சட்டசபை தேர்தல் தோல்விக்குப் பிறகு அ.தி.மு.க.வில் உள்கட்சி அதிருப்தி அதிகரித்து வரும் நிலையில், கட்சிக்காக நீண்ட காலமாக உழைத்த நிர்வாகிகளுக்கு உரிய அங்கீகாரம் வழங்கப்படவில்லை என இளைஞரணி நிர்வாகிகள் கடும் அதிருப்தி தெரிவித்துள்ளதாக தகவல் வெளியாகியுள்ளது. இந்த விவகாரம் கட்சி வட்டாரங்களில் பரபரப்பை ஏற்படுத்தியுள்ளது.

சென்னையில் உள்ள அ.தி.மு.க. தலைமை அலுவலகத்தில், இளைஞரணி மாநில செயலாளரும் முன்னாள் எம்.பி.யுமான விஜயகுமார் தலைமையில் மாநில மற்றும் மாவட்ட நிர்வாகிகள் ஆலோசனைக் கூட்டம் நடைபெற்றது. இதில், சட்டசபை தேர்தலுக்குப் பிறகான கட்சி நிலை, இளைஞரணியின் செயல்பாடு மற்றும் எதிர்கால பணிகள் குறித்து விரிவாக விவாதிக்கப்பட்டதாக கூறப்படுகிறது.

கூட்டத்தில் பேசிய பல மாவட்ட நிர்வாகிகள், கட்சியில் உண்மையாக உழைக்கும் தொண்டர்களுக்கு போதிய முக்கியத்துவம் வழங்கப்படவில்லை என்று ஆதங்கம் தெரிவித்ததாக தகவல் வெளியாகியுள்ளது. கட்சியில் பதவிகளைப் பெற்ற பிறகு வேறு அரசியல் கட்சிகளுக்கு செல்வோருக்கே முன்னுரிமை வழங்கப்படுவதாகவும், நீண்ட காலமாக கட்சிக்காக உழைத்தவர்களின் பங்களிப்பு மதிக்கப்படவில்லை என்றும் அவர்கள் குற்றம்சாட்டியதாக கூறப்படுகிறது.

இதையும் படிங்க: அதிமுகவில் தினகரனை சேருங்கள்!! அண்ணாமலையுடன் சேர்ந்து பயணியுங்கள்! எடப்பாடிக்கு குவியும் அட்வைஸ்!

மேலும், சட்டசபை தேர்தலின் போது இளைஞரணிக்கு உரிய பொறுப்புகள் வழங்கப்படவில்லை என்றும், வாக்குச்சாவடி குழுக்கள் அமைக்கும் பணியிலும் இளைஞரணி நிர்வாகிகள் புறக்கணிக்கப்பட்டதாகவும் அவர்கள் தெரிவித்துள்ளனர். மாவட்ட செயலாளர்கள் தங்களுக்கு நெருக்கமானவர்களுக்கு மட்டுமே வாய்ப்பு வழங்கியதால், புதிய இளைஞர்களை கட்சியில் ஈர்ப்பது கடினமான சூழல் உருவானதாகவும் கருத்து தெரிவிக்கப்பட்டதாக கூறப்படுகிறது.

இதுபோன்ற செயல்பாடுகளே தேர்தல் தோல்விக்கான முக்கிய காரணங்களில் ஒன்றாக அமைந்ததாக கூட்டத்தில் பலர் சுட்டிக்காட்டியதாக தகவல்கள் தெரிவிக்கின்றன. இனிமேலாவது கட்சிக்கு விசுவாசமாக செயல்படும் நிர்வாகிகள் மற்றும் தொண்டர்களுக்கு உரிய அங்கீகாரமும் பொறுப்புகளும் வழங்க வேண்டும் என அனைவரும் வலியுறுத்தியதாக கூறப்படுகிறது. இந்த கோரிக்கைகளை கட்சி தலைமையிடம் எடுத்துச் செல்வதாக விஜயகுமார் உறுதியளித்ததுடன், அதிகளவில் இளைஞர்களை கட்சியில் இணைக்கும் பணிகளை தீவிரப்படுத்துமாறும் அறிவுறுத்தியதாக தகவல் வெளியாகியுள்ளது.

இதற்கிடையில், சட்டசபை தேர்தல் தோல்விக்கான காரணங்களை ஆய்வு செய்யும் வகையில் அ.தி.மு.க. பொதுச்செயலாளர் பழனிசாமி, மாவட்ட நிர்வாகிகளுடன் தொடர்ந்து ஆலோசனை நடத்தி வருகிறார். இதுவரை 23 மாவட்ட நிர்வாகிகளை சந்தித்து கருத்துகளை கேட்டுள்ள அவர், வரும் நாட்களில் மேலும் பல மாவட்ட நிர்வாகிகளுடன் ஆலோசனை நடத்த உள்ளதாக கட்சி வட்டாரங்கள் தெரிவித்துள்ளன.

இதையும் படிங்க: கூட்டத்திற்கு வராத ஓசூர் எம்.எல்.ஏ கட்சி பதவி பறிப்பு! ஆக்சனில் இறங்கிய எடப்பாடி பழனிசாமி!