மத்தியக் கிழக்கில் ஈரான் மற்றும் இஸ்ரேல் இடையே மூண்டுள்ளப் போர் பதற்றம் காரணமாகத் துபாயில் ட்ரோன் மற்றும் ஏவுகணைத் தாக்குதல்கள் நடத்தப்பட்டு வரும் நிலையில், அங்குள்ள நடிகர் அஜித்குமார் குறித்து அவரது மேலாளர் சுரேஷ் சந்திரா முக்கியத் தகவலை வெளியிட்டுள்ளார்.

கார் பந்தயப் பயிற்சிகளுக்காகத் தனது அஜித் குமார் ரேசிங் (AK Racing) குழுவுடன் துபாயில் தங்கியுள்ள நடிகர் அஜித், தற்போது முழுக்க முழுக்கப் பாதுகாப்பாகவும், நலமுடனும் இருப்பதாக சுரேஷ் சந்திரா உறுதிப்படுத்தியுள்ளார். துபாய் சர்வதேச விமான நிலையம் மற்றும் சில பகுதிகளில் தாக்குதல் நடத்தப்பட்டதாகச் செய்திகள் வெளியானதையடுத்து, அஜித் ரசிகர்களிடையே எழுந்தப் பெரும் கவலையைப் போக்கும் வகையில் இந்த விளக்கம் அளிக்கப்பட்டுள்ளது.

ஈரானின் ஏவுகணைகளைத் துபாய் பாதுகாப்புப் படைகள் இடைமறித்து அழித்தபோது ஏற்பட்ட சத்தம் மற்றும் சிதறல்களால் நகரில் பதற்றம் நிலவுகிறது. இருப்பினும், அஜித் தங்கியுள்ளப் பகுதி மற்றும் பந்தயத் தளம் (Dubai Autodrome) போன்ற இடங்கள் பாதுகாப்பாக இருப்பதாகத் தெரிகிறது.

இதையும் படிங்க: துபாய் செல்ல அனுமதி கோரிய அசோக் குமார்: மனு மீதான விசாரணையை மார்ச் 3-க்கு ஒத்திவைத்தது நீதிமன்றம்!

2026-ஆம் ஆண்டுக்கான பல்வேறு கார் பந்தயத் தொடர்களில் பங்கேற்க அஜித் தீவிரமாகத் தயாராகி வருகிறார். முன்னதாக ஜனவரி மாதம் நடைபெற்ற பந்தயங்களில் அவர் மேடை ஏறி (Podium finish) சாதனை படைத்திருந்தது குறிப்பிடத்தக்கது. தற்போது நிலவும் அசாதாரணச் சூழலால் பயிற்சிகள் தற்காலிகமாகப் பாதிக்கப்பட வாய்ப்புள்ளதா என்பது குறித்து இன்னும் அதிகாரப்பூர்வத் தகவல் இல்லை.

ரசிகர்கள் யாரும் கவலைப்பட வேண்டாம்; அஜித் சார் மற்றும் அவரது குழுவினர் அனைவரும் பாதுகாப்பான இடத்தில் உள்ளனர்" என சுரேஷ் சந்திரா தனது சமூக வலைதளப் பக்கத்தில் குறிப்பிட்டுள்ளார்.

தாக்குதல் காரணமாகத் துபாய் வான்வெளி மூடப்பட்டுள்ளதால், அஜித் மற்றும் அவரது குழுவினர் எப்போது சென்னை திரும்புவார்கள் என்பது நிலைமை சீரான பிறகே முடிவெடுக்கப்படும் என எதிர்பார்க்கப்படுகிறது.

இதையும் படிங்க: கராச்சி அமெரிக்க தூதரகம் மீது தாக்குதல்... துப்பாக்கிச்சூட்டில் 8 பேர் பலி! பாகிஸ்தானில் போர் பதற்றம்!