசி ஆராயும் இந்த நேர்காணலில், விண்ணப்பித்தவர்கள் மட்டும் அசல் ரசீதுடன் நேர்காணலில் பங்கேற்க வேண்டும் எனத் தலைமைக் கழகம் ‘ஸ்ட்ரிக்ட்’ ஆக உத்தரவிட்டுள்ளது.

தமிழ்நாடு, புதுச்சேரி மற்றும் கேரளா ஆகிய மாநிலங்களுக்கான சட்டமன்றத் தேர்தல்களில் அதிமுக சார்பில் போட்டியிட வாய்ப்புக் கோரி விண்ணப்பித்தவர்களுக்கான நேர்காணல் முறையில் சிறு மாற்றங்கள் செய்யப்பட்டுள்ளன. புதிய அட்டவணையின்படி, ஜனவரி 12-ஆம் தேதி திங்கட்கிழமை காலை 9.30 மணிக்கு விருதுநகர் மேற்கு மாவட்டத்துடன் நேர்காணல் தொடங்குகிறது. அதனைத் தொடர்ந்து கடலூர், நாகப்பட்டினம் மற்றும் மயிலாடுதுறை மாவட்டங்களைச் சேர்ந்தவர்களிடம் எடப்பாடியார் நேர்காணல் நடத்துகிறார். அன்றைய தினம் பிற்பகல் 4 மணி முதல் திருச்சி, பெரம்பலூர், அரியலூர், கிருஷ்ணகிரி மற்றும் தருமபுரி மாவட்டங்களுக்கான வேட்பாளர் தேர்வு நடைபெறும்.

மீதமுள்ள மாவட்டங்களுக்கான நேர்காணல் வரும் ஜனவரி 24-ஆம் தேதி சனிக்கிழமைக்கு மாற்றப்பட்டுள்ளது. அன்று காலை 9.30 மணி முதல் விழுப்புரம், கள்ளக்குறிச்சி, தூத்துக்குடி, தென்காசி மற்றும் திருவண்ணாமலை வடக்கு, தெற்கு மாவட்டங்களுக்கு நேர்காணல் நடைபெறும். அன்றைய தினம் மாலை 4 மணி முதல் திருவண்ணாமலை கிழக்கு, மத்தியம், வேலூர், ராணிப்பேட்டை மற்றும் திருப்பத்தூர் மாவட்டங்களைச் சேர்ந்த விருப்ப மனுதாரர்கள் அழைக்கப்பட்டுள்ளனர்.

இதையும் படிங்க: “ராயப்பேட்டையில் குவியும் அதிமுக நிர்வாகிகள்!” ஜனவரி 9 முதல் நேர்காணல்; வேட்பாளர் தேர்வில் இபிஎஸ் காட்டும் வேகம்!

இந்த நேர்காணலில் பங்கேற்கும் வேட்பாளர்கள் தொகுதி நிலவரம் மற்றும் தங்களது வெற்றி வாய்ப்புகள் குறித்துத் தலைமைக்கு விளக்க வேண்டும். “தங்களுக்காக விருப்ப மனு அளித்துள்ளவர்கள் மட்டும்” இதில் அனுமதிக்கப்படுவார்கள் என்பதால், ஆதரவாளர்களை அழைத்து வருவதைத் தவிர்க்க வேண்டும் என அறிவுறுத்தப்பட்டுள்ளது. விருப்ப மனு பெற்றதற்கான அசல் ரசீதைச் சமர்ப்பிப்பது கட்டாயமாக்கப்பட்டுள்ளது. வேட்பாளர் தேர்வில் எடப்பாடியார் மிகவும் தீவிரமாக இருப்பதால், இந்த நேர்காணல் அதிமுக முகாமில் ஒரு மினி ‘தேர்தல்’ போன்ற சூழலை உருவாக்கியுள்ளது.

இதையும் படிங்க: “அதிமுக விருப்ப மனு தாக்கல் நிறைவு” – 9,500 பேர் மனு தாக்கல்; நேர்காணல் எப்போது? விரைவில் முக்கிய அறிவிப்பு!