மணிப்பூர் மாநிலத்தில் குக்கி மற்றும் நாகா சமூகங்களுக்கு இடையே நீண்டகாலமாக நீடித்து வரும் இனப்பகை, அண்மையில் மீண்டும் கடுமையான வன்முறையாக வெடித்துள்ளது. 2023 ஆம் ஆண்டு தொடங்கிய இனக்கலவரத்தில் 300-க்கும் மேற்பட்டோர் உயிரிழந்த நிலையில், தொடர் வன்முறை காரணமாக 2025 பிப்ரவரியில் பாஜக அரசு கலைக்கப்பட்டு ஜனாதிபதி ஆட்சி அமலுக்கு வந்தது. கிட்டத்தட்ட ஓராண்டுக்குப் பிறகு 2026 பிப்ரவரியில் ஜனாதிபதி ஆட்சி நீக்கப்பட்டு, யு. கெம்சந்த் சிங் தலைமையில் மீண்டும் பாஜக அரசு அமைக்கப்பட்டது. ஆனால், அமைதி நீடிக்கவில்லை.

கடந்த வெள்ளி மற்றும் சனிக்கிழமைகளில் (அக்டோபர் 10-11) காம்ஜோங், உக்ருல் மற்றும் காங்போக்பி மாவட்டங்களில் நடைபெற்ற துப்பாக்கிச் சூட்டுச் சம்பவங்களில் குறைந்தது ஒன்பது பேர் கொல்லப்பட்டனர். காம்ஜோங் மாவட்டத்தின் குக்கி ஆதிக்க சசாத் (சாசாத்) கிராமத்தில் 22 வயதுப் பெண் ஒருவர் அடையாளம் தெரியாத ஆயுததாரிகளால் சுட்டுக் கொல்லப்பட்டதே வன்முறைக்குத் தூண்டுதலாக அமைந்தது. இதையடுத்து இரு தரப்பு ஆயுதக் குழுக்களுக்கும் இடையே பரஸ்பர தாக்குதல்கள் தொடர்ந்தன.

காங்போக்பி மாவட்டத்தின் மகுய் அஷாங் (லியாங்மை நாகா) கிராமத்தில் சனிக்கிழமை நடந்த தாக்குதலில், 52 வயதான அஜின்போ ரிங்சங்மை (அஜின்பாவ் ஆர்) உள்ளிட்ட சில நாகா கிராமக் காவலர்கள் கொல்லப்பட்டனர்.

இதையும் படிங்க: பற்றி எரியும் மணிப்பூர்..!! மீண்டும் வெடித்த மோதல்.. 8 பேர் பலி..!! உச்சக்கட்ட பதற்றம்..!!

அவரின் உடலில் தலை துண்டிக்கப்பட்டிருந்தது. தலை காணாமல் போன நிலையில், தலை இல்லாத சடலம் ஞாயிற்றுக்கிழமை இரவு இம்பாலில் உள்ள ஜவஹர்லால் நேரு மருத்துவ அறிவியல் நிறுவனம் (ஜேஎன்ஐஎம்எஸ்) மருத்துவமனைக்குக் கொண்டு செல்லப்பட்டது. சமூக ஊடகங்களில் ஆயுததாரிகள் தலையைக் காட்டும் காணொளி பரவியது.

மணிப்பூர் கூட்டுப் பழங்குடியினர் சபை (ஜாயிண்ட் ட்ரைப்ஸ் கவுன்சில்) 48 மணி நேர கெடு விதித்து, துண்டிக்கப்பட்ட தலையைத் திருப்பித் தருமாறு மத்திய-மாநில அரசுகளிடம் கோரியுள்ளது. தலை திரும்பும் வரை பிரேதப் பரிசோதனை செய்ய அனுமதிக்க மாட்டோம் என்றும், அநாகரிகச் செயல்கள் பொறுத்துக்கொள்ளப்படாது என்றும் எச்சரித்துள்ளது. குடும்பத்தினரும் பாரம்பரியத்தின்படி தலை இல்லாமல் உடலை ஏற்க முடியாது எனக் கூறியுள்ளனர். அமைதி மீண்டும் நிலைநாட்டப்பட வேண்டும் என்ற கோரிக்கைகள் வலுத்துள்ளன.

இதையும் படிங்க: மீண்டும் பதற்றத்தில் மணிப்பூர்!! ஆயுதக் குழுக்களின் தாக்குதல்.. 4 பேர் பலி..!! பீதியில் உறைந்த மக்கள்!!