தமிழர் திருநாளாம் தைப்பொங்கல் நன்னாளில், ஒவ்வொரு தமிழரின் இல்லத்திலும் மகிழ்ச்சி பொங்கட்டும்; நமது மாநிலத்தின் வளர்ச்சி மேன்மேலும் வெல்லட்டும் எனத் தமிழக முதலமைச்சர் மு.க.ஸ்டாலின் தனது பொங்கல் வாழ்த்துகளைத் தெரிவித்துள்ளார்.

தை முதல் நாளாம் தமிழ்ப்புத்தாண்டு மற்றும் பொங்கல் பண்டிகையை முன்னிட்டுத் தமிழக மக்களுக்கு முதலமைச்சர் இன்று வாழ்த்துச் செய்தி வெளியிட்டுள்ளார். திராவிட மாடல் ஆட்சியில் தமிழகம் அடைந்துள்ள அபரிமிதமான வளர்ச்சியையும், உலக அரங்கில் தமிழ் இனம் பெற்றுள்ள அங்கீகாரத்தையும் தனது செய்தியில் கோடிட்டுக்காட்டியுள்ள அவர், ஒற்றுமையே நமது பலம் என்பதைத் தொண்டர்களுக்கும் பொதுமக்களுக்கும் நினைவூட்டியுள்ளார்.

முதலமைச்சர் வெளியிட்டுள்ள வாழ்த்துச் செய்தியில், "உழவர் பெருமக்களின் உழைப்பைப் போற்றும் இந்தப் பொங்கல் திருநாளில், 'பொங்கட்டும் மகிழ்ச்சி; வெல்லட்டும் தமிழ்நாடு' என்ற முழக்கத்தோடு வாழ்த்துகளைப் பகிர்ந்து கொள்கிறேன்" எனத் தெரிவித்துள்ளார். மேலும், "இன்று தமிழ்நாடு வெறும் மாநிலமாக மட்டுமல்ல, தொழில், கல்வி, மருத்துவம் மற்றும் சமூக நீதி எனப் பல்வேறு துறைகளில் இந்தியாவிற்கே முன்மாதிரியாகவும், முன்னணி மாநிலமாகவும் கம்பீரமாகத் திகழ்கிறது" எனப் பெருமிதத்துடன் குறிப்பிட்டுள்ளார்.

இதையும் படிங்க: டெல்டாவில் இன்றுடன் ஓய்கிறது மழை! தமிழ்நாடு வெதர்மேன் பிரதீப் ஜான் குட்நியூஸ்!

அரசின் நலத்திட்டங்கள் சாமானிய மக்களின் வீடுகளுக்குச் சென்று சேர்ந்துள்ளதைச் சுட்டிக்காட்டிய அவர், "மக்களின் நம்பிக்கையே இந்த அரசின் பலம். அந்த நம்பிக்கையைக் காப்பாற்றும் வகையில் நமது சாதனைகள் தொடரும்" என உறுதியளித்தார். அயலகத் தமிழர் தின விழாவில் உலகத் தமிழர்களைச் சந்தித்த மகிழ்வோடு, மாநிலம் முழுவதும் பொங்கல் பரிசுத் தொகுப்பு வழங்கப்பட்டுள்ளதையும் அவர் நினைவுகூர்ந்தார். "சாதி, மத பேதமின்றித் தமிழர்கள் அனைவரும் ஒரே குடும்பமாக இந்தப் பண்டிகையைக் கொண்டாடி, மாநிலத்தின் வளர்ச்சிக்குக் கைகோப்போம்" என முதலமைச்சர் தனது வாழ்த்துச் செய்தியில் அழைப்பு விடுத்துள்ளார்.

இதையும் படிங்க: "ஹேப்பி பொங்கல்.. போகிக்கும் லீவு கொடுத்தாச்சு! ஜனவரி 14 முதல் 18 வரை பள்ளிகள் விடுமுறை! தமிழக அரசு அதிரடி!