தமிழக சட்டமன்றத் தேர்தலை முன்னிட்டு அதிமுக பொதுச் செயலாளர் எடப்பாடி பழனிசாமி அவர்கள் இன்று தாம்பரம் தொகுதியில் சூறாவளிப் பயணம் மேற்கொண்டு தேர்தல் பரப்புரையாற்றினார். தாம்பரம் தொகுதி அதிமுக வேட்பாளர் சிட்லபாக்கம் ச. ராஜேந்திரன் அவர்களை ஆதரித்து, இரட்டை இலை சின்னத்திற்கு அவர் வாக்கு சேகரித்தார்.

ஏற்கனவே மயிலாப்பூர் கபாலீஸ்வரர் கோயிலில் வழிபாடு செய்துவிட்டுத் தனது பிரசாரத்தைத் தொடங்கிய எடப்பாடியார், தற்போது சென்னையின் புறநகர்ப் பகுதிகளில் தனது பிரசாரத்தை தீவிரப்படுத்தியுள்ளார்.

தமிழகத்தில் கம்யூனிஸ்ட் கட்சிகளுடன் கைகோர்த்துள்ள திமுக, அண்டை மாநிலமான புதுச்சேரியில் அவர்களைக் கழற்றிவிட்டுள்ளது. அதேபோல கேரளாவில் கம்யூனிஸ்ட் கட்சிக்கு எதிராகப் போட்டியிடுகிறது. மாநிலத்திற்கு மாநிலம் தனது சந்தர்ப்பவாதத்திற்காகக் கொள்கைகளை மாற்றிக்கொள்ளும் கட்சிதான் திமுக, என்று அவர் கடுமையாகச் சாடினார். கொள்கை பிடிப்பு இல்லாமல் திமுக-விடம் கம்யூனிஸ்ட் கட்சிகள் அடிமைப்பட்டுக் கிடப்பதாகவும், மக்கள் பிரச்சனைகளுக்காக அவர்கள் குரல் கொடுப்பதில்லை என்றும் அவர் விமர்சித்தார்.

இதையும் படிங்க: இழுபறி ஏதுமில்லை, இதுதான் எதார்த்தம்! திமுக கூட்டணி தொகுதி பங்கீடு குறித்து திருமாவளவன் பேட்டி!

தாம்பரம் தொகுதியின் முன்னாள் நாடாளுமன்ற உறுப்பினரும், செங்கல்பட்டு மேற்கு மாவட்டச் செயலாளருமான சிட்லபாக்கம் ராஜேந்திரன், தொகுதி மக்களின் தேவைகளை நன்கு அறிந்தவர்; அவருக்கு வாக்களித்து மிகப்பெரிய வெற்றியைத் தேடித்தர வேண்டும் என்று அவர் வேண்டுகோள் விடுத்தார்.

தாம்பரம் தொகுதியில் திமுக சார்பில் தற்போதுள்ள எம்.எல்.ஏ எஸ்.ஆர். ராஜா மீண்டும் களம் காண்கிறார். அதேபோல் தமிழக வெற்றிக் கழகம் சார்பில் கில்லி சரத்குமார் போட்டியிடுவதால், இத்தொகுதியில் மும்முனைப் போட்டி நிலவுகிறது. ஏப்ரல் 23-ஆம் தேதி வாக்குப்பதிவு நடைபெறவுள்ள நிலையில், எடப்பாடியாரின் இந்தப் பிரசாரம் அதிமுக தொண்டர்களிடையே பெரும் உற்சாகத்தை ஏற்படுத்தியுள்ளது.

இதையும் படிங்க: வெற்றி தலைவர் விஜய் அதிரடி! தமிழக வெற்றிக் கழகத்தின் 264 வேட்பாளர்கள் அறிமுகம்!