பெங்களூரு: கூகுளின் ஜெமினி ஏஐயின் 'நானோ பனானா' மாடலைப் பயன்படுத்தி, போலியான ஆதார் மற்றும் பான் கார்டுகளை தயாரித்து எக்ஸ் (டிவிட்டர்) பக்கத்தில் பதிவிட்ட பெங்களூரு மென்பொருள் இன்ஜினியர் ஹர்வீன் சிங் சதா, ஏஐ தொழில்நுட்பத்தின் ஆபத்துகளை எடுத்துக்காட்டியுள்ளார். இந்த போலி ஐடிகள் அளவுக்கு அளவாக 'ரியல்' போல் தெரிந்ததால், சமூக வலைதளங்களில் பரபரப்பு ஏற்பட்டுள்ளது. “இது போன்ற ஏஐ வளர்ச்சி, அடையாளத் திருட்டு, பயங்கரவாதிகளின் நாசவேலைகளுக்கு வழிவகுக்கும்” என நெட்டிசன்கள் அச்சம் தெரிவித்து வருகின்றனர்.

சர்வம் ஏஐ நிறுவனத்தில் பணிபுரியும் ஹர்வீன் சிங் சதா, கூகுளின் ஜெமினி ஏஐயின் புதிய 'நானோ பனானா ப்ரோ' அப்டேட்டை சோதித்துப் பார்த்தார். இந்த டூலைப் பயன்படுத்தி, கற்பனை நபர் 'ட்விட்டர்பிரீத் சிங்' பெயரில் ஆதார் மற்றும் பான் கார்டுகளை உருவாக்கினார். போலி ஆதார் கார்டில் தெளிவான புகைப்படம், சரியான லேஅவுட், QR கோட் போன்றவை இருந்தன. பான் கார்டும் அப்படியே – முழுமையான விவரங்கள், லோகோ, எல்லாம் சரியாக இருந்தன. ஆனால், நெருக்கமாகப் பார்த்தால் ஜெமினி ஏஐயின் சிறிய வாட்டர்மார்க் தெரிந்தது.

எக்ஸ் பக்கத்தில் இந்தப் படங்களைப் பதிவிட்ட சதா, “நானோ பனானா சூப்பர், ஆனால் இது ஒரு பிரச்சினை. இது போலி ஐடி கார்டுகளை அளவுக்கு அளவாக உருவாக்கும். பழைய இமேஜ் வெரிஃபிகேஷன் சிஸ்டம்கள் தோல்வியடையும். கற்பனை நபரின் ஆதார், பான் உதாரணங்கள் இதோ” என்று எழுதினார். இந்தப் பதிவு 24 மணி நேரத்தில் லட்சக்கணக்கான வியூக்கள், ரீட்வீட்கள் பெற்றுள்ளது. சதாவின் இந்த சோதனை, ஏஐயின் வேகமான வளர்ச்சியால் ஏற்படும் பாதுகாப்பு ஆபத்துகளை உலகிற்கு எடுத்துக்காட்டியுள்ளது.

இதையும் படிங்க: சுவாமியே சரணம் ஐயப்பா! சபரிமலை பக்தர்களுக்கு குட் நியூஸ்! தேவஸம் போர்டு அப்டேட்!

நெட்டிசன்கள் பலர் அதிர்ச்சி தெரிவித்துள்ளனர். “இது அடையாளத் திருட்டுக்கு ஏஐயைப் பயன்படுத்துவதற்கு ஈஸியாக மாற்றும். ஹோட்டல்கள், ஏர்போர்ட்டுகளில் ஐடி காட்டும்போது ஸ்கேன் செய்யாமல் பார்க்கிறார்கள். இது பெரிய சிக்கல்!” என்று ஒருவர் கூறினார்.

இன்னொருவர், “பயங்கரவாதிகள் இதைப் பயன்படுத்தி போலி ஐடிகளால் நாசவேலைகள் செய்யலாம். அரசு உடனடி நடவடிக்கை எடுக்க வேண்டும்” என எச்சரித்தார். சிலர் ஜெமினியின் 'சிந்த் ஐடி' டிஜிட்டல் ஃபிங்கர்பிரிண்ட் பற்றி கூறினர், ஆனால் சதா பதிலளித்தார், “எல்லா ஐடியையும் ஜெமினி ஆப்பில் ஸ்கேன் செய்ய யாரும் போக மாட்டார்கள்.”

இருப்பினும், சிலர் இதை ஜோக் ஆக எடுத்துக்கொண்டனர். “என் டிரைவிங் லைசென்ஸில் ஸ்பெல்லிங் மிஸ்டேக் ஃபிக்ஸ் பண்ண ஏஐ யூஸ் பண்ணலாம்!” என்று ஒருவர் கூறினார். இன்னொருவர், “ஆதாரில் கிளியர் பிக்ஸ் இருந்தா அது ஃபேக் தான்!” என்று நகைச்சுவையாக பதிலளித்தார். சதா, “இது பயத்தை ஏற்படுத்த வேண்டும், விழிப்புணர்வை உருவாக்க வேண்டும்” என்று தெளிவுபடுத்தினார்.

இந்த சம்பவம், ஏஐயின் இரண்டு முகங்களை வெளிப்படுத்தியுள்ளது. ஒரு திசையில், டிசைன், கலை, கல்வி போன்ற துறைகளில் புரட்சி; மறுபுறம், பாதுகாப்பு, தனியுரிமை, குற்றங்கள் போன்ற சவால்கள். இந்தியாவில் ஆதார், பான் போன்ற ஐடிகள் டிஜிட்டல் வெரிஃபிகேஷனுக்கு முக்கியமானவை.

ஆனால், QR ஸ்கேன், பேக்-எண்ட் சரிபார்ப்பு போன்றவை இல்லாத இடங்களில் இது பெரும் ஆபத்தாக மாறலாம். அரசு, தனியார் நிறுவனங்கள் உடனடியாக ஏஐ டெக்ட் செய்யும் டூல்களை அறிமுகப்படுத்த வேண்டும் என விஞ்ஞானிகள் கூறுகின்றனர். ஹர்வீன் சிங் சதாவின் இந்த 'எக்ஸ்பெரிமென்ட்', ஏஐ யுகத்தில் புதிய விழிப்புணர்வை ஏற்படுத்தியுள்ளது.
 

இதையும் படிங்க: விண்வெளியில் சிக்கித் தவிக்கும் வீரர்கள்! மீட்கப்புறப்பட்டது 'ஷென்சோ - 22'! ஒரே மாதத்தில் சாதித்த சீனா!